ހަމަލާތައް ހުއްޓާލުމުގެ ކޮންމެ ހުށަހެޅުމަކަށް ވެސް ހަމާސް އޮތީ ވާހަކަ ދައްކާ ގޮތަށް

ފަލަސްތީނުގެ ޣައްޒާގައި ހަމަލާތައް ހުއްޓާލުމުގެ މަޝްވަރާތަކަށް ހަމާސްގެ އޮފިޝަލުން އިއްޔެ މިސްރަށް ވަޑައިގެންފައި ވާއިރު އެ ޖަމާއަތް އޮތީ އެކަމާ ގުޅޭ ހުރިހާ ހިޔާލުތަކާއި ހުށަހެޅުންތަކަކާ ގުޅޭ ގޮތުން ވެސް މަޝްވަރާކުރަން ތައްޔާރަށް ކަމަށް ހަމާސްގެ އިން ބުނެފި އެވެ.

ފަލަސްތީނުގެ މިިނިވަންކަމަށް މަސައްކަތްކުރާ ހަމާސް ޖަމާއަތާއި ފަލަސްތީނުގެ ބިންތައް ހިފައިގެން ތިބި އިޒްރޭލާ ދެމެދު މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހުން ފެށިގެން ބަދަލުކުރަމުން ގެންދާ ހަމަލާތައް ހުއްޓުމަކަށް ގެނެވޭތޯ މަޝްވަރާކުރާތާ ވެސް އަހަރެއް ވެއްޖެ އެވެ. އެކަމަކު ގަތަރުން މެދުވެރިއެއްގެ ދައުރު އަދާކޮށްގެން މިސްރާއި އެމެރިކާގެ ބައިވެރިވުމާ އެކު ދެއްކި ވާހަކަަތަކުން އަދި މިހާތަނަށް ހަމަލާތައް މެދުކަނޑާލީ އެންމެ ހަފްތާއަކަށެވެ.

ނަން ހާމަ ނުކުރާ ގޮތަށް އޭއެފްޕީއާ ވާހަކަ ދެއްކި ހަމާސްގެ އޮފިޝަލަކު ވިދާޅުވީ އަލުން މަޝްވަރާތައް ފަށާއިރު ހަމަލާތައް ހުއްޓާލުމާ ގުޅޭ ގޮތުން އާ ހުށަހެޅުމެއް ލިބިފައި ނެތް ކަމަށެވެ. އެކަމަކު އޭނާ ވިދާޅުވީ ހަމާސް އޮތީ ހަމަލާތައް ހުއްޓުމަކަށް ގެނެވޭނެ ހުރިހާ ހިޔާލުތަަކަކަށް ވެސް ހުޅުވިފައި ކަމަށެވެ. އެކަމަކު އިޒްރޭލު ސިފައިން ޣައްޒާއިން ފައިބަން ޖެހޭނެ ކަމަށާއި ހަމަލާތަކާ ހެދި ޣައްޒާގެ ވަޒަނުން ބޭރުކޮށްލި ހުރިހާ އާންމުންނަށް އެ މީހުންގެ ގެދޮރަށް އެނބުރި ދެވެން ޖެހޭނެ ކަމަށް އޮފިޝަލް ވިދާޅުވި އެވެ. މީގެ އިތުރުން، ހަމަލާތަކުގެ ސަބަބުން ހާލުގައި ޖެހިފައިވާ މީހުންނަށް ބޭނުންވާ އެހީގެ ސާމާނު ޣައްޒާއަށް އެތެރެކުރުމުގެ ފުރުސަތު ވެސް ދޭން ޖެހޭނެ ކަމަށާއި ރަހީނުންނާއި ގައިދީން މިނިވަންކުރުމުގައި ކުރިއަށްވުރެ ސީރިއަސް މަޝްވަރާތަކެއް ބޭނުންވާ ކަމަށް ވެސް އޮފިޝަލް ވިދާޅުވި އެވެ.

ހަމާސް އާއި އިޒްރޭލާ ދެމެދު އަލުން މަޝްވަރާތައް މި ފަށަނީ ލުބްނާންގެ ހިޒްބުﷲ ޖަމާއަތާއި އިޒްރޭލާ ދެމެދު ހަމަލާ ބަދަލުކުރުން ހުއްޓާލުމުގެ އެއްބަސްވުމެއް ހަދައި ހަމަލާތައް ހުއްޓުމަކަށް ގެނައުމާ އެކުގަ އެވެ.

ލުބްނާނުގައި ހަމަލާތައް ހުއްޓުމަކަށް ގެނައުމާ އެކު އެމެރިކާއިން ވަނީ ޣައްޒާގައި ހަމަލާތައް ހުއްޓާލުމަށާއި މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހު ހަމާސް އިން ރަހީނުކުރި އިޒްރޭލު މީހުން މިނިވަންކުރުމަށް ޑިޕްލޮމެޓިކް އާ މަސައްކަތެއް ގަތަރާއި ތުރުކީ އަދި މިސްރާ އެކު ފެށިކަން އިއުލާނުކޮށްފަ އެވެ.