11 ޖުލައި 2024 - 15:32
މޯލްޑިވްސް ޕޯޓްސް ލިމިޓެޑް (އެމްޕީއެލް) ހިންގުމާ ހަވާލުވެވަޑައިގެންނެވި ފަހުން، މިހާރު ވެސް އެ ކުންފުނީގެ ހަރަދުތައް ފަސް ޕަސެންޓު ކުޑަކޮށްފައިވާ ކަމަށާއި އަމާޒަކީ މުސްތަގުބަލުގައި އެ އަދަދު 10 ޕަސެންޓަށް އިތުރު ކުރުން ކަމަށް ސީއީއޯ މުހައްމަދު ވަޖީހު އިބްރާހިމް ވިދާޅުވެއްޖެ އެވެ.
މި ހަފުތާގައި "މިހާރު" އަށް ދެއްވި އިންޓަވިއުއެއްގައި ވަޖީހު ވިދާޅުވީ، އެމްޕީއެލް ހިންގުމާ މިދިޔަ އަހަރުގެ ނޮވެމްބަރު މަހު ހަވާލުވެވަޑައިގެންނެވިއިރު، ކުންފުނީގެ ދަރަނި ހުރީ 383 މިލިއަން ރުފިޔާގައި ކަމަށެވެ.
"އަޅުގަނޑު ފުރަތަމަ ދުވަހު ވެސް ކުންފުނީގެ ވެރިންނާ ބައްދަލުކޮށް ދެންނެވިން، ހިނގާށޭ އެއް އަތުން ގަދަޔަށް މަސައްކަތް ކުރަން އާމްދަނީ އިތުރު ކުރަން. އަނެއް އަތުން އުޅޭށޭ ހަރަދުތައް ކުޑަކުރަން،" ވަޖީހު ވިދާޅުވި އެވެ.
އޭގެ ފަހުން ކޮންމެ މަހަކު ވެސް ހަރަދު ކުޑަކުރުމުގެ ކަންކަން ވަރަށް ގާތުން ބެއްލެވި ކަމަށާއި ފާއިތުވި ހަ މަހެއްހާ ދުވަހުގެ ތެރޭގައި ކުންފުނީގެ ހަރަދުތައް އެވަރެޖުކޮށް ފަސް ޕަސެންޓު ކުޑަކޮށްފައިވާ ކަމަށް އޭނާ ވިދާޅުވި އެވެ.
ވަޖީހު ވިދާޅުވި ގޮތުގައި، ގައުމުގެ މާލީ ހާލަތު މިވަގުތު ހުރި ގޮތުން، ސަރުކާރު ހިއްސާވާ ކުންފުނިތަކުގެ ހަރަދު ވެސް ކުޑަކުރަން ސަރުކާރުން އަމާޒު ހިފާފައިވާއިރު، އެކަމަށް އެއްބާރުލުން ދިނުމުގެ ގޮތުން އެމްޕީއެލްގެ ހަރަދުތައް އެ އަށް ވުރެ ވެސް ކުޑަކުރަން އަންނަނީ މަސައްކަތް ކުރަމުންނެވެ.
"އަޅުގަނޑުމެންގެ ޓާގެޓަކީ އަދި އިތުރު ފަސް ޕަސެންޓު އިތުރުކޮށްލައި، 10 ޕަސެންޓުން ހަރަދުތައް ކުޑަކޮށްލުން،" އޭނާ ވިދާޅުވި އެވެ.
އަޅުގަނޑު ފުރަތަމަ ދުވަހު ވެސް ކުންފުނީގެ ވެރިންނާ ބައްދަލުކޮށް ދެންނެވިން، ހިނގާށޭ އެއް އަތުން ގަދަޔަށް މަސައްކަތް ކުރަން އާމްދަނީ އިތުރު ކުރަން. އަނެއް އަތުން އުޅޭށޭ ހަރަދުތައް ކުޑަކުރަން،"--- ވަޖީހު
ހަރަދުތައް ކުޑަކުރުމާ އެކު، ވަޖީހު ވިދާޅުވި ގޮތުގައި، އެމްޕީއެލް އަށް އާމްދަނީ އިތުރު ކުރެވޭނެ ގޮތްތައް ވެސް ހޯދައި، ބައެއް ކަންކަމުގެ އަމަލީ މަސައްކަތް ވެސް ވަނީ ފަށައިފަ އެވެ.
އޭގެ ތެރޭގައި، ތިލަފުށީގައި ބޯޓު ޔާޑަކާއި ފަންނީ ތަމްރީނު ދޭ މަރުކަޒެއް ގާއިމުކުރުމާއި ބޮންޑެޑް ވެއާހައުސްގެ ކެޕޭސިޓީ އިތުރުކުރުމާއި އަދި ސީ ޓު އެއާ ކާގޯގެ ހިދުމަތް ފުޅާކުރުމުގެ މަސައްކަތް އޭނާ ފާހަގަކުރެއްވި އެވެ.
އެމްޕީއެލްގެ ސީއީއޯ ވަޖީހު މިދިޔަ ހޯމަ ދުވަހު "މިހާރު" އާ ވާހަކަ ދައްކަވަނީ.---ފޮޓޯ: ނިޝާން އަލީ| މިހާރު
މީގެ އިތުރުން، ވަޖީހު ވިދާޅުވީ އިހަވަންދިއްޕޮޅުގައި އަންނަ މަހު ފެށުމަށް ތައްޔާރުވަމުން އަންނަ ބަންކަރިންގެ ހިދުމަތާ އެކު، ރާއްޖޭގެ އުތުރަށް ގެންނަ އާ ހިދުމަތްތަކުގެ ތެރޭގައި އުލިގަމުގައި ޔޮޓު މެރީނާއެއް ގާއިމުކުރުމަށް އެ ކުންފުނިން ވިސްނާފައިވާ ކަމަށެވެ.
ޔޮޓު މެރީނާ ހެދުމަށް އޭނާ ވިދާޅުވި ގޮތުގައި މިހާރު ތުރުކީ އަދި ޗައިނާގެ ކުންފުންޏަކުން ވަނީ ޝައުގުވެރިކަން ފާޅުކޮށްފަ އެވެ.
އެކަމަކު ކޮންޓްރެކްޓާ ފައިނޭންސިންގެ ދަށުން ބޭރުގެ ބަޔަކު މި މެރީނާ ތަރައްގީ ކުރިޔަސް، ތަން ހިންގާނީ އެމްޕީއެލް އިން ކަމަށް ވަޖީހް ވިދާޅުވި އެވެ. އެސްޓީއޯ އިން އިހަވަންދިއްޕޮޅުގައި ހަދާ ބައިނަލްއަގުވާމީ ބަންކަރިންގެ މަޝްރޫއުގެ ތެރެއިން ވެސް އެމްޕީއެލް އަށް އާމްދަނީ އިތުރު ކުރެވޭނެ މަގުތައް ތަނަވަސް ކުރުމުގެ މަސައްކަތް އެ ކުންފުނިން ދަނީ ކުރަމުންނެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
އާމްދަނީ
11 July 2024
ހަރަދާއި އެއްވަރަށް އާމްދަނީ ވެއްދުން އެއީ މަސައްކަތަކަށް ވާން ވީ ކަމަކީ.. ކޮންމެ މީހަކަށް ވެސް ހަރަދު ކުނޑަ ކުރެވިދާނެ.