މި ދައުރުގައި ހުރިހާ ވައުދެއް ފުއްދައި ނިމޭނެ ކަމުގެ ޔަގީންކަން އެބައޮތް: ރައީސް

ރައްޔިތުންނަށް ވެވަޑައިގަންނަވާ ކޮންމެ ވައުދަކީ އެ މަނިކުފާނުގެ އަމާނާތެއް ކަމަށާއި އެ އިން ކޮންމެ ކަމަކީ ކުރައްވަން ޖެހިވަޑައިގަންނަވާ ކަމެއް ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

އއ. އަތޮޅަށް އިއްޔެ ފެއްޓެވި ދަތުރުފުޅުގައި މަތިވެރީގެ ރައްޔިތުންނާ ވާހަކަފުޅު ދައްކަވަމުން ރައީސް ވިދާޅުވީ، މިދިޔަ ރިޔާސީ އިންތިހާބުގެ ކެމްޕެއިންގައި އަދި އޭގެ ފަހުން ވެސް ރައްޔިތުންނަށްޓަކައި ވައުދުތައް ވެވަޑައިގަންނަވަނީ ވެސް އެއީ އަމާނާތެއް ކަން ގަބޫލުފުޅު ކުރައްވާތީ ކަމަށެވެ.

"ހުރިހާ ރަށެއްގައި ވެސް އަޅުގަނޑު ވައުދު ވަނީ އެ ބޭނުމުގައި، އެ ނިޔަތުގައި، އެ އަޒުމުގައި. އެ ގޮތަށް މުޅި ސަރުކާރު މަސައްކަތް ކުރަމުން މިދަނީ. ހުރިހާ ވުޒާރާތައް ހުރިހާ ކުންފުނިތައް ހުރިހާ ފަރާތްތައް، ރަށްރަށުގައި މަސައްކަތްކުރާ ފަރާތްތައް ވެސް އަދި އަޅުގަނޑުމެންގެ އިއްޒަތްތެރި މެމްބަރުން ވެސް ހުރިހާ ފަރާތްތައް ގުޅިގެން މި ކުރަނީ ވައުދު ފުއްދުމުގެ މަސައްކަތް،" ރައީސް މުއިއްޒު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި ވަރަށް ގިނަ ރަށްރަށުގައި މިހާރު އެކި ކަހަލަ މަސައްކަތްތައް ސަރުކާރުން ފަށައިގެން ނިމެމުން ވެސް އަންނަ ކަމަށެވެ.

"ހަމަ ވައުދު ލިސްޓު ނަގައިގެން ވައުދު ފުއްދުމުގެ މަސައްކަތް މި ކުރަނީ. އަޅުގަނޑުގެ ފުރިހަމަ ޔަގީންކަން އެބައޮތް އިރާދަކުރެއްވީތީ އެއްވެސް ޝައްކެެއް ނެތި އަޅުގަނޑު ވީ ހުރިހާ ވައުދެއް މި ދައުރުގެ ތެރޭގައި ފުއްދައި ނިންމާނަން،" ވައުދުތައް ފުއްދަވާނެ ކަމުގެ ޔަގީންކަން ދެއްވަމުން ރައީސް ވިދާޅުވި އެވެ.

މަތިވެރީގައި ރޭ ބޭއްވި ޖަލްސާގައި ރައީސް ބައިވެރިވެވަޑައިގަންނަވަނީ.

ރައީސް މުއިއްޒު ވިދާޅުވީ، އެ މަނިކުފާނު ރައްޔިތުންނަށްޓަކައި ވެވަޑައިގެންނެވި ކޮންމެ ވައުދެއް ވީ "ވަރަށް ސީރިއަސްކަމާ އެކީގައި" ކަމަށެވެ. އަދި މި ސަރުކާރުން މަސައްކަތް ކުރަނީ ވެސް ހަމަ އެ ސީރިއަސްކަންމަތީގައި އިހުލާސްތެރިކަމާ އެކު ކަމަށް ވިދާޅުވި އެވެ.

"ރައްޔިތުންނަށް ބޭނުންވާ ކަންކަން ކޮށްދިނުން ނޫން އެހެން އެއްވެސް ކަމެއް ނެތޭ. ނަތީޖާ ނެރެދިނުން ނޫން އެހެން އެއްވެސް އިންޓަރެސްޓެއް އަޅުގަނޑުގެ ނެތޭ،" ރައީސް ވިދާޅުވި އެވެ.

ރައީސް މުއިއްޒު ވައުދުގެ ވާހަކަތައް ރޭ އާ ކުރެއްވީ މަތިވެރީގެ ރައްޔިތުންނަށް ވެވަޑައިގެންނެވި ހުރިހާ ވައުދެއް ވެސް ފުއްދަވައި ދެއްވާނެ ކަމުގެ ޔަގީންކަން ދެއްވަމުންނެވެ. އެކަން ކޮށްދެއްވުމަކީ އެ މަނިކުފާނުގެ ޒިންމާއެއް، މަސްއޫލިއްޔަތެއް ކަމުގެ އިތުރުން އަމާނާތެއް ކަމަށް ވިދާޅުވި އެވެ.

ވައުދުތަކުގެ ވާހަކަ ރައީސް މުއިއްޒު ދެއްކެވިއިރު 2023 ގެ ރިޔާސީ އިންތިހާބުގެ ކެމްޕެއިންގައި ދެއްކެވި ހުރިހާ ވާހަކަފުޅެއް އެއްފޮތެއްގައި އެ މަނިކުފާނު ވަނީ ނެރުއްވައިފަ އެވެ. އެ ފޮތުގައި ކެމްޕެއިންގެ ވައުދުތައް ވެސް ވަނީ ހިމަނުއްވައިފަ އެވެ.