މުނިފޫހިފިލުވުން / ހަބޭސް ބޮޑުބެރު ގުރޫޕް

ހަބޭސް މަދަހަ އަލްބަމްގައި މިފަހަރު ދަރިވަރުން

މާލެ: 26 ޖޫން 2017، މި ފިތުރު އީދުގެ އުފަލުގައި ހަބޭސް ބޮޑުބެރު ގުރޫޕުން ބޭއްވި މިއުޒިކް ޝޯގެ ތެރެއިން: މި ޝޯ އަށް ޒުވާނުންގެ ބޮޑު ތަރުހީބެއް ލިބުނު--. ފޮޓޯ:ނިޝާން އަލީ/މިހާރު

އައިޝަތު މާހާ، މިހާރު

10 އެޕްރީލް 2019 - 14:25

5 comments

ރޯދަމަހާ ދިމާކޮށް ހަބޭސް ބޮޑުބެރު ގްރޫޕުން މި އަހަރު ވެސް މަދަހަ އަލްބަމެއް ނެރެން ނިންމައިފި އެވެ. އެ ގްރޫޕުން ވަނީ މިދިޔަ ދެ އަހަރު ވެސް ރޯދަ މަހަށް ހާއްސަކޮށް މަދަހަ އަލްބަމް ނެރެފަ އެވެ.

ހަބޭސް ބޮޑުބެރު ގްރޫޕުން ބުނީ "ހަސްތީ"ގެ ނަމުގައި ނެރޭ އެ އަލްބަމަށް މަދަހަ ކިޔާނީ މާލޭގެ ހަ ސްކޫލެއްގެ ދަރިވަރުން ކަމަށެވެ. މިއީ ވީޑިއޯ މަދަހަ އަލްބަމެއް ކަމަށާއި މީގައި ހަ މަދަހައެއް ހިމެނޭނެ ކަމަށް ހަބޭސް އިން ބުންޏެވެ.

އެ އަލްބަމްގެ ހުރިހާ މަދަހައެއް ވެސް ކިޔާފައި ހުންނާނީ މިއުޒިކާއި ނުލަ އެވެ. ސްކޫލްތަކާ ގުޅިގެން އެ އަލްބަމް ނެރުނަސް މަދަހަތަކުގެ ޅެން ހެދުމާއި ރިކޯޑިން އަދި ހުރިހާ ޓެކްނިކަލް މަސައްކަތެއް ކުރަން ނިންމާފައިވަނީ ހަބޭސް އިންނެވެ. ރޯދަމަސް ފެށުމުގެ ކުރިން އެ އަލްބަމް ނެރެން ވަނީ ނިންމާފަ އެވެ.

"ހަސްތީ"ގައި ވަކިވަކި ކުދިންގެ މަދަހަ އާއި ގްރޫޕް މަދަހަތައް ވެސް ހިމެނޭނެ ކަމަށް އެ ގްރޫޕުން ބުންޏެވެ. ހަބޭސް އިން ބުނީ މި އަހަރު މާލޭގެ ސްކޫލްތަކަށް ފުރުސަތު ދިން ނަމަވެސް އަންނަ އަހަރު އަތޮޅު ތެރޭގެ ސްކޫލްތަކަށް އެ ފުރުސަތު ހުޅުވާލާނެ ކަމަށެވެ.

އެ ގްރޫޕުން އެންމެ ފުރަތަމަ މަދަހަ އަލްބަމެއް ނެރުނީ 2017 ވަނަ އަހަރު އެވެ. "ޒަމާން" ނަމުގައި ނެރުނު އެ އަލްބަމަށް މަދަހަ ކިޔާފައިވަނީ ހަބޭސް ގްރޫޕުގެ ވޯކަލިސްޓުންނެވެ. އަދި މިދިޔަ އަހަރު ނެރުނު "މިސްކު" އަލްބަމަށް މަދަހަ ކިޔައިދނީ އެހެން ބޮޑުބެރު ގްރޫޕްތަކުގެ ވޯކަލިސްޓުން ވެސް ބައިވެރިކޮށްގެންނެވެ.