ނައިބު ރައީސް ފައިސަލްގެ ބަޔޮގްރަފީ ނެރެފި

ނައިބު ރައީސް ފައިސަލް ނަސީމަށް 50 އަހަރު ފުރުމުގެ މުނާސަބަތާ ގުޅުވައިގެން، އެ މަނިކުފާނުގެ ހަޔާތްޕުޅުގެ މައްޗަށް ލިޔެފައިވާ ބަޔޮގްރަފީ ރޭ ނެރެފި އެވެ.

ޣިޔާސުއްދީން ސްކޫލުގައި ބޭއްވި ރަސްމިއްޔާތެއްގައި، 317 ސޮފްހާގެ "ފައިސަލް ނަސީމް" ފޮތް ނެރެދެއްވީ އިސްލާމިކް ޔުނިވާސިޓީގެ ޗާންސެލަރު ޑރ. މުހައްމަދު ޒާހިރު ހުސެއިނެވެ.

ނޫސްވެރިޔާ އަހުމަދު ސާއިލް އަލީ ލިޔުނު މި ފޮތުގައި، ނައިބު ރައީސްގެ މުޅި ހަޔާތްޕުޅުގެ މައްޗަށް އަލިއަޅުވާލާފައިވެ އެވެ.

ސާއިލް ބުނީ ކިޔަވާ ވިދާޅުވުމަށް އުފަން ރަށް، ފުވައްމުލަކު ދޫކުރައްވައި ފައިސަލް މާލެ ބަދަލުވެވަޑައިގެން އުޅުއްވަން ޖެހުނު ހާލާއި ކިޔެވުން ނިންމެވުމަށް ފަހު، ވަޒީފާގެ މާހައުލު އަދި 20 އަހަރުގައި ރިސޯޓު މެނޭޖަރުކަން ކުރެއްވުމާއި އޭގެ ފަހުން ސިޔާސީ ދާއިރާއަށް ނުކުމެވަޑައިގެން، ކުރިމަތިމަތިވި ގޮންޖެހުންތަކުގެ ވާހަކަތައް ވެސް އެ ފޮތުގައި ވާނެ ކަމަށެވެ.

ނައިބު ރައީސް ފައިސަލް ނަސީމްގެ ބަޔޮގްރަފީ ނެރުމަށް ރަެ ބޭއްވި ރަސްމިއްޔާތުގައި، އެ ފޮތް ލިޔުނު ނޫސްވެރިޔާ ސާއިލް ވާހަކަދައްކަނީ.-- ފޮޓޯ: ނިޝާން އަލީ/ މިހާރު

"މީގެ ކުރިން ނައިބު ރައީސް ނުދައްކަވާ ހުރި ވާހަކަތައް ވެސް މި ފޮތުގައި ހުންނާނެ." ސާއިލް ބުންޏެވެ.

ސިޔާސީ ކަންކަމުގެ ތެރެއަށް ވަދެވަޑައިގަތުމުގެ ކުރިން ވެސް ނައިބު ރައީސަކީ ފުވައްމުލަކުގައި އިޖުތިމާއީ ކަންކަމުގައި އުޅުއްވި ބޭފުޅެކެވެ. އެ ކަމުގެ އަގުވަޒަންކޮށް ސަރުކާރުން ޒުވާނުންގެ އެވޯޑު ވެސް ކުރީގެ ރައީސް މައުމޫންގެ ވެރިކަމުގައި ފައިސަލަށް އެރުވި އެވެ. އޭގެ ފަހުން މަޖިލީހުގެ ހާއްސަ މެމްބަރުކަމާއި ކާށިދޫ ދާއިރާގެ މެމްބަރުކަން ވެސް ކުރެއްވި އެވެ.

އެ މަނިކުފާނަކީ ވެރިކަމުގައި ދައުރެއްގައި މިހާ ގިނަ ދުވަސްވަންދެން ނައިބު ރައީސްގެ މަގާމު ފުރިހަމަކުރެއްވި ފުރަތަމަ ބޭފުޅާ އެވެ.

ނައިބު ރައީސް ފައިސަލް ނަސީމްގެ ބަޔޮގްރަފީ ނެރުމަށް ރޭ ބޭއްވި ރަސްމިއްޔާތުގައި ބައިވެރިވި ބައެއް ބޭފުޅުން.-- ފޮޓޯ: ނިޝާން އަލީ/ މިހާރު

ވަފާތެރި ނައިބު ރައީސެއްގެ ގޮތުގައި ހުރެވުނު ސަބަބާއި ކުރަން ބޭނުންވެ، ނުކުރެވި ހުރި ކަންކަމާއި ކުރިއަށް އޮތް ތަނަށް ރާވާފައިވާ ކަންކަން ވެސް އެ ފޮތުގައި ހުންނާނެ އެވެ.

ވެރިކަމުގެ މި ދައުރު ނިމިގެންދާއިރު، މިހާރު ގިނަ ބަޔަކު އުފައްދާ ސުވާލަކީ ނައިބު ރައީސްގެ ކުރިމަގާ ގުޅޭގޮތުންނެވެ. ސާއިލް ބުނީ އެ ކަމަށް ވެސް މި ފޮތުން ޖަވާބު ލިބޭނެ ކަމަށެވެ.

ނައިބު ރައީސްގެ ބަޔޮގްރަފީ، ނޮވެލްޓީ ބުކްޝޮޕުން މިއަދުން ފެށިގެން ގަންނަން ލިބެން ހުންނާނެ އެވެ. ފޮތުގެ އަގަކީ 300ރ. އެވެ.