ހަމާސްއިން ބޭނުންކުރާ ކަމަށް ބުނެ ޣައްޒާ ސިޓީގެ އުސް އިމާރާތްތައް ގޮއްވަނީ

އިޒްރޭލުން ފަލަސްތީނުގެ ޣައްޒާ ސިޓީ ހިފަން ކުރަމުން ގެންދާ މަސައްކަތުގައި އެ ސިޓީގެ އުސް އިމާރާތްތަކަށް ހަމަލާދޭނެ ކަމުގެ އިންޒާރު ދިނުމަށް ފަހު އިއްޔެ އިމާރާތެއް ބިމާ ހަމަކޮށްލައިފި އެވެ.

ޣައްޒާއަށް ދެމުން ގެންދާ ހަމަލާތައް ހުއްޓާލަން އިޒްރޭލުގެ އެތެރެއިންނާއި ބޭރުން ވެސް ފިއްތުންތައް އިތުރުވެފައި ވިޔަސް އިތުރު ރިޒާވް ސިފައިން ވެސް ނެރެ އިޒްރޭލުގެ އަސްކަރިއްޔާއިން ގެންދަނީ ހަމަލާތައް ވަރުގަދަކުރަމުންނެވެ.

ބާރަ ބުރީގެ އިމާރާތެއް ކަމަށްވާ މުޝްތަހާ ޓަވަރު ބިމާ ހަމަކޮށްލީ "ހަމާސްގެ ޓެރަރިސްޓް ހަރަކާތްތައް ޣައްޒާ ސިޓީގެ އިމާރާތްތަކުގެ ތެރޭގައި އަދި ހާއްސަކޮށް އުސް އިމާރާތްތަކުގެ ތެރޭގައި ހިންގާކަން އެނގޭ" ކަމަށާއި އެހެންވެ "ކުރިއަށް އޮތް ދުވަސްތަކުގައި" އެފަދަ އިމާރާތްތަކަށް ހަމަލާދޭނެ ކަމަށް ބުނެ ބަޔާނެއް ނެރުނުތާ ގަޑިއެއްހާއިރު ފަހުންނެވެ.

އޭއެފްޕީގެ ފުޓޭޖްތަކުން ފެންނަ ގޮތުގައި ޣައްޒާ ސިޓީގެ އަލް ރިމާލް އަވަށުގައި ހުންނަ މުޝްތަހާ ޓަވަރު ބިމާ ހަމަކޮށްލީ އިމާރާތުގެ ބުޑަށް ދިން ވަރުގަދަ ހަމަލާއަކުންނެވެ. ސިކުންތުކޮޅެއްގެ ތެރޭގައި އިމާރާތް ވެއްޓި ދުމާއި ހިރަފުހުން މުޅި ހިސާބު ފުރިގެން ދިޔަ އެވެ.

އިޒްރޭލުން ބުނީ އެ އިމާރާތް ގޮއްވާލީ އިޒްރޭލު ސިފައިންނާ ދެކޮޅަށް ހަމަލާ ދިނުމަށް ހަމާސް އިން އެ އިމާރާތުގެ ބޭނުންކުރާތީ ކަމަށެވެ. އަދި އާންމުންނަށް ގެއްލުން ކުޑަކުރުމަށް ފިޔަވަޅު އެޅި ކަމަށާއި ކުރިއާލައި އިންޒާރު ދިން ކަމަށް ވެސް ބުންޏެވެ.

މަންޒަރު ދުށް ބައެއް އާންމުން އޭއެފްޕީއަށް ކިޔައިދިން ގޮތުގައި އިޒްރޭލުގެ އިންޒާރާ ގުޅިގެން އިމާރާތުން އާންމުން ނުކުންނަށް ލިބުނީ ކުޑަ އިރުކޮޅެކެވެ. އަތުން ހިފައިގެން ގެންދެވޭ ސާމާނުތަކާ އެކު މީހުން ނުކުމެ ނިމުނުތާ ބައި ގަޑިއެއްހާއިރު ތެރޭ އިމާރާތަށް ހަމަލާ ދިން ކަމަށް އާންމުން ބުންޏެވެ.

ޣައްޒާގެ ސިވިލް ޑިފެންސް އެޖެންސީން ބުނީ ހަމަލާ ދިނީ އާންމުން އުޅޭ އިމާރާތަކަށް ކަމަށާއި މިއީ ޣައްޒާ ސިޓީން މީހުން ނިކުމެގެންދާން މަޖުބޫރުކުރުވަން އިޒްރޭލުން ހިންގާ އަމަލެއް ކަމަށެވެ.

ޣައްޒާއަށް އިޒްރޭލުން ހަމަލާދޭތާ ދެ އަހަރުވާން ގާތްވެފައި ވާއިރު ގާތްގަނޑަކަށް 65،000 މީހުން މިހާތަނަށް ވަނީ ޝަހީދުކޮށްލައިފަ އެވެ. ސިވިލް ޑިފެންސް އެޖެންސީން ބުނީ އިއްޔެ ވެސް ޣައްޒާ ސިޓީން 19 މީހަކާއި މުޅި ޣައްޒާއިން، އެންމެ މަދުވެގެން 42 މީހަކު ޝަހީދުކޮށްލާފައިވާ ކަމަށެވެ. -- އޭއެފްޕީ