އުމުރުން 83 އަހަރުގެ ސަމީހާ. އޭނާއަށް މިހާރު އެހީތެރިވަނީ އަވަށްޓެރިން. -- ފޮޓޯ: އަލީ އަންވަރު
21 ޑިސެމްބަރ 2018 - 13:59
42 comments
ސ. ހުޅުދު އަށް އުފަން، ސަމީހާ ހަސަން، 83، ބިން މައްޗަށް ވެއްޓިފައި އޮންނަ ދުވަސް ދުވަހު، އެ ގެއަށް ގޮސް ނަގައި އެހީތެރިވަނީ އަވަށްޓެރިންނެވެ. ސަމީހާގެ ފިރިއަކު، ދަރިއަކު ނެތް އިރު، އެއްބަނޑު އެއްބަފާ މުހައްމަދު ހަސަން ވެސް ހުރީ އެހީވެވޭ ހާލަތެއްގައެއް ނޫނެވެ. މުހައްމަދުގެ އުމުރުން 90 އަހަރަށް ވުރެ މަތިވެ، ގައިގެ ބާރު ވެސް ވަނީ ދޫވެފަ އެވެ.
ސަމީހާގެ ފިރިމީހާ އަލިފުތާ މަރުވީ މީގެ ބާވީހަކަށް އަހަރު ކުރިންނެވެ. އޭގެ ފަހުން ސަމީހާ ދިރިއުޅެމުން ދަނީ އެކަނިމާއެކަންޏެވެ.
މީގެ ދިހަ އަހަރެއްހާ ދުވަސް ކުރިން އޭނާގެ ސިއްހީ ހާލަތު ރަނގަޅެވެ. އެކަމަކު ގައިބާރު ދޫވެ، ހެލިފެލުވުމުގައި ދަތިތަކާ ކުރިމަތިލާން ޖެހުމުގެ ސަބަބުން ވެއިތުވެދިޔަ އަށް އަހަރު ދުވަހު ސަމީހާ އޮންނަން ޖެހުނީ ބަލި އެނދުގަ އެވެ.
ސަމީހާގެ އެއް ފަޅީގެ ވާގި ގާތްގަނޑަކަށް ވަނީ ގޮސްފަ އެވެ. ހިނގަން ޖެހެނީ ތަންތަނުގައި ހިފަހައްޓައިގެންނެވެ. ބޭރަށް ނުކުމެ، ހެދުމަކީ ކުރަން ފަސޭހަ ކަމެއް ނޫނެވެ. އެހެންވެ، އަބަދުވެސް މިހާރު އޮންނަން ޖެހެނީ އެނދުގަ އެވެ.
ސަމީހާ އަށް އެހީތެރިކަން ފޯރުކޮށްދޭން ތިމާގެ މީހަކު ނުދެ އެވެ. އޭގެ ބަދަލުގައި ސަމީހާގެ ހުރިހާ ކަމެއްހެން މިހާރު ބަލަހައްޓަނީ އަވަށްޓެރިންނެވެ.
ސަމީހާގެ ވާހަކަ ފޭސްބުކްގައި ޖެހީ ކުރިން ވެސް މިފަދަ އިޖުތިމާއީ މައްސަލަތައް އާންމުންގެ ސަމާލުކަމަށް ގެނެސްފައި ހުރި ހުޅުދޫ އަލީ އަންވަރެވެ. އޭނާ މީގެ ކުރިން ވަނީ އުމުރުން 79 އަހަރުގެ އަލިތަކުރުގެ ނިކަމެތި ހާލު އާންމުންނާ ހިއްސާކޮށްފަ އެވެ. އެކަން ޖެންޑާ މިނިސްޓްރީގެ ސަމާލު ކަމަށް އައިސް، އަލިތަކުރު މިހާރު ވަނީ ދައުލަތުގެ ބެލުމުގެ ދަށަށް ގެންގޮސްފަ އެވެ.
އަންވަރުގެ ޕޯސްޓްގައިވާ ގޮތުން ސަމީހާއަކީ ފިރިއަކު އަދި ދަރިއަކު ނެތި ފަޅުގެއެއްގައި ދިރިއުޅޭ ބަލި އަންހެނެކެވެ. ބަލި ހާލު ބޮޑުވެ ތަންމަތީގައި އެކަނިވީ ދުވަހު، އަޅާލާނެ މީހަކު ނެތް ކަމަށް އެ ޕޯސްޓްގައިވެ އެވެ.
"މިހާރު" އާ ވާހަކަ ދައްކަމުން އަންވަރު ބުނީ ބަލި ނަމަވެސް،ސަމީހާއަކީ ވަރަށް "ލޯ އަލި" މީހެއް ކަމަށެވެ. އެގޮތުން ކަމެއް ބޭނުންވިޔަސް، ސަމީހާ ފޯނުން ގުޅާފައި ބުނަނީ އަވަށްޓެރިން ގާތުގައި ކަމަށް އަންވަރު ބުންޏެވެ. އޭނާއަށް އަވަށްޓެރި ތިން ގެއަކުން އަންނަނީ އެހީތެރިވަމުންނެވެ.
"ސަމީހާއަކީ ފޯނު ފަސޭހަ އިން ބޭނުންކުރެވޭހާ ލޯ އަލި މީހެއް. އަވަށްޓެރިންގެ އެހީ ހޯދާނީ ފޯން މެދުވެރިކޮށް ގުޅައިގެން. އަވައްޓެރިން ގާތުގައި ބޮޑަށް ބުނާނީ ކާބޯތަކެތި ހޯދައިދޭން. މަދު ފަހަރެއްގައި ފާހަނާއަށް ދާން އަވަށްޓެރިން އެހީވާން ޖެހެނީ،" އަންވަރު ބުންޏެވެ.
"ބައެއް ރޭތަކުގައި ބިންމައްޗަށް ވެއްޓިފައި އޮންނާނީ. އަމިއްލައަށް ނުވެސް ތެދުވެވޭނެ. އެކަމަކު ހެނދުނު ގުޅާނެ އަވަށްޓެރިންނަށް. [އެކަހަލަ ވަގުތެއްގައި] ގިނަ ފަހަރު އެމީހުން ސަމީހާ ގެންގޮސް އެނދަށް ލާނީ ވެސް."
އަންވަރު ބުނި ގޮތުގައި ފަހުން އައިސް، ސަމީހާ އަށް އެކަނިވެރިކަން މާ ބޮޑަށް އިހްސާސްވީ އެވެ. އެގޮތުން، ގޭގެ ސަލާމަތްތެރިކަމާ މެދު މާ ބޮޑަށް ސަމީހާ ވިސްނަން ޖެހުނީ ކަމަށް އަންވަރު ބުންޏެވެ. އޭނާގެ ގެއަށް ވަގުން ވަދެ، އެކި ފަހަރު ވައްކަން ކޮށްފައި ހުރި ކަމަށް ވެސް އަންވަރު ބުންޏެވެ.
ސަމީހާ އަށް މިވަގުތު އެންމެ ބޮޑަށް އެހީވަމުން އަންނަ ދެ އަވަށްޓެރިންނަކީ އަންވަރުގެ އަންހެނުން ސަފޫރާ ހަސަނާއި ހުޅުދޫ ސްކޫލްގެ ޕްރިންސިޕަލް ޕަވީލް އަބްދުލްމުހުސިނެވެ. އޭގެ އިތުރުން، ނަންރީތި މާގެ، ސިނާރީ، އަދި ގްރޭވީ ވިލާގައި ދިރިއުޅޭ މީހުން ވެސް ސަމީހާ އަށް ބޮޑެތި އެހީތަކެއްވެ އެވެ.
އަންވަރު ކިޔައިދިން ގޮތުގައި ސަމީހާގެ ހުރިހާ ކަމެއް ހަމަޖައްސަނީ އުމުރުން ދުވަސްވީ މީހުންނަށް ސަރުކާރުން ދެމުން އަންނަ 5،000ރ. އިންނެވެ. އެ ފައިސާ އިން ސަމީހާގެ ކެއުން ބުއިމާއި އެހެނިހެން ހަރަދުތައް ހަމަޖައްސާ އިރު، އެހީތެރިވާ ބައެއް މީހުން ފައިސާގެ އެހީ ވެސް ދީފައި އެބަ ހުއްޓެވެ.
ސަމީހާއަކީ އެއްވެސް އިރެއްގައި އެއްވެސް ކަހަލަ ވަޒީފާއެއް އަދާކުރި މީހެއް ނޫނެވެ. އެކަމަކު ގައިބާރު ހުރި ދުވަސްވަރު އަވަށްޓެރިންގެ ގޭގެއަށް ގޮސް، މަސައްކަތްކޮށްދީ ހެދި އެވެ.
ސަމީހާގެ ބަލި ހާލަތު ވަރަށް ބޮޑަށް ގޯސްވުމާ ގުޅިގެން އިއްޔެ ހުޅުދޫ ހެލްތު ސެންޓަރަށް ގެންދަން ޖެހެނެވެ. އެކަމަކު މިހާރު ވަނީ އަލުން ގެއަށް ބަދަލުކޮށްފަ އެވެ.
އެތައް ހާސް ދިވެހިންނެއް ކޮންމެ ދުވަހަކު ވަންނަ ފޭސްބުކުގައި ސަމީހާއާ ބެހޭ މައުލޫމާތު ހާމަކޮށް، އަންވަރު ބޭނުންވަނީ ސަމީހާ ބަލާނެ މީހެކެވެ.
ހުޅުދޫގައި ހުންނަ ޖެންޑާ ޑިޕާޓްމަންޓްގައި މަސައްކަތް ކުރަމުން އަންނަ އަންވަރަށް ހުޅުދޫން ހަމަގައިމުވެސް ފެންނަނީ ހިތްދަތި މަންޒަރެކެވެ. އެކަނިވެފައިވާ އަދި އާއިލާގެ އެހީތެރިކަން ނުލިބޭ އުމުރުން ދުވަސްވީ އެތައް ބައެކެވެ. މިފަދަ މީހުންނަށް އެންމެ ބޮޑަށް ބޭނުންވާނީ އަޅާލުމާއި ލޯބި ކަން އަންވަރު ފާހަގަކުރި އެވެ.
"ސަރުކާރުން އުމުރުން ދުވަސްވީ މީހުންނަށް 5000ރ. ގެ އިނާޔަތެއް ދިނަސް، ރަނގަޅު ސިއްހީ ހިދުމަތަކާއި އަޅާލުމާއި އެހީތެރިކަން އެންމެ ބޮޑަށް ބޭނުންވާނީ. އަސްލު މިކަހަލަ މަންޒަރު ރަށުން ފެނިފައި ވަރަށް ހިތްދަތިވޭ،" ގާތްގަނޑަކަށް 1100 މީހުން ދިރިއުޅޭ ހުޅުދުއަށް އުފަން އަންވަރު ބުންޏެވެ.
އޭނާ ބުނި ގޮތުގައި، ސަމީހާގެ ބަލަދުއަރާ މީހުންނާ ވާހަކަ ދައްކައިގެން ހައްލެއް ލިބޭތޯ އަންނަނީ މަސައްކަތްކުރަމުންނެވެ. އަދި އޭނާގެ ހާލަތު ޖެންޑާ މިނިސްޓްރީގެ ސަމާލު ކަމަށް ވެސް މިހާރު ވަނީ ގެނެސްފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދިވެއްސެއްކޭ
25 December 2018
ހާދަހާ ދެރަވާހަކައެކޭ، އެކަކުއަނެކަކަށް އޯގާތެރިވޭ އަޅާލާން އާދަ ކުރޭ... ކޮންމެ މީހަކުވެސް ކުރަމުންގެންދަނީ ހަނގުރާމަ އެއް... ހިތްތިރިކުރޭ... ލޯތްބާއި އޯގާތެރިކަން އާލާކުރޭ... އާދޭސްކޮށްފައި
އިބިރިހިންބެއްޔާ
23 December 2018
ވިސްނާލަންޖެހޭ ވަރަށް މުހިންމު ކަމެއް. އަހަރުމެނަށް 65 ވުމުގެ ކުރިން ރަގަޅު ހައްލެއް ހޯދަންޖެހޭ. މަހަކު 5،000 ރުފިޔާ ދިއްކޮއްލުމުގެ ބަދަލުގައި "ސީނިއަރ ހިޔާ" ހަދާ އެތަނުގައި ދިރިއުޅެން ބޭނުންވާ މީހުން (އެގޮތަށް އެދޭފަރާތްތަކަށް) ދައުލަތުގެ ޚަރަދުގައި ބެލެހެއްޓުމުގެ އިންތިޒާމު ހަމަޖައްސަން ފެނޭ. ކޮންމެ އަތޮޅެއް ނުވަރަ ރަށެއްގައި މިފަދަ އިންތިޒާމެއް ޤާއިމުކޮއް ކައުންސިލްތަކާއި ވޮލަންޓީރުން މިކަން ހިންގުން ވ.ރަގަޅުކަމަށް ފެންނަވާހަކަ ދަންނަވަން.
ފަލަ
23 December 2018
އެދައްތައަށް ވިއްޔާ މުސްކުޅިވެ ގައިބަރު ދެރަވި ދުވަހު ވަދެލާނެ ހިޔަޗައްސެއްވެސް އެބަ އޮތްތާ. މިހާރު ސަރުކާރުން ހަމަޖައްސާފައި އޮންނަ އުސޫލަށް ބަލައިރު ދަރިންނާ ފިރިން، ނެތް މީހުނަށް ފްލެޓްގަނޑެއްވެސް ލިބުމުން މަހުރޫމު ވާން ޖެހޭ. އެކަހަލަ މީހުން މުސްކުޅި ވާދުވަހު އެމީހުންގެ ހިމާޔަތަ ރައްކާތެރި ކަމަށްޓަކައި އެއްވެސް ކަމެއް ނުކުރެވޭ. އެކަމަކު އިންތިޚާބުތަކާ ދިމާކޮށް މިއުޅޭ ސިޔާސީ މީހުން ހީވާނީ ރައްޔިތުންނަށް ލައްކަ ހެޔޮ އެދެޔޭ. އަންތަރީސްވޭ ހަމަ
އަމާ
23 December 2018
ކޮބައިތަ މޮޅު ސިޓީ ކައުންސިލް ސޯބެމެން. ސޯބެމެން ލަދުގަންނާނެބާ؟
ދެރަ
22 December 2018
ރަށްެރަށުގައި މިފަދަ މީހުން އަދިވެސް ދާނީ ގިނަވަމުން. ސަބަބަކީ މާލޭ މިކިޔާތަނަށް އެންމެން ހިޖްރަކުރާތީ.
ޔެސް
21 December 2018
ބޮޑުމުސާރަ ނަގައިގެން ތިބޭ ކައުންސިލަރުންގެ ޒިންމާ ކޮބާ؟ އަވަށްޓެރިންގެ ހެޔޮފުޅުކަމުން ކަމެއް ކޮށްދިނަސް ސަރުކާރުގެ ޒިންމާ ކޮބާ؟ ނިކަމެތި ޙާލުގައި މިގޮތުގައި އެކަނިމާއެކަނި އުޅޭ މީހާއަށް ސަރުކާރު ކޮށްދެނީ ކޮންކަމެއް؟ ފަސްހާސްރުފިޔާ ދިނުމުން ނުފުދޭ. ދަރިންނާއެކު އުފަލާާ އަރާމުގައި އުޅޭމީހާއަށްވެސް އެފައިސާ އެބަލިބޭ. ނިކަމެތި އެކަނިވެރިޔާ އަށް އޮތީ ހަމަ ނިކަމެތިކަން ބާ؟
ކަކުނިބޯ
23 December 2018
ކަލޭ ކޮބާ އެއަށްފަހު އެހެންމީހުން... ލަދު ކޮބާ
އަސޫމް
23 December 2018
ހުރިހާކަމެއް ސަރުކާރުން ކިހިނެއްކުރާނީ. ވިސްނާބަލަ. 5000 ރުފިޔާއަކީ މަދުޢަދަދެއްނޫން. ސަރުކާރުގައި ދުވާލު 8 ގަޑިއިރު މަސައްކަތްކުރީމަވެސް 5000 ރުފިޔާ ނުލިބޭ މުއައްޒަފުން ބައިވަރު. ހުރިހާކަމެއް ސަރުކާރާ މަތިކުރާއިރު ތިމާމެންގެ ޒިންމާކޮބާ؟ ބަލިމީހާ ސަރުކާރުގެ ބެލުމުގެދަށަށްގެނެސް ބަލަމުންގޮސް މަރުވާއިރަށް މުދަލާ ބައްދާނެ ޢާއިލާމީހުން ބައިވަރު. ތިމާމެންގެ އަޚްލާގާއި ޒިންމާ، މުޖުތަމަޢްގެ ލޯބި ކުލުނު ކޮބައި؟
ކޮއެ
21 December 2018
ބަލަތިބުނާ ގާތްތިމާގެ މީހުން ތިބިނަމަ އަޅާލާނަމަ މިއަދު އެހާލުގަ ނޫޅޭނެ ކަންނޭނގެ ދޯ...؟؟ އެއީ ރަށު ކައުންސިލް އާއި ދައުލަތުގެ އިހުމާލުންވާ ކަންތައް
ނަފީސާހަސަން
21 December 2018
ސަމީހާގެ ފޮޓޯ ނޫހުގަ ޖެހީތީ ހިތާމަކުރަން. އަލީއަންވަރު މަޝްހޫރުވާން ކުރާކަމެއް. ސަމީހާގެ އަވައްޓެރިން އަދި ގާތް ރަހުމަތްތެރިން ދަނީ ސަމީހާ ބަލަމުން. މިދުވަސްވަރު ސްކޫލް ޗުއްޓީ ދުވަސްވަރުކަމަށްވާތީ ސަމީހާ އެއްމެ އެހީތެރިވާ އަވައްޓެރިން ރަށުގަ ނޫޅޭތީ ސަމީހާ ހިތްދަތިކަން އިހުސާސްވީމާ. ސަމީހާ ދިރިއުޅެނީ ސަމީހާގެ އަމިއްލަގޭގަ އަވައްޓެރިންގެ އެހީއާއެކު. އަލީއަންވަރަށް ދަންނަވަން މީިހުންގެ ފޮޓޯތައް ފޭސްބުކަށްލާ، ނޫސްތަކަށް އަރުވާ ނެހެދުމަށް
އިންސާފް
21 December 2018
މައްސޫރު ވާންވިޔަސް އަންވަރަށްތާ މިވާހަކަ ތިލަކޮށްލަން ކެރުނީ.. ނަފީސާ އަކަށް ނުކެރުނެނުދޯ.. ސަރުކާރުގެ ސަމާކުކަމަށް މިކަން މިހާރު މިއޮތީ އައިސްފަ. އެހެންކަމުން އަންވަރުގެ މަސައްކަތަކީ ރަނގަޅު މަސައްކަތެއް. އޭނާގެ ނިޔަތް ﷲ ދެނެވޮޑިގަންނަވާނެ..
ދ މޯހެއް
21 December 2018
ސ މީހުން ނޫނީ އެހާލުގައި މީހަކު ނޫޅެނީ ބާ؟
ޕީޖޭ
21 December 2018
އެމީހަކު ދުނިޔޭގައި އުޅުނު ގޮތެއް އެމީހަކަށް ދައްކަވާނެ..އެމީހަކަށް އުފުލޭވަރުގެ ތަކުލީފެއް ﷲ އެމީހަކަށް ޖައްސަވާނީ..ފުލުހުން ނޫނިއްޔާ ތިފަދަކަމަކާއި ވެސް އަޅާލާ ބައެއް ނެތްކަން ފާހަގަ ކުރެވޭ..ވަގުތުން ވަގުތަށް އެމީހާ ދައުލަތުގެ ބެލުމުގެ ދަށަށް ގެންދިއުމަށް ގޮވާލަން..ﷲ އެމީހާއަށް ކެތްތެރިކަން ދެއްވާށި އަދި ފާފަ ފުއްސަވާންދޭ އަދި އެހާލަތުން ސަލާމަތްކޮށް ދެއްވާށެ..