ހޯރަފުށީގައި ހުރި ޑޮކްޓަރު "އަބަދު ނިދާފައި"!

ހުންގަދަވެގެން ހއ. ހޯރަފުށީ ހެލްތު ސެންޓަރަށް ގެންދިޔަ ކުއްޖަކަށް ފަރުވާނުދީ ޑޮކްޓަރު ކޮޓަރީގައި "ރެސްޓްކުރަން" އޮތް މައްސަލައެއް ފެންމަތިވެފައިވަނިކޮށް ބަލި މީހުން ބަލަމުން، އެކި ދުވަސްމަތިން އޭނާ ނިދާފައި އޮންނަ ފޮޓޯތަކެއް އާންމުވެއްޖެ އެވެ.

ރޭ މައްސަލަ ބޮޑުވީ ވަރަށް ބޮޑަށް ހުން ގަދަވެގެން ޑޮކްޓަރަށް ދައްކަން ދިޔަ އެއް އަހަރުގެ ކުއްޖަކަށް ފަރުވާދިނުން ލަސްކުރުމުންނެވެ. ނަރުހުންނާއި ކުއްޖާގެ ބައްޕަ ވަނީ އެ ކުއްޖާ ވަރަށް ބޮޑަށް ހުން އައިސްފައި އޮތުމުން ފަރުވާދޭން ތަކުރާރުކޮށް އެދިފަ އެވެ. އެކަމަކު ޑޮކްޓަރު ބުނެފައި ވަނީ އޭނާ "ރެސްޓްކުރަނީ" ކަމަށެވެ.

ޑޮކްޓަރުގެ ކޮޓަރީގެ މޭޒު މަތީގައި ބޯއަޅާލައިގެން ޑޮކްޓަރު ނިދަން އޮތް ފޮޓޯ އެ ކުއްޖާގެ ބައްޕަ ސޯޝަލް މީޑިއާގައި އާންމުކޮށް ނުރުހުން ފާޅުކޮށްފަ އެވެ. އާދޭސްކޮށްފައި ކުއްޖާ ބަލައިދޭން އެދުމުން ވެސް ޑޮކްޓަރު އަޅާނުލާ އޮތުމުން ވަރަށް ބޮޑަށް ހިތްހަމަނުޖެހިގެން ކުއްޖާގެ ބައްޕަ ވާހަކަ ދެއްކި އެވެ.

Hoarafushi doctor, hun gadhavefai oiy thuhthu kujjaku balan inkaaru koffi

The most trusted news source in the Maldives

Mihaaru

އެ މައްސަލައާ އެކު ދެން އާންމުވެފައި ވަނީ އެކި ދުވަސް މަތިން ޑޮކްޓަރު ކޮޓަރީގައި މޭޒުގައި ބޯއަޅާލައިގެން ނިދަން އޮންނަ ފޮޓޯތަކެވެ. ބެލެވޭ ގޮތުގައި އެ ފޮޓޯތަކަކީ އެތަނަށް ޑޮކްޓަރަށް ދައްކަން ވަން މީހުން ނަގާފައިވާ ފޮޓޯތަކެވެ.

އޭގެ ތެރެއިން ބައެއް ފޮޓޯތަކުން ފެންނަ ގޮތުގައި ދުވަސްވީ ބަލި މީހަކު ޑޮކްޓަރުގެ މޭޒު ކައިރީ، އިށީނދެގެން އިން ވަގުތު ވެސް ޑޮކްޓަރު އޮތީ މޭޒުގައި ބޯއަޅައިގެން ލޯމަރާލައިގެންނެވެ.

ހޯރަފުށީ ހެލްތު ސެންޓަރަށް މިދިޔަ ޖުލައި މަހު ޑޮކްޓަރަށް ދެއްކުމަށް ދުވަސްވީ މީހަކު ގޮސް އިންއިރު ވެސް ޑޮކްޓަރު މޭޒުގައި ބޯއަޅާލައިގެން.

ނައިޖީރިއާ އަށް ނިސްބަތްވާ އެ ޑޮކްޓަރާ ގުޅިގެން ރޭ ކަންބޮޑުވުން ފާޅުކުރުމުން ހެލްތު ސެންޓަރު ހިންގުމާ ހަވާލުވެ ހުންނެވި އިބްރާހިމް ރަޝީދު ވިދާޅުވީ، އެ ޑޮކްޓަރާ ގުޅިގެން އެކަހަލަ ގިނަ ޝަކުވާތަކެއް ލިބެމުންދާ ކަމަށެވެ. އެހެންވެ އޭނާއަށް ކުރިން ނޯޓިސް ދީފައިވަނިކޮށް އަނެއްކާ ރޭ އެ މައްސަލަ ފެންމަތިވުމުން އެކަން ހެލްތު މިނިސްޓްރީއަށް އަންގާފައިވާ ކަމަށް ރަޝީދު ވިދާޅުވެ އެވެ.

އެ ޑޮކްޓަރާ ހަވާލާދީ ރަޝީދު ވިދާޅުވީ ޑޮކްޓަރު އޮތީ ބަލި މީހުން ބެލުމަށް ފަހު ވަރުބަލިވެގެން ކަމަށެވެ.