ބީއެމްއެލް ކޮމިއުނިޓީ ފަންޑުގެ އާ ޕްރޮޖެކްޓުތަކެއް ނިންމައިފި

ބީއެމްއެލްގެ ކޮމިއުނިޓީ ފަންޑުން ހިންގި ޕްރޮޖެކްޓުތައް ނިމިއްޖެ އެވެ.

ދެމެހެއްޓެނިވި ޕްރޮޖެކްޓްތައް މެދުވެރިކޮށް ޖަމިއްޔާ އަދި ޖަމާއަތްތަކަށް އެހީތެރިކަން ފޯރުކޮށްދީ ބާރުވެރިކުރުމުގެ ގޮތުން ބީއެމްއެލްއިން ހިލޭ އެހީ ދޭ މި ފަންޑަކީ ކޮންމެ އަހަރަކު ވެސް އެކި ފިޔަވަހިތަކަށް ބަހާލައިގެން ދޫކުރާ ފަންޑެކެވެ.

މި ފަންޑުން ނިމުނު ޕްރޮގުރާމުތަކުގެ ތެރޭގައި ހިމެނެނީ ހއ. މުރައިދޫ އަދި ހއ. ތަކަންދޫގައި ހިންގި ކެޕޭސިޓީ ބިލްޑިން ޕްރޮގުރާމުތަކާއި ހދ. ނެއްލައިދޫގެ ޔޫތު ޑިވަލޮޕްމަންޓު ޕްރޮގުރާމާއި މ. މުލަކާއި އއ. އުކުޅަހުގައި ހިންގި ޕްރޮޖެކްޓްތަކާއި ސ. ހިތަދޫ "ރަށްވެށި ޕްރޮގްރާމް" އެވެ.

ސ. ހިތަދޫގައި ހިންގި "ރަށްވެށި ޕްރޮގްރާމް" އަކީ މޯލްޑިވްސް މަންތާ ކޮންޒަވޭޝަން ޕްރޮގުރާމުން ހިންގި އެއް މަސް ދުވަހުގެ ކޯހެކެވެ. މިއީ އާއްމުންގެ މެދުގައި ހޭލުންތެރިކަން އިތުރުކުރުމަށް ހިންގި ޕްރޮގުރާމެކެވެ. މި ޕްރޮގުރާމުގައި އާއްމުންނާ އެކު މަންތާ ރޭގެ ސާވޭއެއް ހެދުމުގެ ދަތުރެއް ވެސް ވަނީ ކޮށްފަ އެވެ.

މި ޕްރޮޖެކްޓުގައި އެ ޖަމިއްޔާއިން ހިންގަމުން އަންނަ ދިރާސާތަކުގެ މައުލޫމާތު ވަނީ ހިއްސާކޮށްފަ އެވެ. އަދި ދަތުރުކުރާ ފަރާތްތަކާއި އިންޓަވިއުކޮށް، އެ ފަރާތްތަކުގެ ތަޖުރިބާގެ އަލީގައި ކަނޑުގެ މައުލޫމާތުތައް ވަނީ ހޯދައިފަ އެވެ. މި މައުލޫމާތުތައް ޕަބްލިޝްކުރުމަށް ވަނީ ހަމަޖެހިފަ އެވެ.

ހދ. ނެއްލައިދޫގައި ހިންގި ޕްރޮޖެކްޓަކީ ފަޓޯ ސްޕޯޓްސް އެކަޑަމީން ޔޫތު ޑިވަލޮޕްމަންޓު ޕްރޮގުރާމް ހިންގުމަށް ބޭނުންވާ ކުޅިވަރު އިކުއިޕްމަންޓުތައް ހޯދައިދިނުމެވެ. މިއީ ހަ އަހަރާއި 15 އަހަރާއި ދެމެދުގެ ކުދިންނަށް ފުޓުބޯޅަ، ހޭންޑްބޯލް އަދި ވޮލީބޯޅަ ކުޅުމަށް ތަމްރީނުކުރާ ޕްރޮގުރާމެކެވެ.

މި ފަންޑުގެ ދަށުން މ. މުލަކުގެ ސްކޫލްގައި ވަނީ ރީޑިން ޕާކެއް ހަދައިފަ އެވެ. ފޮތް ކިޔުމަށް ކުޑަކުދިންގެ މެދުގައި ހިތްވަރުދިނުމުގެ ގޮތުން ގާއިމުކުރި މި ޕާކަކީ އެ ރަށުގެ ކޮމިއުނިޓީ އެމްޕަވާމަންޓް ލިންކޭޖް ޖަމިއްޔާއިން ހިންގި ޕްރޮޖެކްޓެކެވެ.

އއ. އުކުޅަސް، ހއ. މުރައިދޫ އަދި ހއ. ތަކަންދޫގައި ހިންގި ލައިފް ކޯޗިން އެންޑް ކެޕޭސިޓީ ބިލްޑިން ޕްރޮގުރާމްތަކަކީ އަންހެނުންނަށް އަމާޒުކޮށް ލޭޑީ އެންޓަޕްރިނިއާ ޖަމިއްޔާއިން ހިންގި ޕްރޮގުރާމެކެވެ. މި ޕްރޮގުރާމުގައި ވިޔަފާރި ފެށުމާ ގުޅޭގޮތުންނާއި ޑިޖިޓަލް މާކެޓިން އާއި އަމިއްލަ އަށް ބާރުވެރިވުމާއި ސްޓްރެސް މެނޭޖުމަންޓުގެ މައުލޫމާތުތައް ވަނީ ދީފަ އެވެ.

ބީއެމްއެލް އިން މި ފަންޑުން މިހާތަނަށް ރާއްޖޭގެ އެކި ހިސާބުތަކުގައި 100 ޕްރޮޖެކްޓަކަށް މާލީ އެހީތެރިކަން ކޮމިއުނިޓީ ފަންޑުން ވަނީ ފޯރުކޮށްދީފަ އެވެ.