މެންޗެސްޓާ ޔުނައިޓެޑުގެ ކުރީގެ ކޯޗު ފާގަސަން (ވ) މައިކަލް ކެރިކާ އެކު.
20 މާޗް 2017 - 18:49
މެންޗެސްޓާ (މާޗް 20) – މެންޗެސްޓާ ޔުނައިޓެޑުގެ ތާރީހު ދުށް އެންމެ ކާމިޔާބު ކޯޗު އެލެކްސް ފާގަސަން ހާއްސަ މެޗެއްގައި އެ ޓީމަށް ކޯޗުކޮށްދޭ ގޮތަށް ހަމަޖެހިއްޖެ އެވެ.
ހަތަރު އަހަރަށް ފަހު ފާގަސަން އޯލްޑް ޓްރެފޯޑުގެ ބެންޗަށް ދާނީ ޖޫން 4 ވަނަ ދުވަހު ޔުނައިޓެޑުގެ މިޑްފީލްޑަރު މައިކަލް ކެރިކުގެ ޓެސްޓިމޯނިއަލް މެޗުގައި އެ ޓީމަށް ކޯޗުކޮށްދޭށެވެ. މި ޓީމަށް ކުޅޭނީ ފާގަސަންގެ އިރުޝާދުގެ ދަށުން 2008 ވަނަ އަހަރުގެ ޗެމްޕިއަންސް ލީގު އުފުލާލި ޔުނައިޓެޑުގެ ކުޅުންތެރިންނެވެ. އަނެއްކޮޅުން ވާދަކުރާ މައިކަލް ކެރިކުގެ އޯލް ސްޓާ ޓީމަށް ކޯޗުކޮށްދޭނީ، ކެރިކަށް ވެސްޓް ހޭމް ޔުނައިޓެޑުގައި ކޯޗުކޮށްދީފައިވާ ހެރީ ރެޑްނެޕެވެ.
ޔުނައިޓެޑުގެ ޓީވީއަށް ދިން އިންޓަވިއުއެއްގައި ފާގަސަން ބުނީ ކެރިކުގެ އިތުރުން 2008 ގެ ޗެމްޕިއަންސް ލީގު ކާމިޔާބުކުރި ޓީމަށް އޭނާގެ ހިތުގައި އޮތް ލޯބި ވަރަށް ބޮޑު ކަމަށާއި ކެރިކުގެ ހާއްސަ މެޗުގައި އަލުން ބެންޗަށް ދެވޭތީ ވަރަށް ބޮޑަށް އުފާވެފައިވާ ކަމަށެެވެ.
ޔުނައިޓެޑަށް 1986 އިން 2013 އަށް ކޯޗުކޮށްދީ އެ ކްލަބަށް ފާގަސަން 38 ތަށި ކާމިޔާބުކޮށްދީފައިވާއިރު ގިނަ ބަޔެއްގެ އެންމެ ހާއްސަ ސީޒަނަކީ 2008 ގެ ސީޒަނެވެ. ކެރިކާއި ކްރިސްޓިއާނޯ ރޮނާލްޑޯ އާއި ކާލޯސް ޓެވޭޒާއި ޕޯލް ސްކޯލްސް އާއި ރިއޯ ފާޑިނަންޑާއި އެޑްވިން ވޭން ޑަ ސާ ފަދަ ކުޅުންތެރިންނާ އެކު ފާގަސަން ވަނީ ޔޫރަޕުގެ ތަށި ހޯދުމުގެ އިތުރުން އެ ފަހަރު ޕްރިމިއާ ލީގު ވެސް ކާމިޔާބުކޮށްފަ އެވެ.
"ޔޫރަޕުގެ ޗެމްޕިއަންކަން ހޯދުމަކީ ހާއްސަ ކާމިޔާބެއް. އޭރު އޮތީ މޮޅުވުމުގެ ރޫހު ބޮޑު، ވަރަށް ވަރުގަދަ ސްކޮޑެއް. އެ ފަހަރުގެ ޗެމްޕިއަންސް ލީގުގެ ފައިނަލުގައި އަހަންނަށް ކުރެވުނު ދެރަކަމަކީ، އަދި މިއަދާ ހަމަޔަށް ވެސް އަހަރެން އެކަމަކާ ހިތާމަކުރަނީ ޕާކް ޖީ ސުން އަށް ފައިނަލް މެޗުގެ ސްކޮޑުން ފުރުސަތު ނުދެވުން،" ފާގަސަން ބުންޏެވެ.
ފާގަސަން ބުނީ ކޯޗުކޮށްނުދެވޭތީ އެކަމާ އުނދަގޫނުވާ ކަމަށާއި އެކަމަކު ބޮޑެތި މެޗުތަކުގެ ހަނދާންތައް އޭނާ އަށް އުނދަގޫކުރާ ކަމަށެވެ. އެކަމަކު ރިޓަޔާކުރުމަކީ އަމިއްލަ ނިންމުމެއް ކަމަށާއި އެކަމުން މިހާރު ހިތްހަމަޖެހުން ހޯދަމުން އަންނަ ކަމަށް ބުންޏެވެ.
ކެރިކުގެ ޓެސްޓިމޯނިއަލް މެޗުގައި އޭނާގެ ޑްރީމް ޓީމަށް ކުޅޭ ކުޅުންތެރިންގެ ތެރޭގައި ޗެލްސީގެ ލެޖެންޑް ފްރޭންކް ލަމްޕާޑާއި ލިވަޕޫލުގެ ލެޖެންޑް ސްޓީވެން ޖެރާޑް ހިމެނެ އެވެ.
ވެސްޓް ހޭމުން ކެރިއަރު ފެށުމަށް ފަހު ޓޮޓެންހަމް ހޮޓްސްޕާސް އަށް ވެސް ކުޅުނު ކެރިކް ޔުނައިޓެޑާ ގުޅުނީ 2006 ގަ އެވެ. އޭނާ ވަނީ އެ ކްލަބަށް 300 އަށް ވުރެ ގިނަ މެޗު ކުޅެދީ އެ ކްލަބާ އެކު ޕްރިމިއާ ލީގު ފަސް ފަހަރު ކާމިޔާބުކޮށްފަ އެވެ.
އިންގްލެންޑަށް ވެސް 2001 ވަނަ އަހަރުން ފެށިގެން ކުޅެމުން އަންނަ އުމުރުން 35 އަހަރުގެ ކުޅުންތެރިޔާގެ ޔުނައިޓެޑުގެ ކޮންޓްރެކްޓް މި ސީޒަނަށް ފަހު ހަމަވާއިރު އާ ކޮންޓްރެކްޓެއް ދީފައެއް ނުވެ އެވެ.
ޓެސްޓިމޯނިއަލް މެޗުތަކަކީ ކުޅުންތެރިޔަކު ކްލަބަށް ކޮށްދިން ހިދުމަތުގެ އަގުވަޒަންކުރުމުގެ ގޮތުން ކްލަބުން އިންތިޒާމްކޮށްދޭ މެޗެކެވެ. މި މެޗުން ލިބޭ ފައިސާގެ 50 ޕަސެންޓް ކްލަބަށް ލިބޭއިރު އަނެއް ބައި ލިބޭނީ ކުޅުންތެރިޔާ އަށެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ޙުސެން
21 March 2017
އަހަންނަކީ ޔުނައިޓެޑްގެ ސަޕޯޓަރެއް ނޫން. އެކަމަކު މެންޓަލިސްޓް ބުނިހެން ފާގަސަން އަކީ ދުނިޔޭގެ އުފެދުނު އެފަދަ ދެވަނައެއް ނެތްވަރުގެ މޮޅު ކޯޗެއް. ކުޅުންތެރިންގެ މޯޓިވޭޓް ކުރުމާއި ކުޅުންތެރިންގެ އުފެއްދުމުގައިވެސް އެފަދަ ދެވަނައެއް ނެތް ކޯޗެއް. ދުނިޔޭގެ ނަން މަޝްހޫރު އެކުޅުންތެރިންގެ ހަދާންތައް ކުރިއަށް އޮތް 100 އަހަރަށް ވެސް ހަނދާނުގައި ހުންނާނެ ފަދަ ކުޅުންތެރިން ޔުނައިޓެޑްގައި ފާގަސަން ވަނީ އުފައްދާފައޭ ބުނުމަކީ ދޮގަކަށް ނުވާނެ. ރޮނާލްޑޯ ، ބެކަމް ފަދަ ކުޅުންތެރިންނަކީ އެފަދަ ކުޅުންތެރިން.... ފާގަސަން ޔުނައިނެޓް ބެންޗަށް ނުވަތަ އެހެން ކުލަބެއްގެ ބެންޗަށް ދިޔުމަކީވެސް ފުޓްބޯޅަ ސަޕޯޓަރެއްގެ ޙައިޞިއްޔަތުން ވަރަށް އުފާވެރި ޚަބަރެއް...
ޔުނައިނެޓް
21 March 2017
ޕޮގްބާ އަދި ވެނ ރޫނީވެސް މީ މިލިސްޓްގަ،
މެންޓަލިސްޓް
20 March 2017
ފާގަރސަންއަކީ ދުނިޔޭގެ ފުޓްބޯޅައިގެ ހަމަ އެއްވަނައިގެ ކޯޗޭވެސް ބުނުމަކީ ކުށަކަށްނުވާނެ ،، ވަރަށްވެސް ޑިސިޕްލިން ރަގަޅު އޭނާގެ ޑްރީމްކާމިޔާބު ކުރުމަށް ވަރަށް ޑެޑިކޭޝަނާއިއެކު މަސައްކަތް ކުރި މެނޭޖަރއެއް ،،،، އެންމެ ފަހު ސިކުންތާއި ހަމަޔަށްވެސް އުއްމީދުގެ ހުޅުކޮޅު ނިވާނުލައި އެއަޒުމްގައި ކޮންމެ މެޗެއްގައިވެސް މަސައްކަތްކޮށް ޕްލޭންކޮށް ހިއްވަރުދީ ކުޅުންތެރީން މޯޓިވޭޓް ކުރި މެނޭޖަރއެއް ،،، ވަރަށްވެދުން