ޣައްޒާގައި މަހުގެ ބާވަތަކަށް ވެލާ

އިޒްރޭލުގެ ހަމަލާތަކާއި ހިސާރުގެ ސަބަބުން ހާލުގައި ޖެހި ކާބޯތަކެއްޗަށް ޖެހިފައިވާ ފަލަސްތީނުގެ ޣައްޒާގައި އޮއްޓަރު ހުރި ކާނާ ލިބުން ދަތިވެ އެންމެ ފަހުން ވެލާމަސް ކެއުން އާންމުވާން ފަށައިފި އެވެ.

ޣައްޒާއިން ބޮޑު އަގުގައި ނަމަވެސް ތަރުކާރީ އާއި މޭވާގެ ބާވަތްތައް ލިބުނަސް މަހުގެ ބާވަތްތައް ލިބުން ނާދިރެވެ. ކަނޑުގެ އައްސޭރީގައި އޮންނަ ޣައްޒާގައި މިހާރު ދަނީ ހަވާދުގެ ބާވަތްތަކާއި ފިޔަ އާއި ޓޮމާޓޯ އަދި އަސޭމިރުސް އަޅައިގެން ވެލާމަސް ކައްކައިގެން ކަމުންނެވެ.

"މި ކުދިން ވެލާ ދެކެ ބިރުގަނޭ. އަހަރެމެން އެ ކުދިން ކައިރީ މި ބުނަނީ މިއީ ހަމަ ޅަ ބަކަރީގެ މަސް ރަހަ ލާ އެއްޗެކޭ،" ދަރު އުނދުނަކަށް ތަވައެއް އުދައި އޭގައި ވެލާމަސް ހަދަން އިނދެގެން ވާހަކަ ދެއްކި މާޖިދާ ކަންއާން ބުންޏެވެ.

"ބައެއް ކުދިން މި ކެއި، އެކަމަކު ބައެއް ކުދިން ކާން އެއްބަހެއް ނުވި."

ހަމަލާތަކުގެ ސަބަބުން ގެދޮރު ގެއްލުމުން ޚާން ޔޫނިސްގެ ޓެންޓެއްގައި އުޅެމުންދާ 61 އަހަރުގެ މާޖިދާ މިއީ، ކާން ރަނގަޅު އެއްޗެއް ނެތުމުން ވެލާމަސް ކެއްކި ތިން ވަނަ ފަހަރެވެ.

އިޒްރޭލުން ޣައްޒާއަށް ހަމަލާ ދޭތާ 18 މަސް ދުވަސް ވެފައި ވާއިރު މިދިޔަ މަހުގެ ދެ ވަނަ ދުވަހުން ފެށިގެން ވަނީ ޣައްޒާގެ 2.4 މިލިއަނުގެ އާބާދީއަށް ބޭނުންވާ ކާނާ އާއި ބޭހާއި އެހެނިހެން އަސާސީ ތަކެތި ވެސް ވެއްދުން މަނާކޮށްފަ އެވެ. އިޒްރޭލުން ބުނަނީ އެހީގެ ސާމާނު ބޭނުންކުރަނީ ހަމާސް ޖަމާއަތުން ކަމަށެވެ. މިއީ އެ ޖަމާއަތުން ކަނޑައެޅިގެން އިންކާރުކުރާ ވާހަކައެކެވެ.

އެހީދޭ ބޮޑެތި 12 ޖަމިއްޔާއެއްގެ އިސްވެރިން ބުރާސްފަތި ދުވަހު އިންޒާރު ދެއްވާފައިވާ ގޮތުގައި ބަނޑަށްޖެހުމަކީ މިހާރު ޣައްޒާއަށް އޮތް ބިރެއް ނޫނެވެ. މިހާރުވެސް ބަނޑަށްޖެހިފައިވާ ކަމަށާއި މި ހާލަތު ޣައްޒާގެ އެކި ހިސާބުތަކަށް ހަލުވިކަމާ އެކު ފެތުރެމުންދާކަން ވަނީ ކަންބޮޑުވުމާ އެކު ހާމަކޮށްފަ އެވެ.

"ޣައްޒާއިން ނުކުމެވޭނެ ގޮތެއް ނެތް. މާރުކޭޓްތަކުގައި އެއްޗެއް ވެސް ނެތް،" މާޖިދާ ބުންޏެވެ.

"ކުޑަ ދެ ކޮތަޅުގެ ތަރުކާރީ މި ލިބެނީ 80 ޝެކެލްސް (22 ޑޮލަރު) އަށް. އެއްވެސް ބާވަތެއްގެ މަހެއް ނުލިބޭ."

ވެލަޔަކީ ނެތި ހިނގައިދާނެ ކަމުގެ ބިރު އޮތުމާ އެކު ބައިނަލްއަގުވާމީ ގޮތުން ހިމާޔަތްކޮށްފައިވާ އެއްޗެކެވެ. އެކަމަކު ޣައްޒާގެ މަސްވެރިން އަޅާ ދާތަކުގައި ޖެހޭ ވެލާ ކެއުމަށް ބޭނުންކޮށް އުޅެ އެވެ.

މަސްވެރިއެއް ކަމަށްވާ އަބްދުލްހަލީމް ކަންއާން ބުނީ "ވެލާމަސް ކެއުމަކީ ކުރަންޖެހިދާނެ ކަމެކޭ ދުވަހަކުވެސް ހިއެއް ނުކުރަން" ކަމަށެވެ.

"ހަނގުރާމަ ފެށުނުއިރު ކާބޯތަކެތީގެ ދަތިކަން ކުރިމަތިވި. ކާއެއްޗެއް ނެތް. އެހެންވީމާ [ވެލާމަހަކީ] ޕްރޮޓީން ލިބޭނެ އެހެން ވަސީލަތަކަށްވީ. މަސް، ކުކުޅު އަދި ތަރުކާރީއެއް ވެސް ނުލިބޭ."

އދ.ގެ އޮފީސް ފޯ ދަ ކޯޑިނޭޝަން އޮފް ހިއުމެނިޓޭރިއަން އެފެއާޒުން އިންޒާރު ދީފައިވާ ގޮތުގައި ޣައްޒާ މިހާރު އޮތީ އޮކްޓޫރު 7، 2023 ގައި އިޒްރޭލުން ހަމަލާތައް ދޭން ފެށި ފަހުން ހައިހޫނު ކަމުގެ ހާލަތު މިހާތަނަށް ގޯސް ނުވާ މިންވަރަކަށް ގޮސްފަ އެވެ. -- އޭއެފްޕީ