އާ ސަހަރާ މިސްކިތް ނިންމަން އެހީ ދިން މީހުންނަށް ރައީސްގެ ޝުކުރު

މިއަދު ހުޅުވި އާ ސަހަރާ މިސްކިތް މަރާމާތު ކުރުމަށް ހިލޭ އެހީ ދިން މީހުންނަށް ރައީސް ޑރ. މުހައްމަދު މުއިއްޒު ޝުކުރު އަދާ ކުރައްވައިފި އެވެ.

އާ ސަހަރާގެ މަރާމާތުގެ މަސައްކަތް އެއްކޮށް ނިންމައި، މިއަދުގެ ހުކުރު ނަމާދަށް އެތަން ހުޅުއްވައިދެއްވީ ރައީސް މުއިއްޒެވެ. އަދި ހުކުރު ނަމާދަށްފަހު ނޫސްވެރިންނާ ބައްދަލު ކުރައްވައި، ރައީސް މުއިއްޒު ވިދާޅުވީ އެތަން މަރާމާތު ކޮށްފައިވަނީ އެތަނަށް ގެންނަން ބޭނުންވި ހުރިހާ ބަދަލުތަކެއް ގެނައުމަށްފަހު ކަމަށެވެ.

"ހަގީގަތަކަށް ހެދުނީމަ ވަރަށް އުފާވޭ. އާއިލާއަށް އެންމެ ހިތްދަތި ވަގުތުގައި. ހަމަޖެހިލައިގެން ތިބެވޭނެ،" ރައިސް ވިދާޅުވި އެވެ.

އާ ސަހަރާގެ މިސްކިތުގެ ޖާގަ ބޮޑުކޮށް، އެހެން ހިދުމަތްތައް ދެވޭނެ ޖާގަ ތަނަވަސް ކުރުމުގެ މަސައްކަތް ފެށީ ރައީސް މުއިއްޒު މާލޭ ސިޓީގެ މޭޔަރަކަށް ހުންނެވި ދުވަސްވަރު މިދިޔަ އަހަރުގެ ޖޫން މަހު އެވެ. އޭގެ ފަހުން މޭޔަރަކަށް އާދަމް އާޒިމް ވަޑައިގަތުމަށްފަހު ވެސް އެ މަސައްކަތް ހުއްޓުމެއް ނެތި ކުރައްވާފައިވާތީ އެކަމަށް ރައީސް ޝުކުރު އަދާ ކުރެއްވި އެވެ. އަދި މިސްކިތް ނިންމުމަށް ވަރަށް ގިނަ ބައެއްގެ ހިލޭ އެހީ ލިބުނު ކަމަށް ރައީސް ވިދާޅުވި އެވެ. އެހެންވެ ރައީސް ވަނީ އެ އެންމެންނަށް ވެސް ޝުކުރު އަދާ ކުރައްވައިފަ އެވެ.

މަރާމާތަށް ފަހު ހުޅުވި އެ މިސްކިތުގެ ޖާގަ މިހާރު ވަނީ ވަރަށް ބޮޑަށް އިތުރު ކޮށްފަ އެވެ. އަދި ހިނަވާ ތަނުގެ ޖާގަ ބޮޑުކޮށް، ސަހަރާއަށް ދާ އާންމުންނަށް އިށީނދެގެން ތިބެވޭނެ ބޮޑު ސަރަހައްދެއް ވެސް އިމާރާތުގެ ފުރަތަމަ ފަންގިފިލާގައި ވަނީ ގާއިމްކޮށްފަ އެވެ.

މީގެ އިތުރުން ހާއްސަ އެހީއަށް ބޭނުންވާ މީހުންނަށް ހާއްސަ ފާހާނާއަކާއި އާންމުންނަށް ބޭނުން ކުރެވޭނެ ފާހަނާއެއް ވެސް ސަހަރާގައި މިހާރު ހުންނާނެ އެވެ.