28 ޖެނުއަރީ 2021 - 10:42
10 comments
އެޗްއެސްބީސީ އަމާނާގެ މެލޭޝިއާގެ ވަގުތީ ސީއީއޯ އަކަށް ދިވެއްސަކު ހަމަޖައްސައިފި އެވެ.
މިމަގާމަށް ހަމަޖެއްސީ އެ ބޭންކުގެ ޝަރީއާ ޑިޕާޓްމަންޓުގެ ހެޑް، އަހުމަދު ފިރާސް އެވެ. ކުރީގެ އިސްލާމިކް މިނިސްޓަރު ޑރ. އަބްދުލް މަޖީދު އަބްދުލް ބާރީގެ ދަރިކަލެއް ކަމަށްވާ ފިރާސް އެޗްއެސްބީސީގައި މަސައްކަތް ކުރައްވާތާ މިއީ ތިން ވަނަ އަހަރެވެ.
އެޗްއެސްބީސީ އަމާނާގައި ވަޒީފާ އަދާކުރުމުގެ ކުރިން އޭނާ ވަނީ ބޭންކް އޮފް މޯލްޑިވްސް އަދި މޯލްޑިވްސް އިސްލާމިކް ބޭންކްގައި ވެސް މަސައްކަތް ކުރައްވައިފަ އެވެ.
ފިރާސް އަކީ ޗާޓަޑް ބޭންކާއެކެވެ. އިސްލާމިކް ފައިނޭންސް ދާއިރާ އިން މަތީ ތައުލީމު ހާސިލުކުރައްވާފައިވާ ފިރާސް ވަނީ ރާއްޖޭގައި އިސްލާމިކް ބޭންކިން ތައާރަފްކުރުމުގައި އިސް ދައުރެއް އަދާކުރައްވައިފަ އެވެ.
އެމްއައިބީ ހިންގަން ނެގި ފުރަތަމަ އެކްޒެކެޓިވް ޓީމްގައި ފިރާސް ހިމެނެ އެވެ. އަދި އެ ބޭންކް އުފައްދާ އެތަނުގެ ލީގަލް އެންޑް ޝަރީއާ ޑިޕާޓްމެންޓްގެ އިސް ވެރިއެއްގެ ގޮތުގައި ދެ އަހަރު ހުންނެވި އެވެ. އެއަށްފަހު ބީއެމްއެލް އިސްލާމިކް އުފެއްދުމުގައި ވެސް އޭނާ އިސް ދައުރެއް އަދާކުރެއްވި އެވެ. އަދި އެ ބޭންކްގައި ސީނިއާ އެޑްވައިޒަރެއްގެ ގޮތުގައި ހަ އަހަރު ވަންދެން ހުންނެވި އެވެ.
ފިރާސް އަކީ މަރުކަޒީ ބޭންކް އެމްއެމްއޭގެ ޝަރީއާ ކައުންސިލްގެ މެންބަރެކެވެ. އޭނާ ވަނީ އިސްލާމިކް ފައިނޭންސްގެ އިތުރުން ފައިނޭންޝަލް ޓެކްނޮލޮޖީ ދާއިރާއިން މަތީ ތައުލީމު ހާސިލުކުރައްވައިފަ އެވެ. އެގޮތުން ހާވާޑް ޔުނިވަސިޓީން ފައިނޭންޝަލް ޓެކްނޮލޮޖީ ދާއިރާއާ ގުޅޭ ކޯހެއް ފުރިހަމަކުރެއްވި އެވެ. މީގެ އިތުރުން ލަންޑަން ބިޒްނަސް ސްކޫލުން ސަސްޓެއިނަބިލިޓީ ލީޑާޝީޕް އާއި ކޯޕަރޭޓް ގަވާނެންސް ދާއިރާއާ ގުޅޭ ކޯހެއް ފުރިހަމަކުރައްވާފައިވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފޮނިޓައްޕު ހަސަނު
28 January 2021
މިރާއްޖޭގައި މިކަހަލަ މީހުން ވަރަށް މަދު. އެތަކެއް ލައްކަ ރުފިޔާ އާއި ވަގުތު ހޭދަަކޮށްގެން ޕީއެޗްޑީ ނަގައިގެން އެއުޅޭ ގިނަ މީހުން ވަގުތު ދުއްވާލަނީ ނިދުމާއި ކޮފީ ޝޮޕްތަކުގައި. އެއްވެސް ވަރެއްގެ ޕްރޮޑަކްޓިވިޓީއެއް ނެތް.
ފިނރުޓޭ
28 January 2021
ފިރާސް ވަރަށް ގަދަ ވާނެ ކަމަށް އުއްމީދު ކުރަން! ވަރަށް ހިންގާލާ ދިވެހިންގެ ސަރަފު މަތިވެރި ކުރުވާނެ ކަހަލަ ގޮތަކަށް ބޭންކު ހިންގާނެ ކަމަށް އުއްމީދު ކުރަން! އެއީ ރާއްޖޭގެ މަރުކަޒީ ބޭންކުންވެސް ޤަބޫލު ކުރާ ގޮތުގައި އަދި ރާއްޖޭގައި ބެންކެއް ހިންގޭ ވަރުގެ މީހަކު ނެތް! ދެން ބޮޑު ލަދެއްނު މިހާރު ބޭންކިންގ އިންޑަސްޓްރީ އަށް 50 އަހަރު ވެގެން ދާއިރު އަދިވެސް ރާއްޖޭގައި ބޭންކެއް ހިންގޭ ވަރުގެ ދިވެއްސެއް ތަމްރީނު ކުރެވިފަ ނެތީމަ! އެހެންނެއް ނޫން ވަނީކީއެއް
ހިލްމީ
28 January 2021
ވަރަށް އަޚްލާގު ރަގަޅު ބޭފުޅެއް. މީހުނަށް ގަދަރު ކުރާ އިލްމީ ބޭފުޅެއް.
ސެސދ
28 January 2021
ރާޢްޖޭގައި ހުނަރުވެރިން މަދު. އިންޑިޔާއިން ހަދިޔާކުރި 2 ހެލިކޮޕްޓަރ އުދުއްސަން އިނގޭމިޙަކުވެސް ނެތް
ހެޔޮއެދޭ
28 January 2021
ރާއްޖޭގައި މިކަހަލަ ކިތަންމެދަރީންނެއް އެބަތިބި. އެކަމަކު އަހަރުމެންގެ ބޭފުޅިޒަމްއާއި ސިޔާސީނިޒާމު އޮންނަގޮތުން އެފަދަދަރީންނަށް ފުރުސަތެއް ނުލިބޭނެ. މަޤާމުތަކަށް ގެންނަންވާނީ އަޅުދާސްވާ، އެޅިހާބަތަކަށް ރިހަވާބަޔަކު. ބުއްދިޤަބޫލުކުރާ އުޞޫލުތަކަށް މަސައްކަތްކުރާބަޔަކަށް ޖާގައެއްނުލިބޭނެ. މަރުޙަބާ ފިރާޝް!
މަރުހަބާ
28 January 2021
މިރާއްޖޭގައި މިސޮރު ހުރިނަމަ އަދިވެސް ހުންނާނީ ކޮންމެސް ސިޔާސީ މީހެއްގެ ދަށުގައި! މަރުޙަބާ ސޮރާ!
އަލީރާޖާ
28 January 2021
މަރްހަބާ! ވަރަށް ފަޚްރުވެރި މަގާމެއް.
ރަދީފްއޮފިޝިއަލް
28 January 2021
މާޝާﷲ.ވަރަށް އުފާކުރަން ދިވެހިދަރީން މިފަދަ ކާމިޔާބް ބަޔަކަށް ވީތީވެ.
ހަސަން ކޮއި
28 January 2021
ދިވެހިންނަށް ކީއްވެހޭ ދިވެހިންގެ ހުނަރުވެރިކަމާއި، ޤާބިލްކަމާއި، މަސައްކަތް ކުރެވޭނެކަން ނޭގެނީ؟ބީ.އެމް.އެލް.އިން ފިރާސްއަށް ފުރުސަތެއް ނުދިން.އަބަދުވެސް ބޮޑު މުސާރައަށް ގެނައީ ބޭރު މީހުން.މިހާރުވެސް ހަދަނީ އެހެން.ދިވެހި ޤަމު "ބްރެއިން ޑްރެއިން" ވަނީ މިސަބަބާހެދި.އަބަދު އެކްޓިވިސްޓުންނަށް ވަޒީފާ.ކިޔަވައިގެން ސެޓްފިކެޓު އޮތަސް ވަޒީފާ ގަނޑެއް ނުލިބޭ.
ވަހީދު
28 January 2021
މަރުޙަބާ ފިރާޝް