ގަން އެއާޕޯޓަށް ދޫގަސް ދެނީ ސަރުކާރުން ދަރަނި ދައްކާ ގޮތަށް

އައްޑޫ ގަމުގައި ސަރުކާރުން ކުރިން ހިންގި ގެސްޓް ހައުސް، ދޫގަސް ހުރި ބިމުގައި ސިޓީ ހޮޓަލެއް ތަރައްގީ ކުރަން އެމްޕީއެލްއާ ހަވާލުކޮށްފައި އޮތަސް އެކަން ހުއްޓިފައި އޮއްވައި އެ ތަން ގަން އިންޓަނޭޝަނަލް އެއާޕޯޓް ކުންފުންޏާ ހަވާލުކުރަނީ މިހާރު ހުރި ދަރަނިތައް ސަރުކާރުން ދައްކާ ގޮތަށް ކަމަށް އެ ކުންފުނީގެ މެނޭޖިން ޑިރެކްޓަރު ގައިސް ނަސީރު މިއަދު ވިދާޅުވެއްޖެ އެވެ.

އޭނާ "މިހާރު" އަށް ވިދާޅުވީ އެ މަސައްކަތް ހަވާލު ކުރުމަށް ފިނޭންސް މިނިސްޓްރީ އާއި އެމްޕީއެލް އަދި ގަން އެއާޕޯޓާ ދެމެދު އެއްބަސްވުމުގައި މިއަދު ސޮއިކުރަން ނިންމާފައިވާ ކަމަށެވެ. އެ އެއްބަސްވުމުގެ ދަށުން، ގަން އެއާޕޯޓާ ޕްރޮޖެކްޓް ހަވާލުކުރާނީ ދަރަންޏާ ނުލައި ކަމަށް ވެސް އޭނާ ވިދާޅުވި އެވެ.

ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ހިންގަން ފެށި ދޫގަސް، ކުރީގެ ރައީސް މުހައްމަދު ނަޝީދުގެ ވެރިކަމުގައި 2009 ވަނަ އަހަރު އޭރު ދެކުނުގެ ދަތުރުފަތުރުގެ ހިދުމަތް ދެމުން އައި އެމްވީކޭ ކުންފުންޏާ ހަވާލުކުރި އެވެ. އެކަމަކު، އެ ކުންފުންޏާ ހަވާލުކޮށްގެން އެތަން ނުހިންގޭތީ 2015 ވަނަ އަހަރު އެ ތަން ވަނީ އަނބުރާ ސަރުކާރަށް ނަގައިފަ އެވެ.

އެމްވީކޭ އަތުން ދޫގަސް ނެގިއިރު، އެ ކުންފުނިން އެ ތަން ރަހުނުކޮށް، ބޭންކް އޮފް ސިލޯނުން ނެގި 2.7 މިލިއަން ޑޮލަރު (41.6 މިލިއަން ރުފިޔާ) ލޯނެއް އޮތެވެ. އެ ލޯނު އަދި ވެސް ދައްކާ ނުނިމޭތީ، ކޯޓުން އޮތީ ލޯނު ނުދައްކައިފި ނަމަ ދޫގަސް ވިއްކާލުމުގެ ބާރު ވެސް ބޭންކަށް ދީފަ އެވެ. ގަން އެއާޕޯޓާ މަސައްކަތް ހަވާލުކުރި ނަމަވެސް ލޯނު ދައްކާނީ ސަރުކާރުން ކަމަށް ގައިސް ވިދާޅުވި އެވެ.

"ދޫގަހަކީ ލޯނެއް އޮތް ތަނެއް. އަދިވެސް ލޯނު ދައްކާ ނުނިމޭ. އެކަމަކު ސަރުކާރުން އެ ތަން އަޅުގަނޑުމެންނާ ހަވާލުކުރަނީ ޑެޓް ފްރީކޮށް،" ގައިސް ވިދާޅުވި އެވެ.

"ދޫގަސް ހުރި ބިމުގެ ވަށައިގެން ވެސް އަޅުގަނޑުމެންގެ ބިންތައް އެބަހުރި. އެހެންވެ އަޅުގަނޑުމެން ނިންމާފައި އޮތީ އެ ބިންތައް ވެސް ހިމަނައިގެން އެ ތަން ތަރައްގީ ކުރަން. ޕްލޭންތަކަށް ވަރަށް ބޮޑު ބަދަލުތައް ގެނެސްފައި އަޅުގަނޑުމެން ވާނީ،"--- ގައިސް

ކުރީގެ ރައީސް އަބްދުﷲ ޔާމީންގެ ސަރުކާރުން ދޫގަސް ހުންނަ ތަނުގައި ސިޓީ ހޮޓަލެއް އަޅަން އެމްޕީއެލްއާ ވެސް ހަވާލުކުރި އެވެ. ނަމަވެސް އެކި ސަބަބުތަކާ ހުރެ އެ މަސައްކަތް އޮތީ މަޑުޖެހިފަ އެވެ.

ގައިސް ވިދާޅުވި ގޮތުގައި އެމްޕީއެލް އަތުން ނަގައި ގަން އެއާޕޯޓާ އެ މަސައްކަތް ހަވާލުކުރަން މި ސަރުކާރުން އެންމެ ފުރަތަމަ މަޝްވަރާތައް ފެށީ ފެބްރުއަރީ 2020 ގަ އެވެ.

ގައިސް ވިދާޅުވީ އެމްޕީއެލް އިން ދޫގަސް ތަރައްގީކުރަން ޕްލޭންތައް ހަދާފައި އޮތަސް ގަން އެއާޕޯޓުން އެތަން ތަރަައްގީ ކުރާނީ އަމިއްލަ ޕްލޭނަކަށް ކަމަށެވެ. އެ ޕްލޭން މިހާރު ފައިނަލް ވެފައިވާ ކަމަށާއި ތަފުސީލީ ކުރެހުމުގެ މަސައްކަތްތައް މިހާރު ކުރިއަށް ގެންދާ ކަމަށް ވެސް އޭނާ ވިދާޅުވި އެވެ.

އެމްޕީއެލްގެ ޕްލޭނުގެ ދަށުން އެ ތަނުގައި 120 ކޮޓަރި ހަދަން ނިންމި އެވެ. ނަމަވެސް ޕްލޭން އެއްކޮށް ބަދަލުކޮށްފައިވާ ކަމަށާއި ސިޓީ ހޮޓާ ހަދާ ބިން ވެސް މިހާރު ބޮޑުވާނެ ކަމަށް ގައިސް ވިދާޅުވި އެވެ. ނަމަވެސް އެ ޕްލޭނުގެ މާބޮޑު ތަފްސީލެއް އޭނާ ނުދެއްވަ އެވެ.

"ދޫގަސް ހުރި ބިމުގެ ވަށައިގެން ވެސް އަޅުގަނޑުމެންގެ ބިންތައް އެބަހުރި. އެހެންވެ އަޅުގަނޑުމެން ނިންމާފައި އޮތީ އެ ބިންތައް ވެސް ހިމަނައިގެން އެ ތަން ތަރައްގީ ކުރަން. ޕްލޭންތަކަށް ވަރަށް ބޮޑު ބަދަލުތައް ގެނެސްފައި އަޅުގަނޑުމެން ވާނީ،" ގައިސް ވިދާޅުވި އެވެ.

ރައީސް އިބްރިހާމް މުހައްމަދު ސޯލިހު މި ހަފުތާގައި އައްޑު އަށް ކުރެއްވި ދަތުރުފުޅުގައި ވެސް އެ މަސައްކަތް ގަން އެއާޕޯޓާ ހަވާލުކުރަން ނިންމާފައިވާ ކަން އިއުލާން ކުރެއްވި އެވެ. އެ މަނިކުފާނު ވިދާޅުވި ގޮތުގައި އެ ތަނުގެ މަސައްކަތް އަންނަ އަހަރުގެ މެއި/ޖޫން މަހުގެ ތެރޭގައި ނިންމައި ހުޅުވޭނެ އެވެ.

އެ ތާރީހަށް މަސައްކަތް ނިންމުމަށް މަސައްކަތް ކުރައްވާނެ ކަމުގެ ޔަގީންކަން ގައިސް ދެއްވި އެވެ.

އެ ހޮޓާ ހުޅުވުމުން ކޮންވެންޝަންތައް ބާއްވައި، ޒުވާނުންނަށް އިތުރު ވަޒީފާގެ ފުރުސަތުތައް ލިބޭނެ ކަމަށް ރައީސް ވިދާޅުވި އެވެ.