އެއްރަށުން އަނެއްރަށަށް ދަތުރުކުރުމަށް ޕީސީއާރުގެ ބަދަލުގައި ރެޕިޑް ޓެސްޓް ކިހިނެއްވާނެ؟

ކޮވިޑް ރޯގާގައި މިހާރު އެންމެ ބާރާށް ފެތުރެމުންދާ އޮމިކްރޯން ވޭރިއަންޓަށް ފަހު މުޅި ދުނިޔޭގައި ކޮވިޑް ރޯގާ ފެތުރެމުންދާ މިންވަރު ވަނީ އިންތިހާ އަށް އިތުރުވެފަ އެވެ. އޮމިކްރޯނަކީ ކުރީގެ ވޭރިއަންޓްތަކާ އަޅާބަލާއިރު ވަރަށް ފަސޭހައިން ފެތުރޭ ވޭރިއަންޓަކަށް ވާތީ، މިހާރު ދުނިޔޭގައި ދުވާލަކު ޕޮޒިޓިވްވާ މީހުންގެ އަދަދު ވަނީ ތިން މިލިއަނާ ގާތްކުރާ އަދަދަކަށް މައްޗަށް ގޮސްފަ އެވެ. އަދި މިއަދަދު މިހާރު ވެސް ދަނީ ކޮންމެ ދުވަހަކު އިތުރުވަމުންނެވެ.

ކޮވިޑް ކޮންޓްރޯލް ކުރުމަށް ބައެއް ގައުމުތަކުގައި ވަރަށް ހަރުކަށި ފިޔަވަޅުތައް އަޅައި، މިހާރު ވެސް ލޮކްޑައުން ހާލަތުގައި ވާއިރު އަނެއްބައި ގައުމުތަކުގައި އަޅާފައި ވަނީ ނިސްބަތުން ލުއި ފިޔަވަޅުތަކެކެވެ. ކޮވިޑް ބައްޔަށް ޓެސްޓު ކުރުމަކީ ހުރިހާ ގައުމެއްގައި ވެސް މި ފިޔަވަޅުތަކުގެ ތެރޭގައި ހިމެނޭ އަސާސީ ފިޔަވަޅެކެވެ. ނަމަވެސް އެކި ގައުމުތަކުގައި ޓެސްޓުކުރަން މަޖުބޫރުވާ ހާލަތުތައް ތަފާތެވެ. މިސާލަކަށް ރާއްޖެ ފަދަ މަދު ގައުމެއްގައި ނޫނީ، އެކި ދުވަސްވަރުގައި ވިއަސް، ޖެހިގެން އޮންނަ ރަށަށް ދިއުމަށް ޓެސްޓް ކުރާކަށް ނުޖެހެ އެވެ. ދުނިޔޭގެ އެހެން ގައުމުތަކާ އަޅާބަލާއިރު، ރާއްޖޭގައި ކޮވިޑް ހާލަތު ރަނގަޅު މިންވަރެއްގައި ކާމިޔާބުކާމާ އެކީ ކޮންޓްރޯލް ކުރަމުން ގެންދެވިފައި ވަނީ މިފަދަ ފިޔަވަޅުތަކުގެ ސަބަބުން ކަމަށް ސިއްހީ ދާއިރާގައި މަސައްކަތް ކުރާ ފަރާތްތަކުން ބުނެފައިވެ އެވެ.

ދުނިޔޭގެ ސިއްހީ ދާއިރާގެ ފުންނާބު އުސް ބޭފުޅުންނާއި ތަޖުރިބާކާރު އެޕިޑަމޮލޮޖިސްޓުން ވިދާޅުވާގޮތުގައި އޮމިކްރޯންގެ ސަބަބުން އަދި ކުރިއަށް އޮތް ދެތިން ހަފްތާގެ ތެރޭގައި މާބަރަށް ފެތުރޭނެ އެވެ. މިހާތަނަށް ބަލީގެ މާހިރުންގެ ހޯދުންތަކުން ދައްކާގޮތުން އޮމިކްރޯންއަކީ ކުރީގެ ވޭރިއަންޓްތަކާ އަޅާ ބަލާއިރު ބަލި ބޮޑުވާ މިންވަރު ނިސްބަތުން ދަށް ވޭރިއަންޓެކެވެ. ބަލި ޖެހޭ މީހުންގެ ތެރެއިން ބޮޑު ބަޔަކަށް ބަލީގެ އެއްވެސް އަލާމާތެއް ނުފެނުމާއި ބަލީގެ އަލާމާތް ފެންނަ މީހުންގެ ބަލި ހާލަތު ބޮޑުވެ ހޮސްޕިޓަލްގައި އެޑްމިޓްކުރަން ޖެހޭ މިންވަރު ދަށެވެ.

އަގުބޮޑު ޕީސީއާރް ޓެސްޓަކީ ހަމައެކަނި މިކަމަށް އޮތް ހައްލުތޯ ބައެއް ފަރާތްތަކުން އަންނަނީ ސުވާލުކުރަމުންނެވެ. ބަލި ކޮންޓްރޯލް ކުރުމަށް އޮތް އެންމެ ރަނގަޅު ހައްލަކީ ބަލި ޖެހިފައިވާ މީހުން ދެނެގަތުން ކަމަށް ވާއިރު، އެކަން ކުރެވޭނީ ޓެސްޓުކުރެވިގެންނެވެ. ދުނިޔޭގެ ގައުމުތަކަށް، ހާއްސަކޮށް ޔޫރަޕުގެ ގައުމުތަކާއި އެމެރިކާ އަށް ބަލާއިރު، ޕީސީއާރު ނޫން އެހެން ވަސީލަތްތައް ޓެސްޓުކުރުމުގައި ޕެންޑަމިކްގެ ވަރަށް ކުރީކޮޅު ވަނީ ބޭނުންކުރަން ފަށައިފަ އެވެ. އޮމިކްރޯން ވޭރިއަންޓާ ގުޅިގެން ރެޕިޑް ޓެސްޓް ބޭނުންކުރާ މިންވަރާއި އޭގެ ނަތީޖާ ރަސްމީގޮތުން ބޭނުންކުރާ މިންވަރު ވެސް ވަނީ އިތުރުވެފަ އެވެ.

އިނގިރޭސިވިލާތަށް ދަތުރުކުރާ މީހުން، އެ ގައުމަށް ދިއުމަށް ފަހު ދެ ވަނަ ދުވަހު ކޮވިޑަށް ޓެސްޓުކުރަން ޖެހެ އެވެ. ނަމަވެސް މިމަހުގެ ހަތް ވަނަ ދުވަހުން ފެށިގެން މިއީ ޕީސީއާރް ޓެސްޓަކަށް ވާކަށް ނުޖެހެ އެވެ. އަގުހެޔޮ ރެޕިޑް އެންޓިޖެން ޓެސްޓެއްގެ ނަތީޖާއިން ފުދެ އެވެ. ރެޕިޑް އެންޓިޖެން ޓެސްޓަކީ ގޭގައި އަމިއްލަ އަށް ވެސް ކޮށްލެވޭ ޓެސްޓަކަށް ވާއިރު މީގެ ގިނަ ބޭނުންތަކެއް ކުރެވެ އެވެ. ގިނަ މީހުން އެއްވާ ތަނަކަށް ދާކަމުގައި ވާނަމަ ރެޕިޑް އެންޓިޖެން ޓެސްޓެއް ހެދުމަށް އިނގިރޭސިވިލާތުގެ ސިއްހީ އިދާރާތަކުން އިލްތިމާސްކޮށްފަ އެވެ.

އެމެރިކާގެ ގެތަކަށް ހިލޭ ރެޕިޑް ޓެސްޓުކިޓް ބަހާނެ ކަމަށް މި އަހަރުގެ ފުރަތަމަ ހަފްތާގައި އެމެރިކާ ސަރުކާރުން ވެސް ވަނީ އިއުލާންކޮށްފަ އެވެ. އެމެރިކާ އަށް ދަތުރުކުރާ މީހުން ވެކްސިންގެ ދެ ޑޯޒް ފުރިހަމަކޮށްފައިވާ ނަމަ ރެޕިޑް ޓެސްޓެއްގެ ނަތީޖާ ވެސް އެމެރިކާ އަށް އެތެރެވުމުގައި ގަބޫލުކުރެ އެވެ. ނަމަވެސް އެމެރިކާ އަށް ދަތުރުކުރާ ނަމަ ޓެސްޓު ހަދަން ޖެހެނީ ކްލިނިކެއްގައި ނުވަތަ އެކަމުގެ ހުއްދަ ދީފައިވާ ފަރާތެއްގެ ބެލުމުގެ ދަށުންނެވެ.

ފްލޯފްލެކްސްގެ ރެޕިޑް ޓެސްޓެއް ކުރަނީ. މި ޓެސްޓްގެ ނަތީޖާ 15 ވަރަކަށް މިނެޓްތެރޭގައި ލިބޭނެ-- ފޮޓޯ: ފްލޯ ފްލެކްސް

ރާއްޖޭގައި ވެސް ޓެސްޓުކުރުން އާންމުކުރުމަކީ މުހިންމު ކަމެކެވެ. އަދި ވިޔަފާރި އާއި އާއިލީ ބޭނުންތަކުގައި އެއް ރަށުން އަނެއް ރަށަށް ދަތުރުކުރާއިރު ކޮވިޑް ނެގެޓިވްކަން ކަށަވަރުކުރުމަކީ ވެސް މުހިންމު ކަމެކެވެ. ނަމަވެސް އަގުބޮޑު އަދި އެތަކެއް ވަގުތެއް ކިއުގައި ހޭދަންކުރަންޖެހޭ ޕީސީއާރް ޓެސްޓު ހަދައިގެން އެންމެ ކުރު ދަތުރު ވެސް ކުރަން މަޖުބޫރުވާ ނަމަ، ދަތުރުފަތުރު ކުރުން ވާނީ އުނދަގޫ، އަދި މަޖުބޫރީ ހާލަތެއްގައި ނޫނީ ނުކުރެވޭ ކަމަކަށެވެ. މިހެންވެ ކުރިއަރާފައިވާ ބައެއް ގައުމުތަކުގައި ވެސް ކަންކުރަމުންދާ އުސޫލުން ކޮވިޑް ޓެސްޓު ހެދުމަކީ ފައިސާގެ ގޮތުންނާ ވަގުތުގެ ގޮތުން ބޮޑު ތަކުލީފަކަށް ވެފައި އޮތް އޮތުން ބަދަލުކުރަން ޖެހޭ ކަމަށް ބައެއް ފަރާތްތަކުން އަންނަނީ ބުނަމުންނެވެ.

ރެޕިޑް އެންޓިޖެން ޓެސްޓަކީ 15 މިނެޓާއި 30 މިނެޓާ ދެމެދުގެ ކުޑަ ވަގުތުކޮޅެއްގެ ތެރޭގައި ނަތީޖާ ލިބޭ، އަގުހެޔޮ، އަމިއްލަ އަށް ވެސް ހަދާލެވޭ ޓެސްޓެކެވެ. ރެޕިޑް ޓެސްޓް އާންމުކޮށްފި ނަމަ ސްކޫލްތަކުގައި ވެސް ރެންޑަމްކޮށް ޓެސްޓު ހެދުމަކީ މާލީ ގޮތުން ވެސް ކުޅަދާނަ ކަމަކަށް ވާނެ އެވެ. އަދި ރެޕިޑް ޓެސްޓަކީ ރާއްޖޭގެ ސިއްހީ ދާއިރާއިން ބައެއް ކަންކަމަށް ނަމަވެސް ގަބޫލުކުރާ އެއްޗަކަށް ވުމުން އާންމު ރައްޔިތުން އަމިއްލަ ގޭގައި ވެސް ޓެސްޓުކޮށް ބަލާނެކަން ހަމަ ޔަގީނެވެ. މިސާލަކަށް ރަށްރަށަށް ދަތުރުކުރުމުގަ އާއި ސްކޫލް ފަދަ ތަންތަނުގައި ހަދާ ރެޕިޑް ޓެސްޓުތަކުން ޕޮޒިޓިވް ވެއްޖެ ނަމަ، ޕީސީއާރް ޓެސްޓު ހެދިދާނެ އެވެ.

ބަލި ޖެހިފައިވާ މީހުންގެ އަދަދު ބެލުމަށް މިއަށް ވުރެ ލުއިފަސޭހަ ސަރުކާރަށް ވެސް ޚަރަދުކުޑަ، އާންމު ރައްޔިތުންނަށް ވެސް އަގުހެޔޮ ފަސޭހަ ގޮތެއް އޮންނާނެތޯ އެވެ. ޕީސީއާރަކަށް ކުރަންޖެހޭ ހޭދައާ އަޅާ ބަލާއިރު ރެޕިޑް ޓެސްޓު ކިޓެއްގެ އަގަކީ 100ރ. އަށް ވުރެ ކުޑަ އަގެކެވެ. ޕީސީއާރް ޓެސްޓެކޭ އެއްފަދައިން ރެޕީޑް ޓެސްޓު ކިޓްތަކަކީ ވެސް ދުނިޔޭގެ ކުރިއަރާފައިވާ ގައުމުތަކުގެ ސިއްހީ އިދާރާތަކުން ހުއްދަ ލިބިފައިވާ ބާވަތެއް ކަމަށް ވާއިރު ރާއްޖޭގައި އެއްވެސް މިންވަރަކަށް ރެޕިޑް ޓެސްޓުގެ ނަތީޖާ ގަބޫލުކުރަން ފަސްޖެހެނީ ކީއްވެތޯ ސުވާލު އުފެދެ އެވެ.

އެޑިޓަރުގެ ނޯޓް: މިއީ ޕްރޮމޯޝަނަލް އާޓިކަލް އެކެވެ.