މިޔަރު އުރަހަ ބޭރު ކުރަން އުޅުނީ "ހޯމްޓައުން ސަޕްލައިސް" އިން؛ ދެ މީހަކަށް ދައުވާކޮށްފި

ރާއްޖޭން މިޔަރު އުރަހަ ބޭރުކުރަން އުޅުނު މައްސަލައިގައި ދެ މީހަކަށް ދައުވާކޮށްފި އެވެ.

މި އަހަރުގެ ޖެނުއަރީ މަހުގެ ކުރީކޮޅު، ލޮނުމަސް ޝިޕްމަންޓެއްގެ ތެރޭގައި ފޮރުވައިގެން 429 ކިލޯގެ މިޔަރު އުރަހަ، ރާއްޖެއިން ބޭރުކުރަން އުޅެނިކޮށް ވެލާނާ އިންޓަނޭޝަނަލް އެއާޕޯޓުން ވަނީ ހިފަހައްޓައިފަ އެވެ.

ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު "މިހާރު" އަށް ވިދާޅުވި ގޮތުގައި އެ މައްސަލައިގައި މިއަދު ދެ މީހަކަށް ދައުވާކޮށް، ކޯޓަށް ހުށަހަޅާފައިވާ ކަމަށެވެ. ދައުވާކޮށްފައިވާ ދެ މީހުންނަކީ އައްބާސް އަބްދުﷲ އާއި އަހުމަދު މުހައްމަދު ކިޔާ ދެ މީހުންނެވެ.

އޭނާ ވިދާޅުވި ގޮތުގައި އެ މީހުންނަށް ކުރި ދައުވާތަކަކީ ރާއްޖެއިން ސިއްރުން މުދާ ބޭރު ކުރުމުގެ ދައުވާއާއި، އޮޅުވާލުމުގެ އަމަލެއް ކުރުމުގެ ދައުވާގެ އިތުރުން ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އެވެ.

"މިހާރު" އަށް އެނގިފައިވާ ގޮތުގައި މިޔަރު އުރަހަ ބޭރުކުރަން އުޅުނީ "ހޯމް ޓައުން ސަޕްލައިސް" ކިޔާ ވިޔަފާރިއެއްގެ ނަމުގަ އެވެ. ވިޔަފާރި ރަޖިސްޓްރީކޮށްފައިވަނީ އައްބާސްގެ ނަމުގަ އެވެ. އުރަހަ ބޭރުކުރަން އުޅުނީ މި މައްސަލާގައި ދެން ދައުވާ ލިބޭ މީހާގެ ބެލުމުގެ ދަށުންނެވެ.

މީގެ ހަ މަސް ކުރިން އެ މިޔަރު އުރަހަތައް އަތުލައިގަތަސް، އެ މައްސަލައިގައި ދައުވާ ނުކުރެވި ގިނަ ދުވަސްވީ އެ މައްސަލަ ތަހުގީގު ކުރި ކަސްޓަމްސްގެ ލަސްކަމުންނެވެ.

ކަސްޓަމްސްއިން ބުނެފައި ވަނީ ތަހުގީގު ލަސްވީ، ކޮވިޑްގެ ސަބަބުން މީހުންގެ ބަޔާން ނެގުމާއި ދައުލަތުގެ އެހެން އިދާރާތަކުން ބޭނުންވާ ލިޔުންތައް ހޯދުމުގައި ދިމާވި ދަތިތަކުގެ ސަބަބުން ކަމަށެވެ.

Customs aa hedhi miyaru urahaige massalaigai dhauvaa nukurevifai

The most trusted news source in the Maldives

Mihaaru