އާ ޓާމިނަލް ހުޅުވުމުގެ ތައްޔާރީތައް: ބޯޑިން ބްރިޖަށް މުވައްޒަފުން ތަމްރީނުކޮށްފި

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ފަސިންޖަރު ޓާމިނަލުގައި ބޭނުންކުރާ "ޕެސެންޖާ ބޯޑިން ބްރިޖުތައް" އޮޕަރޭޓް ކުރާނެ މުވައްޒަފުން ތަމްރީނުކޮށްފި އެވެ.

ރާއްޖޭގެ މައި އެއާޕޯޓުގެ އާ ޓާމިނަލް މި މަހުގެ 26 ގައި ބާއްވާ ކުލަގަދަ ރަސްމިއްޔާތަކާ އެކު ހުޅުވުމުގެ އެންމެ ފަހުގެ ތައްޔާރީތައް ވަމުން އަންނައިރު އޭގެ ތެރެއިން އެންމެ މުހިންމު އެއްބަޔަކީ ޕެސެންޖާ ބޯޑިން ބްރިޖުތައް ބޭނުންކުރާނެ ގޮތުގެ ތަމްރީނު މުވައްޒަފުންނަށް ދިނުމެވެ.

އެއީ ރާއްޖެ އަށް ވެސް މުޅިން އާ ހިދުމަތަކަށް ވާތީ އެކަމަށް ވީއައިއޭ އިން ހާއްސަ އިސްކަމެއް ދިން ކަމަށް އެމްއޭސީއެލް އިން ބުންޏެވެ.

ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލްގެ ޕެސެންޖާ ބޯޑިން ބްރިޖުތަކަށް ހާއްސަކުރި މުވައްޒަފުން މެލޭޝިއާގައި ތަމްރީނު ފުރިހަމަ ކުރުމަށް ފަހު ފޮޓޯއަކަށް ތައްޔާރު ވެގެން.---ފޮޓޯ: އެމްއޭސީއެލް

ބޯޑިން ބްރިޖަކީ ރައްކާތެރި ކަމާ އެކު، މަތިންދާބޯޓުން ޓާމިނަލަށް ފައިބަން ގުޅާލާ ބްރިޖެކެވެ. އެ ބްރިޖާ އެކު، ޓާމިނަލުން މަތިންދާބޯޓަށް އަދި ބޯޓުން ޓާމިނަލަށް ފަސިންޖަރުން ދިއުމަށް ބަސްތައް ބޭނުންކުރާކަށް ނުޖެހޭނެ އެވެ. ފަސިންޖަރުން ބޯޓުން ސީދާ ފައިބާނީ ޓާމިނަލަށެވެ.

ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލްގެ ޕެސެންޖާ ބޯޑިން ބްރިޖުތަކަށް ހާއްސަކުރި މުވައްޒަފުން ފޮޓޯއަކަށް ތައްޔާރު ވެގެން.---ފޮޓޯ: އެމްއޭސީއެލް

އެމްއޭސީއެލް އިން ބުނީ، ބޯޑިން ބްރިޖުތައް އޮޕަރޭޓް ކުރަން މިހާތަނަށް 46 މުވައްޒަފުން ތަމްރީނު ކޮށްފައިވާ ކަމަށެވެ. އޭގެ ތެރެއިން 14 މުވައްޒަފުން ތަމްރީން ކޮށްފައިވަނީ މެލޭޝިއާ އަށް ފޮނުވައިގެން ކަމަށް ވެސް އެ ކުންފުނިން ބުންޏެވެ.

ވީއައިއޭ ހިންގާ އެމްއޭސީއެލް އިން ބުނީ، އެ ތަމްރީނުތަކުގެ ބޭނުމަކީ ބޯޑިން ބްރިޖުތައް އޮޕަރޭޓްކުރާ މުވައްޒަފުން އިންޑަސްޓްރީގެ މިންގަނޑުތަކާއި ބެސްޓް ޕްރެކްޓިސްތަކަށް އަހުލުވެރިވެ، ސަލާމަތްތެރިކަމާ އެކު އޮޕަރޭޓް ކުރުމަށް ބޭނުންވާ ހުނަރުތައް ދަސްކޮށްދިނުން ކަމަށެވެ.

ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލްގެ ޕެސެންޖާ ބޯޑިން ބްރިޖުތަކަށް ހާއްސަކުރި މުވައްޒަފުން މެލޭޝިއާގައި ތަމްރީނު ހަދަނީ.---ފޮޓޯ: އެމްއޭސީއެލް

ތަމްރީނުތަކުގައި ބައިވެރިވި މުވައްޒަފުން، ފަސިންޖަރު ބޯޑިން ބްރިޖުތައް އޮޕަރޭޓް ކުރުމުގެ ކުރިން އޭގެ ސިމިއުލޭޓާ އެކްސަސައިޒްތަކެއް ވެސް ވަނީ ހަދައިފަ އެވެ.

އެމްއޭސީއެލް އިން ބުނިގޮތުގައި، އަމާޒަކީ މެލޭޝިއާ އަށް ފޮނުވައިގެން ތަމްރީނު ހެދި މުވައްޒަފުން މެދުވެރިކޮށް ކުރިމަގުގައި ބޯޑިން ބްރިޖް އޮޕަރޭޓް ކުރާނެ އިތުރު މުވައްޒަފުން ތަމްރީނު ކުރުމެވެ.

ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް އެޅުމަށް ސައުދީ ބިންލާދިން ގްރޫޕާ ސަރުކާރުން ހަވާލުކުރީ 2016 ވަނަ އަހަރު އެވެ. މީގެ އަށް ވަރަކަށް އަހަރު ކުރިން ފެށި އެ މަޝްރޫއު ނިންމައި އެއާޕޯޓް އަވަހަށް ހުޅުވުމަކީ މި ސަރުކާރު ވެރިކަމާ ހަވާލުވެ، އެންމެ އިސްކަމެއް ދިން އެއް ޕްރޮޖެކްޓެވެ. އެކަމަށް ބޭނުންވާ އިތުރު ފައިނޭންސިން ވެސް ސައުދީ ފަންޑާ ގުޅިގެން އިތުރު ކުރި އެވެ.

ފަސިންޖަރުންގެ ޓާމިނަލް 78،000 އަކަ މީޓަރަކަށް ބޮޑުކޮށް، ހިދުމަތް ހޯދާ މީހުންގެ އަދަދު 7.5 މިލިއަން ފަސިންޖަރުންނަށް އިތުރު ކުރާނެ އެވެ. ޕްރޮޖެކްޓަށް ގެނައި އާ ބަދަލުތަކާ އެކު، އެ ތަނަށް ގާތްގަނޑަކަށް 600 މިލިއަން ޑޮލަރު (9.2 ބިލިއަން ރުފިޔާ) ހަރަދުކުރި އެވެ.