ބޭރުގެ ބޮޑެތި ކުންފުނިތަކެއް ހިމެނޭ ޓްރެވަލް ކޮންފަރެންސެއް ރާއްޖޭގައި ބާއްވަނީ

މަޓާޓޯ ޓްރެވަލް އެވޯޑާ ދިމާކޮށް ޓޫރިޒަމް އިންޑަސްޓްރީގެ ބައިނަލްއަގުވާމީ ބޮޑެތި ކުންފުނިތަކެއް ހިމެނޭ ޓްރެވަލް ކޮންފަރެންސެއް ރާއްޖޭގައި ބާއްވަން، ތިންކް އެޑްވަޓައިޒިންގެ ފަރާތުން ނިންމައިފި އެވެ.

ޓްރެވަލް އެވޯޑް އިންތިޒާމްކުރާ ތިން އެޑްވަޓައިޒިންގެ ސީއީއޯ އަދީލް އިސްމާއިލް މިއަދު ވިދާޅުވީ އަންނަ ނޮވެމްބަރުމަހު ފަހުކޮޅު ބަނޑޮސް އައިލެންޑް ރިސޯޓްގައި ބާއްވާ ކޮންފަރެންސްގައި ދުނިޔޭގެ މަޝްހޫރު ހޮޓެލް ބުކިން އެޖެންސީތަކާއި ރާއްޖޭގެ ޓޫރިޒަމް ދާއިރާގެ އިސް ފަރާތްތަކުން ވެސް ބައިވެރިވާނެ ކަމަށެވެ.

"މި ކޮންފަރެންސް ބޭއްވުމުގެ ބޭނުމަކީ ޓްރެވަލް އިންޑަސްޓްރީއާ ބެހޭ ގޮތުން ހިޔާލު ބަދަލުކޮށް ގުޅުން ބަދަހިކުރުން. މިއީ ޓްރެވަލް އެވޯޑާ އެކު މިފަދަ ކޮންފަރެންސެއް ބާއްވާ ފުރަތަމަ ފަހަރު،" އޭނާ ވިދާޅުވި އެވެ.

އަދީލް ވިދާޅުވީ ޓްރެވަލް ކޮންފަރެންސް ބާއްވަން ނިންމާފައި ވަނީ އެވޯޑް ހަފުލާ ބޭއްވުމުގެ އެއް ދުވަސް ކުރިން ކަމަށެވެ. ރާއްޖޭގެ ޓޫރިޒަމް އިންޑަސްޓްރީގައި ދޭ އެންމެ ޝަރަފްވެރި އެވޯޑުގެ 35 ކެޓަރީއަކުން 243 ފަރާތަކުން ވާދަކުރެ އެވެ.

މިއީ މި އެވޯޑް ދޭން ފެށި ފަހުން މިހާ ގިނަ ބަޔަކު އެވޯޑަށް ކުރިމަތިލި ފުރަތަމަ ފަހަރެވެ. ‎

މަޓާޓޯއިން ބުނި ގޮތުގައި މިފަހަރުގެ އެވޯޑްގައި އަލަށް، ލީޑިން މާކެޓިން ޕްރޮގްރާމް، ލީޑިން ހިއުމަން ރިސޯސް މެނޭޖްމަންޓް، ލީޑިން ގެސްޓްހައުސް އައިލެންޑް، ލީޑިން އެފްއެންޑްބީ އައުޓްލެޓް އަދި ލީޑިން އެއާޕޯޓް ލައުންޖަށް އެވޯޑް ދޭނެ އެވެ.‎ ‎

މި އަހަރުގެ އެވޯޑް ހަފްލާ ކުރިއަށް ގެންދާނީ ދެ ދުވަހަށް ބަހާލައިގެންނެވެ.

މަޓާޓޯ ޓްރެވަލް އެވޯޑަކީ ރާއްޖޭގެ ފަތުރުވެރިކަން ތަރައްގީކޮށް ކުރިއަރުވަން މަސައްކަތް ކުރާ އަދި ރާއްޖެ އާއި ރާއްޖޭން ބޭރުން ފަތުރުވެރިކަމުގެ ދާއިރާ އިން އެކި ވަނަތައް ހޯދާ ފަރާތްތަކަށް ދޭ އެވޯޑެކެވެ.

ސާދަ ޕާޓްނަރުންނާ އެކު ބާއްވާ ޓްރެވަލް އެވޯޑުގެ މެއިން ސްޕޮންސަރަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އެވެ. އަދި "މިހާރު" އަކީ މި އެވޯޑު އޮންލައިން މީޑިއާ ޕާޓްނަރެވެ.