އެމްއެމްސީގެ ރައީސް މުސްތަފާ ޕީއެސްއެމުން ވަކިކޮށްފި

މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސްގެ މަގާމުގައި ހުންނެވި ޕަބްލިކް ސާވިސް މީޑިއާ (ޕީއެސްއެމް) ގެ އަހުމަދު މުސްތަފާ އެ ކުންފުނިން މިރޭ ވަކިކޮށްފި އެވެ.

ދައުލަތުގެ މީޑިއާ ޕީއެސްއެމްގެ އިސްވެރިއަކު މިރޭ ވިދާޅުޥީ، އެ ކުންފުނީގެ ޒިންމާދާރު މަގާމެއްގައި ހުންނެވި ބޭފުޅަކު އަމަލު ކުރެއްވި ގޮތަކާ ހެދި ފިޔަވަޅު އަޅާފައިވާނެ ކަމަށެވެ. އެ ފިޔަވަޅެއް ރަސްމީކޮށް ވިދާޅެެއް ނުވި އެވެ.

ނަމަވެސް ޕީއެސްއެމްގެ ނިއުސް އޮފަރޭޝަންސްގެ މަގާމުގައި ހުންނެވި މުސްތަފާ އެ ކުންފުނިން ވަކިކުރިކަން "މިހާރު" އަށް ވަނީ ކަށަވަރުވެފަ އެވެ. އެއީ ޓީވީއެމް/ޕީއެސްއެމްގައި މަސައްކަތް ކުރައްވާތާ 30 އަހަރަށް ވުރެ ގިނަ ދުވަސް ވެފައިވާ ބޭފުޅެކެވެ.

މުސްތަފާ ޕީއެސްއެމުން ވަކިކުރީ ކޮން ސަބަބަކާ ހެދިކަން އެ ކުންފުނިން ނުބުންޏަސް ރޭ ބޭއްވި އެމްއެމްސީ އެވޯޑު ހަފްލާގައި ތަހުގީގީ ދާއިރާއިން ނޫސްވެރިކަމުގެ އިނާމު ލިބުނު "އަދަދު" އޮންލައިންގެ "ސްކީލާން" ޑޮކިއުމެންޓްރީ ޕީއެސްއެމުން ލައިވްކޮށް ދައްކަން ޖެހުނު މައްސަލަ ވަނީ ބޮޑުވެފަ އެވެ. އެއީ ރައީސް ޑރ. މުހައްމަދު މުއިއްޒުގެ ދޮންމަންމާފުޅު ސްކީލާން އެ މަނިކުފާނަށް ބޮޑެތި ތުހުމަތެއް ކުރައްވާފައިވާ ޑޮކިއުމަންޓްރީއެކެވެ.

މިދިޔަ އަހަރުގެ ރިޔާސީ އިންތިހާބުގެ ކެމްޕެއިން ތެރޭގައި ނެރުނު އެ ޑޮކިއުމެންޓްރީގައި ކުރާ ތުހުމަތުތައް ރައީސް މުއިއްޒުގެ ފަރާތްޕުޅުން އޭރު ވެސް ވަނީ ދޮގު ކުރައްވައިފަ އެވެ.

ރައީސް މުއިއްޒުގެ އަނބިކަނބަލުން ސާޖިދާ މުހައްމަދު އޭރު ވެސް ވިދާޅުވެފައި ވަނީ ފެމިލީ ކޯޓުން މުދާ ބެހީ ރައީސްގެ ދޮންމަންމާފުޅު އެދުނު ގޮތަށް ކަމަށެވެ. ފެމެލީ ކޯޓުގައި ސްކީލަން އެދިވަޑައިގެންނެވި ގޮތަށް އަދި މުއިއްޒު ގާތުގައި އެދިވަޑައިގެންނެވި ގޮތަށް ސްކީލަން ބޭނުންފުޅުވި ހުރިހާ އެއްޗެއް ވެސް އޭނާ އަށް ލިބިވަޑައިގެންނެވި ކަމަށް ސާޖިދާ ވިދާޅުވެފައި ވެ އެވެ.

Family court inn mudhaa behee Muizzu ge Dhonmmaafulhu beynunvi gothah: Sajidha

The most trusted news source in the Maldives

Mihaaru

"އެ ބޭފުޅާ އެދުނީ އެންމެ ގޮތަކަށް، އެއީ ލަންކާގައި ހުރި ހުރިހާ އެއްޗެއް އަދި ބޭންކް އޮފް ސިލޯނުގައި ހުރި ހުރިހާ ލާރިއެއް ތިމަންނައަށް ދޭށޭ،" ރައީސް މުއިއްޒުގެ ރިޔާސީ ކެމްޕެއިނަށް މިދިޔަ އަހަރުގެ ސެޕްޓެމްބަރު 28 ގައި ދ. މީދޫގައި ބޭއްވި ޖަލްސާއެއްގައި ސާޖިދާ ވިދާޅުވެފައި ވެ އެވެ.

އެމްއެމްސީގެ އެވޯޑް ހަފްލާ ރޭ ލައިވްކުރި އިރު އެ ވީޑިއޯ ދައްކާފައި ވާއިރު ޕީއެސްއެމްގެ ކޮންޓެންޓް އުސޫލާ ހިލާފް އެއްޗެއް ޕީއެސްއެމުން ދެއްކުމަކީ ދުރާލައި ރާވައިގެން އެންގުމަކާ ނުލައި އެމްއެމްސީން ކުރި ކަމެއްގެ ގޮތުގައި ތުހުމަތުކޮށް ޕީއެސްއެމުން މިރޭ ވަނީ ބަޔާނެއް ނެރެފަ އެވެ.

އެ ބަޔާނުގައި ބުނީ އެ ހަފްލާ ތެރޭގައި ޕީއެސްއެމްގެ އެޑިޓޯރިއަލް ކޮންޓެންޓާ ހިލާފަށް އަދި ނޫސްވެރިކަމުގެ އާންމު މިންގަނޑުތަކާ ހިލާފު ވީޑިއޯއެއް ދެއްކި ކަމަށެވެ.

އެވޯޑު ލިބޭ ކެޓަގަރީތަކާއި އެ ކެޓަގަރީތައް ނޮމިނޭޓް ވެފައިވާ ނޫސްވެރިންގެ އެވޯޑު ލިބޭ ނޫސްވެރިން ދުރާލައި އެމްއެމްސީގެ އިސް ވެރިންނަށް އެނގޭނެ ކަމަށާއި ޕީއެސްއެމްގެ ލައިވް ކަވަރޭޖްގައި ދައްކާ ވީޑިއޯތަކަކީ އެޑިޓޯރިއަލް އަށް ފެތޭ ކޮންޓެންޓަށް ވާން ޖެހޭނެ ކަމަށް ވެސް ޕީއެސްއެމުން ބުންޏެވެ.

"ޕީއެސްއެމްއަށް ކުރިން އެންގުމެއް ނެތި ކުއްލިއަކަށް ހަފްލާ ތެރޭގައި އިސްވެ ދެންނެވުނު ވީޑިއޯ ދެއްކުމަކީ ގަސްތުގައި ދުރާލާ ރާވައިގެން ޕީއެސްއެމްގެ އެޑިޓޯރިއަލްގެ އުސޫލާ ހިލާފަށް ކޮންޓެންޓް ޕީއެސްއެމްއިން ދެއްކުމަށް އެމްއެމްސީން ކޮށްފައިވާ ކަމެއް ކަމަށް މި ކުންފުނިން ދެކޭތީ އެކަން ހަރުކަށި އިބާރާތުން ކުއްވެރި ކުރަމެވެ،" ބަޔާނުގައިވެ އެވެ.