ބައްސާމް އެދުނު ގޮތަށް އެޕާޓްމަންޓް ހަވާލުކުރާ މުއްދަތު ފަސްކޮށްދީފި

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާ ބޭނުންކޮށްގެން އެ އެސޯސިއޭޝަނުގެ ކުރީގެ ރައީސް ބައްސާމް އަދީލް ޖަލީލް، ހުޅުމާލެއިން ގަނެފައިވާ ކަމަށް ތުހުމަތުކުރެވޭ ދެ އެޕާޓްމަންޓް ފުލުހުންނަށް ހަވާލުކުރުމަށް ދިން މުއްދަތު، އޭނާ އެދުނު ގޮތަށް ފަސްކޮށްދީފި އެވެ.

އަމީން އެވެނިއު އިން ބައްސާމް ގަތް އެޕާޓްމަންޓްތައް ފުލުހުންނާ ހަވާލުކުރަން ދިން މުއްދަތު މިއަދުގެ ނިޔަލަށް ހަމަވެ އެވެ. އެހެންވެ، އެ މުއްދަތު މިމަހުގެ ނިޔަލަށް އިތުރުކޮށްދޭން ބައްސާމްގެ ވަކީލުންގެ ފަރާތުން ފުލުހުންނަށް ވަނީ ސިޓީއެއް ފޮނުވައިފަ އެވެ.

އެ މައްސަލާގައި ފުލުހުން ބުނީ ސިޓީގައި ރިއާޔަތްކޮށްފައިވާ ކަންކަމަށް ބަލައި ބައްސާމް އެދިފައިވާ މުއްދަތު ދޭން ނިންމާފައިވާ ކަމަށެވެ.

"ހާލަތަށް ރިއާޔަތްކޮށް، ސިޓީގައި އެދިފައިވާ މުއްދަތަށް ފުރުސަތު ދެވިފައިވާކަން ލިޔުމަކުން ވަނީ އަންގާފައި،" ފުލުހުންގެ މީޑިއާ ގްރޫޕަށް ފޮނުވި މެސެޖުގައިވެ އެވެ.

ފުލުހުން ކުރިން ބުނި ގޮތުގައި މިއަދުގެ ނިޔަލަށް އެޕާޓްމަންޓް ހަވާލުނުކޮށްފި ނަމަ، ކްރިމިނަލް ކޯޓުން މިދިޔަ މަހުގެ 28 ގައި ނެރުނު އަމުރާ އެއްގޮތަށް އެ ދެ ތަން ވެސް ފުލުުހުންގެ ބެލުމުގެ ދަށަށް ގެންދިއުމަށް ކުރަން ޖެހޭ މަސައްކަތް ކުރާނެ އެވެ.

Apartment havaalu kuran dhin muhdhathu ithuru kohdheyn Bassaam edhijje

The most trusted news source in the Maldives

Mihaaru

މި ދެ އެޕާޓްމަންޓް ބައްސާމް ގަނެފައި ވަނީ ކޮވިޑުގެ ދުވަސްވަރު، ފުޓްބޯޅަ ކްލަބްތަކަށް ދިމާވި މާލީ ހާލަތުން އަރައިގަތުމަށް ފީފާ އިން އެފްއޭއެމްއަށް ދޫކުރި ލޯނު ފައިސާ އިންނެވެ. ފުލުހުން ކުރިން ބުނެފައިވާ ގޮތުގައި އެ ދެ ޕެންޓްހައުސް ގަތުމަށް ބައްސާމް ވަނީ އެފްއޭއެމްގެ ފައިސާ އިން އެއް މިލިއަން އެމެރިކާ ޑޮލަރު އަމީން ކޮންސްޓްރަކްޝަނަށް ދައްކައިފަ އެވެ. އެ ޑޮލަރަށްވާ ދިވެހި ރުފިޔާ އަމިން އިން އެފްއޭއެމަށް ދައްކާފައިނުވާ ކަމަށާއި ނަމަވެސް ފައިސާ ދެއްކިކަމަށް ހެދުމަށް ލިޔެކިޔުން ތައްޔާރުކޮށްފައިވާ ކަމަށް ފުލުހުން ބުނެފައިވެ އެވެ.

އެ ފައިސާ ލިބުނު ކަމަށް ހެދުމަށް އެފްއޭއެމުން ވެސް އެހެން ކުންފުންޏަކުން ލޯނެއް ނަގާފައިވާ ކަމަށާއި އެ އަދަދާއި، އަމިން އިން އެފްއޭއެމަށް ފައިސާ ދެއްކި ކަމަށް ބުނެ ތައްޔާރުކޮށްފައިވާ ރިސިޕްޓްތަކުގެ އަދަދާ ދިމާވާ ކަމަށް ވެސް ފުލުހުން ބުންޏެވެ. އެހެންވެ، ފުލުހުން ބުނި ގޮތުގައި ބެލެވެނީ އެފްއޭއެމުން މަސައްކަތް ކޮށްފައި ވަނީ ބައްސާމް އެޕާޓްމަންޓް ގަތުމަށް އަމީނަށް ޑޮލަރުން ދެއްކި ފައިސާއަކީ ޑޮލަރު މާރުކުރަން ދިން ފައިސާއެއްކަން ދެއްކުމަށެވެ.

އެ މައްސަލާގައި މިދިޔަ މަހު ފުލުހުން ވަނީ ބައްސާމްގެ މައްޗަށް ދައުވާކޮށްދޭން ވެސް ޕީޖީ އޮފީހަށް ފޮނުވައިފަ އެވެ. އަދި އަމީން ކޮންސްޓްރަކްޝަނާއި އެފްއޭއެމްގެ އޭރުގެ ފައިނޭންސް ހެޑް މުހައްމަދު އަގީލާއި އެ އެސޯސިއޭޝަނުގައި އޭރު މަސައްކަތްކުރި ހަސަން ވަހީދަށް ވެސް ދައުވާކޮށްދޭން އެދިފައިވެ އެވެ.