ޓްރީ ޓޮޕުން ލ. އަތޮޅުގައި ހެލްތު ކޭމްޕެއް ބާއްވައިފި

ޓްރީ ޓޮޕް ހޮސްޕިޓަލުން ލ. ގަމުގައި ހެލްތު ކޭމްޕެއް ބާއްވައިފި އެވެ.

މިއީ، އެ ހޮސްޕިޓަލުން މި އަހަރު ބޭއްވި ތިންވަނަ ހެލްތު ކޭމްޕެވެ. މި ކޭމްޕް ބޭއްވީ، ގަން ރީޖަނަލް ހޮސްޕިޓަލާއި ލ. އަތޮޅު ކައުންސިލް އާއި ގުޅިގެންނެވެ.

މި ކޭމްޕުން ލ. ގަމާއި އެ ސަރަހައްދުގެ ރަށްތަކުގެ ރައްޔިތުންނަށް ބޭނުންވެފައިވާ ސިއްހީ މައްސަލަތަކަށް ޓްރީ ޓޮޕްގެ ކަމާ ބެހޭ ހާއްސަ ޑޮކްޓަރުންގެ އެހީތެރިކަމާ އެކު ފަރުވާ ހޯދުމުގެ ފުރުސަތު ވަނީ ލިބިފަ އެވެ. މި ކޭމްޕުގައި، އެކި ބަލިތަކުގެ ހާއްސަ ޑޮކްޓަރުންނަށް ދެއްކުމުގެ އިތުރުން ލާމު އަތޮޅުގެ ރައްޔިތުންނަށް ސިއްހީ ސްކްރީނިންތައް ވަނީ ފޯރުކޮށްދީފަ އެވެ. އަދި އާއްމު ސިއްހަތާ ގުޅޭ މައުލޫމާތުތައް މި ކޭމްޕުން ވަނީ ފޯރުކޮށްދީފަ އެވެ.

ހެލްތު ކޭމްޕުގެ އިތުރުން ޓްރީ ޓޮޕް ހޮސްޕިޓަލްގެ ޑައިޓީޝަން ރީބާ ވަނީ ސިއްހަތަށް ފައިދާ ހުރި ކާނާގެ މުހިންމުކަމާ ބެހޭ ގޮތުން މައުލޫމާތު ދިނުމުގެ ސެޝަންތަކެއް ކުރިއަށް ގެންގޮސްފަ އެވެ. މި ސެޝަންތަމަށް ހޫނު ތަރުހީބެއް ލިބިފައިވާ ކަމަށް ޓްރީ ޓޮޕުން ބުންޏެވެ.

ޓްރީ ޓޮޕުން ބުނީ ފުރަތަމަ ސެޝަނުގައި ކާނާގެ ދައުރާ ބެހޭ ގޮތުން ގިނަ މައުލޫމާތުތަކެއް ދީފައިވާ ކަމަށެވެ. އަދި ދެވަނަ ސެޝަނުގައި ލ. ހަމަދު ސްކޫލުގެ ދަރިވަރުންނަށް ސިއްހަތަށް ފައިދާ ހުރި ކެއުމުގެ އާދަތަކާ ބެހޭ ގޮތުން މައުލޫމާތު ދީ، ސިއްހަތައް ފައިދާ ހުރި ކެއުން ހިޔާރު ކުރުމަށް ހިތްވަރުދީފައިވާ ކަމަށެވެ. އޭގެ އިތުރުން ވަކިވަކިން އެކި ފަރާތްތަކާއި ބައްދަލުކޮށް ކެއުމުގެ އާދަތަކާ ބެހޭ ގޮތުން ވާހަކަދައްކަން ބޭނުންވި ގިނަ ބަޔަކަށް އެފުރުސަތު ވެސް ދީފައިވާ ކަމަށް އެ ހޮސްޕިޓަލުން ބުންޏެވެ.

ޓްރީ ޓޮޕް ހޮސްޕިޓަލުން ލ. ރީޖަނަލް ހޮސްޕިޓަލާއި އަތޮޅު ކައުންސިލާ އެކު ސިއްހީ ހިދުމަތްތަކާ ގުޅޭ ގޮތުން ބައްދަލުވުމެއް ވެސް ބޭއްވި އެވެ. މި ބައްދަލުވުމުގައި ދެ ފަރާތުގެ ތަޖުރިބާތަކާއި ގެންގުޅޭ އުސޫލުތައް ހިއްސާކޮށް މިހާރަށް ވުރެ ފުރިހަމައަށް ހިދުމަތްތައް ފޯރުކޮށްދިނުމާ ގުޅޭ ގޮތުން މަޝްވަރާ ކުރި ކަމަށް އެ ހޮސްޕިޓަލުން ބުންޏެވެ.

މި ސިއްހީ ކޭމްޕުގެ ބޭނުމަކީ ހޮސްޕިޓަލަށް ދިއުމުގައި ދަތިތައް ހުރި ފަރާތްތަކަށް އެ ހޮސްޕިޓަލުގެ ހިދުމަތްތައް ފޯރުކޮށްދިނުމެވެ. އަދި ޒުވާނުންނަށް، ދުޅަހެޔޮ ދިރިއުޅުމުގެ ވައްޓަފާޅިތަކާއި ބަލިތަކުން ރައްކާތެރިވުމުގެ ފިޔަވަޅުތަކާއި ބަލިތައް އަވަހަށް ދެނެގަތުމާ ބެހޭ ގޮތުން މުޖުތަމައުގައި ހޭލުންތެރިކަން އިތުރުކުރުވުމެވެ.

ޓްރީ ޓޮޕް ހޮސްޕިޓަލްގެ ސީއީއޯ ޑރ. ސްރީވަތުސަން ސްރީދާ ޖީ ވިދާޅުވި ގޮތުގައި އެ ހޮސްޕިޓަލުގެ އަޒާމަކީ ކޮންމެ ދިވެއްސަކަށް ވެސް، ފަސޭހައިން ލިބެން ހުރި، ފެންވަރު ރަނގަޅު ސިއްހީ ހިދުމަތް ފޯރުކޮށްދިނުމެވެ. އަދި ސިއްހީ ކޭމްޕުތަކުގެ ތެރެއިން ފަރުވާ ދިނުމުގެ އިތުރުން، އިތުރަށް ސިއްހީ ހޭލުންތެރިކަން ލިބިފައިވާ މުޖުތަމައުއެއް މި ކޭމްޕުތަކުގެ ތެރެއިން ބިނާ ކުރުމަކީ އަމާޒެއް ކަމަށް ވިދާޅުވި އެވެ.

ލ. ގަމުގައި ބޭއްވި ހެލްތު ކޭމްޕުގައި ތިންސަތޭކަ އަށް ވުރެ ގިނަ މީހުން ބައިވެރިވެ ހިދުމަތް ހޯދި އެވެ. މި އަހަރު މީގެ ކުރިން ބޭއްވި ދެ ހެލްތު ކޭމްޕާ އެކު، ޓްރީ ޓޮޕް ހޮސްޕިޓަލުން މި އަހަރުގެ ތިން ކޭމްޕުން ގާތްގަނޑަކަށް 1000 ދިވެހިންނަށް ރަށުގައި ތިބެގެން ސިއްހީ ހިދުމަތް ފޯރުކޮށްދީފައިވާ ކަން އެ ހޮސްޕިޓަލް އިން ފާހަގަކުރެ އެވެ.