ދިރާގުގެ 2025 ކަލަންޑަރު: "މިނިވަންކަން މަތީ އަބަދަށް"

އެޗްޑީސީގެ މެނޭޖިން ޑިރެކްޓަރު މައުރޫފް ޖަމީލް، ދިރާގުގެ ކަލަންޑަރު ލޯންޗްކޮށްދެއްވަނީ.

އައިޝަތު ޖަޒްލީ، މިހާރު

29 ޑިސެމްބަރ 2024 - 10:49

ދިރާގުން 2025 ވަނަ އަހަރުގެ ކަލަންޑަރު ލޯންޗުކޮށްފި އެވެ.

ކޮންމެ އަހަރަކު ވެސް ތަފާތުކޮށް ނެރޭ ދިރާގުގެ ކަލަންޑަރުގެ މި ފަހަރުގެ ތީމެއްގެ ގޮތުގައި ކަނޑައަޅާފައި ވަނީ "މިނިވަންކަން މަތީ އަބަދަށް" މި ތީމެވެ.

ދިރާގުން ބުނި ގޮތުގައި އެ ތީމު ހާއްސަ ވަނީ، 2025 ވަނަ އަހަރު ފާހަގަކުރާ 60 ވަނަ މިނިވަން ދުވަހާ ގުޅުވައިގެން ކަލަންޑަރު ފަރުމާކޮށްފައި ވާތީ އެވެ.

އެ ކަލަންޑަރުގެ ކޮންމެ މަހެއްގައި ވެސް ދިވެހި ސަގާފަތާއި އާދަކާދަތަކާ ގުޅުވައި، ގައުމިއްޔަތު ރަމްޒުކޮށްދޭ ނިޝާނެއް ވަނީ ހިމަނައިފަ އެވެ.

ދިރާގުން ބުނީ ކޮންމެ މަހެއްގައި ވެސް ކަލަންޑަރުން ދައްކުވައިދޭ ނިޝާނާ ބެހޭ ވީޑިއޯއެއް ނެރޭނެ ކަމަށެވެ. އެ ވީޑިއޯ އިން އެ ކަމަކާ ގުޅޭ އިތުރު މައުލޫމާތު ލިބޭނެ ކަމަށާއި ދިވެހި ތާރީހާއި ތަރިކަ އިތުރަށް އުނގެނުމަށް އެއީ ބޭނުންތެރި ވަސީލަތަކަށް ވާނެ ކަމަށް ވެސް ދިރާގުން ބުންޏެވެ.

ދިރާގުގެ ކަލަންޑަރު، އެޗްޑިސީގެ ޑިރެކްޓަރުންގެ ބޯޑުގެ ޗެއާމަން ނާސިފް ނެރެދެއްވަނީ.

ދިރާގުގެ 2025ގެ ކަލަންޑަރު ލޯންޗުކޮށްދެއްވީ ހުޅުމާލޭގެ ރައްޔިތުންނަށް ދެމުން އަންނަ ހިދުމަތް އިތުރަށް ހަރުދަނާކުރުމަށް އެޗްޑީސީއާ އެކު ދިރާގު ގުޅިގެން ކުރަމުން އަންނަ މަސައްކަތްތަކާ ބެހޭ ގޮތުން ބޭއްވި ބައްދަލުވުމުގައި އެޗްޑީސީގެ މެނޭޖިން ޑިރެކްޓަރު، މުހައްމަދު މައުރޫފް ޖަމީލާއި އެޗްޑީސީގެ ޑިރެކްޓަރުންގެ ބޯޑުގެ ޗެއާމަން، އަހުމަދު ނާސިފް އެވެ.

އެ ކަލަންޑަރާ ގުޅޭ ގޮތުން ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއިލް ރަޝީދު ވިދާޅުވީ އެ ކަލަންޑަރު ފަރުމާކޮށްފައި ވަނީ ރާއްޖޭގެ ތާރީހު ރަމްޒުކޮށްދޭ ގޮތަށް ކަމަށެވެ.

"ރާއްޖޭގެ މިނިވަންކަމަށް 60 އަހަރު ފުރުމުގެ މުނާސަބަތުގައި، ދިރާގުގެ 2025 ވަނަ އަހަރުގެ ކަލަންޑަރު އިފްތިތާހުކުރުމަކީ އަޅުގަނޑުމެން ވަރަށް ފަހުރުވެރިވާ ކަމެއް. މި ކަލަންޑަރުން އަޅުގަނޑުމެންގެ ގައުމުގެ މިނިވަންކަމާއި މުއްސަނދި ތާރީހު ރަމްޒުކޮށްދޭ ނިޝާންތަކަށް އަލިއަޅުވާލައި، ދިވެހިންގެ ސަގާފަތާއި ހަރުދަނާކަމާއި އެއްބައިވަންތަކަން ދައްކުވައިދޭ،" އޭނާ ވިދާޅުވި އެވެ.

ދިރާގަކީ އެކި ތީމުތަކަށް ކޮންމެ އަހަރަކު ވެސް ކަލަންޑަރު ފަރުމާކޮށް ނެރޭ ކުންފުންޏެކެވެ. އެ ކުންފުނީގެ ކަލަންޑަރުތައް ފަރުމާކުރަނީ، އިނޮވޭޓިވް ތަފާތު ހިޔާލުތަކާ އެކުގަ އެވެ.