ސައުދީގެ ވެރިން ގެނައި ފުރަތަމަ ކުޅުންތެރިޔަކީ ޓްރިޕިއާ

ނިއުކާސަލް (ޖެނުއަރީ 7) - އެތުލެޓިކޯ މެޑްރިޑަށް ކުޅެމުން އަންނަ އިނގިރޭސި ޑިފެންޑަރު ކީރެން ޓްރިޕިއާގެ ސޮއި ނިއުކާސަލް ޔުނައިޓެޑުން ހޯދައިފި އެވެ.

ކުރިން ބާންލީ އާއި ޓޮޓެންހަމަށް ވެސް ކުޅުނު ޓްރިޕިއާ ނިއުކާސަލް އަށް ގެނައީ 12 މިލިއަން ޕައުންޑަށެވެ.

ޓްރިޕިއާ އަކީ މިދިޔަ އޮކްޓޯބަރު މަހު ސައުދީ އަރަބިޔާގެ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ނިއުކާސަލް ހިންގަން ފެށި ފަހުން އެ ކުލަބަށް ގެނައި ފުރަތަމަ ކުޅުންތެރިޔާ އެވެ.

ސްޕެއިންގެ އެތުލެޓިކޯ މެޑްރިޑާ އެކު މިދިޔަ ސީޒަނުގެ ލަ ލީގާ ވެސް ކާމިޔާބުކުރި ޓްރިޕިއާ އެ ޓީމާއެކު ބާކީ 18 މަސް އޮއްވައި ނިއުކާސަލް ޔުނައިޓެޑަށް ބަދަލުވީ 2023/2024 ވަނަ ސީޒަނުގެ ނިޔަލަށެވެ.

އެޑީ ހޯވްއާ އެކު 2012 ވަނަ އަހަރު ޓްރިޕިއާ ވަނީ ބާންލީގައި ކުޅެފަ އެވެ. ހޯވްއާ އެކު އަލުން މަސައްކަތް ކުރަން ލިބުމުން ހިތްހަމަ ޖެހިފައި ހުރި ޓްރިޕިއާ ވަނީ މި ސީޒަނުގައި އެތުލެޓިކޯ އަށް 15 މެޗު ކުޅެދީފަ އެވެ. އޭނާ ވަނީ 20 މިލިއަން ޕައުންޑަށް އެތުލެޓިކޯ އަށް ބަދަލުވުމުގެ ކުރިން 2019 ވަނަ އަހަރު ޓޮޓެންހަމުން ޗެމްޕިއަންސް ލީގު ފައިނަލުގައި ކުޅުނު ސްކޮޑުގައި ވެސް މޮޅު ކުޅުމެއް ދައްކައިފަ އެވެ.

ޓޮޓެންހަމްގައި ދެއްކި މޮޅު ކުޅުމާ އެކު ޓްރިޕިއާ އަށް ވަނީ އިނގިރޭސި ސީނިއާ ގައުމީ ޓީމުން ވެސް ޖާގަ ލިބިފަ އެވެ. ގައުމީ ޓީމަށް 35 މެޗު ކުޅެދިން ޓްރިޕިއާ ވަނީ އެންމެ ފަހުން 2018 ވަނަ އަހަރު ބޭއްވި ވޯލްޑް ކަޕް ސެމީ ފައިނަލަށް ދަތުރުކުރި އިނގިރޭސި ޓީމާއި، މިދިޔަ އަހަރު އޮތް ޔޫރޯ ފުޓުބޯޅަ މުބާރާތުގެ ފައިނަލުގައި ކުޅުނު އިނގިރޭސި ޓީމުގައި ވެސް ކުޅެފަ އެވެ.

ކުލަބުގެ މެޖޯރިޓީ ހިއްސާއާ އެކު ޕީއައިއެފް އިން 300 މިލިއަން ޕައުންޑް (408 މިލިއަން ޑޮލަރު) އަށް ނިއުކާސަލް ގަތްއިރު، ފައިނޭންޝިއަލް ފެއާޕްލޭ (އެފްއެފްޕީ) ގަވާއިދުގެ ދަށުން ޖެނުއަރީ ޓްރާންސްފާގައި އެޓީމުން 200 މިލިއަން ޕައުންޑް (272 މިލިއަން ޑޮލަރު) ހަރަދުކުރުމުގެ ފުރުސަތު އެބަ އޮތެވެ. ޕީއައިއެފްގެ މިލްކިއްޔާތުގައި 320 ބިލިއަން ޕައުންޑް (434 ބިލިއަން ޑޮލަރު) އެބަހުއްޓެވެ.