އޭއެފްސީ ޗެމްޕިއަންސް ލީގުން މޯހަން ބަގާން ބޭރުކޮށްފި

އޭއެފްސީ ޗެމްޕިއަންސް ލީގުގެ ދެ ވަނަ ޑިވިޝަނުގައި ވާދަކުރާ އިންޑިއާގެ މޯހަން ބަގާން އިން ގުރޫޕް ސްޓޭޖުގެ މެޗެއް ކުޅެން އީރާނަށް ދަތުރުކުރަން ދެކޮޅު ހެދުމުން އޭއެފްސީން އެ ޓީމު މުބާރާތުން ބޭރުކޮށްފި އެވެ.

އީރާނުގެ ޓްރެކްޓާ އެސްސީ އާ ދެކޮޅަށް ކުޅެން އޮތް މެޗަށް އެ ގައުމަށް ދާން މޯހަން ބަގާންގެ ކުޅުންތެރިން ދެކޮޅު ހެދި އިރު، އޮތީ ފްލައިޓް ޓިކެޓްް ނަގައި، ހުރުން ވެސް ހަމަޖައްސައިފަ އެވެ. ނަމަވެސް ފަހު ވަގުތު ނުދާން ނިންމީ، ޓީމު މެމްބަރުންގެ ފުރާނައަށް ނުރައްކާވެދާނެ ހާލަތެއް ދިމާވެދާނެ ކަމަށް ބަލައިގެންނެވެ.

މެޗު ތާވަލު ކުރި ދުވަހުގެ ކުރީ ދުވަހު، އިރާނުން ވަނީ އިޒްރޭލަށް ވައިގެ ހަމަލާގައި 180 އަށް ވުރެ ގިނަ ބެލިސްޓިކް މިސައިލް ފޮނުވާލައިފަ އެވެ.

މޯހަން ބަގާން ވަނީ ފުރަތަމަ މެޗުގައި ތަޖުކިސްތާންގެ ރަވްޝަން ކުލޯބް އާ އެއްވަރު ކޮށްފަ އެވެ. ނަމަވެސް ކްލަބަށް އަދަބު ދިނުމާ ގުޅިގެން، އެ ޓީމު ކުޅުނު އެއްވެސް މެޗެއްގެ ނަތީޖާ، ގުރޫޕް ސްޓޭޖްގެ ޓީމުތައް ރޭންކް ކުރަން ނުގުނާނެ އެވެ.

ޔޫރަޕެކޭ އެއްގޮތަށް، އޭޝިއާގެ ކްލަބް ފުޓްބޯޅައިގެ ފޯމެޓަށް ވެސް މި ސީޒަންގައި މިވަނީ ބަދަލުތަކެއް ގެނެސްފަ އެވެ. ޔޫއެފާ ޗެމްޕިއަންސް ލީގު ސްޓައިލަށް އޭއެފްސީ ޗެމްޕިއަންސް ލީގު އެލީޓް ކުރިއަށް ގެންދާއިރު، ދެ ވަނަ ފަންތީގެ ޗެމްޕިއަންސް ލީގު 2 ކުރިއަށް ދަނީ، ގުރޫޕް ސްޓޭޖުގައި ކޮންމެ ޓީމަކާ ދެކޮޅަށް ހޯމް އެންޑް އަވޭ އުސޫލުން، ދެ މެޗު ކުޅޭ ފޯމެޓަށެވެ.

އަދި ޗެލެންޖް ލީގު ނަމުގައި ތިން ވަނަ ފަންތީގެ މުބާރާތެއް އުފައްދައި، ކުރިއަށް ގެންދަނީ ގުރޫޕް ސްޓޭޖު ސެންޓްރަލައިޒް ކޮށްގެން، ކޮންމެ ޓީމަކާ ދެކޮޅަށް އެއް މެޗު ކުޅޭގޮތަށެވެ.

މި ފޯމެޓުގައި އިންޑިއާ ފިޔަވައި، ރާއްޖެ އާއި ދެކުނު އޭޝިއާ ސަރަހައްދުގެ ކްލަބްތަކަށް ޖާގަ ލިބެނީ ޗެލެންޖް ލީގުންނެވެ. މިއަހަރުގެ ޗެލެންޖް ލީގުގައި ރާއްޖެ ތަމްސީލުކުރަނީ މާޒިޔާ އެވެ.