ޓިކްޓޮކްގައި ބަރަހަނާވި މީހާގެ ބަންދަށް 15 ދުވަސް

ޓިކްޓޮކް.

މާއިދާ މުހައްމަދު ރަޝާދު، މިހާރު

12 ސެޕްޓެމްބަރ 2021 - 20:23

އަންހެން ހެދުން އަޅައިގެން ނަށަމުން ގޮސް ޓިކްޓޮކްގައި ބަރަހަނާވި ފިރިހެން މީހާ ތަހުގީގަށް ބަންދުގައި ބަހައްޓަން ކްރިމިނަލް ކޯޓުން މިއަދު 15 ދުވަސް ދީފި އެވެެ.

ވީޑިއޯގެ މައްސަލާގައި، 36 އަހަރުގެ ދިވެހި ފިރިހެން މީހާ ހައްޔަރުކުރީ ރޭގަ އެވެ.

ފުލުހުން ބުނީ ކޯޓުން ބަންދު އިތުރުކޮށްދީފައި ވާއިރު މައްސަލައިގެ ތަހުގީގު ވެސް ކުރިއަށްދާ ކަމަށެވެ.

މިދިޔަ ބުދަ ދުވަހު ޓިކްޓޮކްގައި ބަރަހަނާވި މީހާ އަކީ އަންހެން ހެދުން އަޅައިގެން ނަށައި އޭގެ ވީޑިއޯތައް އާންމުކުރާތީ ގިނަ ބައެއްގެ ފާޑުކިޔުން ވެސް އަމާޒުވެފައިވާ މީހެކެވެ. އެކަމަކު އޭނާ އޭގެ ވީޑިއޯތައް ހެދުން ހުއްޓައެއް ނުލަ އެވެ.

ޓިކްޓޮކް ބޭނުންކުރުމުގެ އުސޫލު ބުނާ ގޮތުން ބަރަހަނާ މަންޒަރު ޓިކްޓޮކަށް ލުމަކީ މަނާ ކަމެކެވެ. އެހެންވެ ވީޑިއޯ އާންމުކުރުމުން، އޭނާގެ އެކައުންޓް ވަނީ ބޭންކޮށްފަ އެވެ.

ޖިންސީ ގުނަވަންތައް ހާމަކުރުމާއި ހުއްދަ ނޫން ޖިންސީ ކަންކަމަށް ހިތްވަރު ދިނުން ފަދަ ކަންކަމަކީ ރާއްޖޭގެ ގާނޫނުލް އުގޫބާތުގެ ދަށުން އަދަބު ލިބޭ ކުށްތަކެވެ.