ދިގުރަށަށް އުދައަރައި، ސުނާމީގައި ނުލިބޭވަރުގެ ގެއްލުމެއް ލިބިއްޖެ: ކައުންސިލް

އދ. ދިގުރަށަށް ރޭ ދަންވަރު ވަރަށް ބޮޑަށް އުދައަރައި، ސުނާމީގައި ވެސް އެ ރަށަށް ނުލިބޭ ވަރުގެ ބޮޑު ގެއްލުމެއް ލިބިފައިވާ ކަމަށް ކައުންސިލުން މިއަދު ބުނެފި އެވެ.

ކައުންސިލްގެ ރައީސް އިބްރާހިމް އުސްމާން "މިހާރު" އަށް ވިދާޅުވީ ރޭ މެންދަމުން އަލިވި ފަހުން އެ ރަށަށް އަރަން ފެށި އުދަ ހުއްޓުނީ ފަތިސްވި ފަހުން ކަމަށެވެ. އުދަ އެރީ އެ ރަށުގެ އިރުމަތީ ފަރާތުން ކަމަށް ވިދާޅުވި އެވެ.

ޗުއްޓީ އަށް މި ވަގުތު މާލޭގައި ހުންނެވި އުސްމާން ރަށުގެ ބައެއް މީހުންގެ ވާހަކަތަކާ ހަވާލާދެއްވާ ވިދާޅުވީ، ރޭ އެ ރަށަށް އެރި އުދައަކީ އާދަޔާ ހިލާފު ކަމެއް ކަމަށެވެ. މީގެ ކުރިން ދުވަހަކު ވެސް 2004 ވަނަ އަހަރު ރާއްޖެ އަށް ކުރިމަތިވި ސުނާމީގެ ކާރިސާގައި ވެސް އެ ރަށަށް އެ ވަރުގެ ބޮޑެތި ރާޅު އަރައި، ގެއްލުންތައް ލިބިފައި ނުވާ ކަމަށް ކައުންސިލްގެ ރައީސް ވިދާޅުވި އެވެ.

ދިގުރަށަކީ އާންމުކޮށް އުދައަރާ ރަށެއް ނޫނެވެ. ސުނާމީގައި ވެސް ދިގުރަށް ހިމެނެނީ އެންމެ މަދުން ގެއްލުން ލިބުނު ރަށްތަކުގެ ތެރޭގަ އެވެ.

ސުނާމީގައި އެ ރަށުގެ ހުޅަނގު ފަރާތުން އަތިރިމައްޗާ ކައިރީގައި ހުރި ބައެއް ގޭގެއަށް ލޮނު ވަން ނަމަވެސް، މާ ބޮޑު ގެއްލުމެއް ނުލިބެ އެވެ. އަދި އެ ފަހަރު ރާޅު އެރީ ވެސް ރަށުގެ ކުޑަކުޑަ ތަންކޮޅަކަށެވެ. އެކަމަކު ކައުންސިލުން ބުނީ ރޭގެ އުދާގައި ވަރަށް ގިނަ ގޭގެއަށް ލޮނު ވަދެ، ހިފައިގެންގުޅޭ ތަކެއްޗަށް ވެސް ގެއްލުން ވެފައިވާ ކަމަށެވެ.

އދ. ދިގުރަށުގެ މަގެއް މަތި: އުދަ އަރައި ގޭގެއަށް ވަރަށް ބޮޑެތި ގެއްލުންތައް ލިބުނު.

"ގޭގެ އަށާއި ފިހާރަތަކަށާއި އާންމު ތަންތަނަށް ވަރަށް ބޮޑަށް ލޮނު ވަދެ، ބޮޑެތި ގެއްލުންތަކެއް ލިބިފައި ހުރީ. ބަންދަރުގައި އޮތް ބައެއް ލޯންޗުތަކާއި އޮޑިދޯނިފަހަރުގެ ވާ ތައް ކަނޑައިގެން ގޮސްގެން ވެސް ގެއްލުންތައް ލިބުނު،" އޭނާ ވިދާޅުވި އެވެ.

"ރާޅު އަރާ ތަން ފެނުނު ބައެއް މީހުން ބުނި ރޭ އެޅި ރާޅުގައި 13-15 ފޫޓް ހުންނާނެ ކަމަށް. ރަށުގެ ބައެއް މީހުން ހީކޮށްގެން ތިބީ އަނެއްކާވެސް ސުނާމީ އެރީ ކަމަށް."

އެ ހާދިސާގައި އެއްވެސް މީހަކަށް އަނިޔާ ނުވިޔަސް، ލޮނު ވަނުމުގެ ސަބަބުން މިހާރު ބައެއް ގޭގެ ވަނީ ހުސްކޮށްފަ އެވެ.

ރީތި، ދިގު ދޮންވެލި ތުނޑިއެއް އޮންނަ ދިގުރަށަކީ ވަރަށް ފުޅާ ދާއިރާއެއްގައި ގެސްޓް ހައުސްގެ ވިޔަފާރި ވެސް ކުރަމުން އަންނަ ރަށެކެވެ. އުދައިގައި އެ ތަންތަނަށް ވެސް ވަރަށް ބޮޑެތި ގެއްލުން ލިބިފައިވާ ކަމަށް ކައުންސިލުން ބުންޏެވެ.

ކައުންސިލުން ބުނިގޮތުގައި ލިބުނު ގެއްލުންތަކުގެ ތަފުސީލު ނެގުމުގެ މަސައްކަތް މިހާރު އަންނަނީ ކުރަމުންނެވެ. އެހާ ބޮޑަށް އުދަ އަރާފައި އޮތްއިރު، އެ ރަށަށް ވަރަށް ބޯކޮށް މިއަދު ވާރޭވެހެމުން ދާތީ އެ މަސައްކަތް ކުރަން ދަތިވެފައިވާ ކަމަށް ވެސް ބުންޏެވެ.

ދިގުރަށަށް އުދައެރި އިރުގައި މި ދުވަސްވަރު ރާއްޖެ އަށް ވަރަށް ބޮޑަށް މޫސުން ގޯހެވެ.