މާޝަލް އާޓްސްގެ ޓައެކްވޮންޑޯ ކޯޗު ކިނާންގެ ޓާގެޓަކީ އައިއޯއައިޖީން ރަން މެޑަލް

މާޝަލް އާޓްސް އަކީ ރާއްޖޭގައި މި ފަހުން ފަށައި މަޑުމަޑުން އޭގެ ކޮމިޔުނިޓީ ހެދި ބޮޑުވަމުން އަންނަ ކުޅިވަރެކެވެ. މިއީ ކުޅިވަރެއް ގޮތަށް އެކަނި ބެލޭކަށް ވެސް ނެތެވެ. ނުރައްކާތެރި ހާލަތްތަކުގައި އަމިއްލަ ނަފްސު ދިފާއު ކުރާނެ އުކުޅުތަކާއި މީހާ ޑިސިޕްލިން ކޮށްދީ، އަނެކާ އަށް އިހުތިރާމް ކުރުމާއި އިހުރިރާމް ލިބިގަތުމުގެ އިތުރުން ހިތްވަރު ކުރުމާއި ކެތްތެރިވުމުގެ ސިފަ، މާޝަލް އާޓްސްގެ އެކި އުކުޅުތަކުން އަށަގަންނާނެ ކަމަށް އެ ކުޅިވަރުގެ ތަޖުރިބާކާރުން ބުނެ އެވެ.

މާޝަލް އާޓްސް ހުނަރާއި އޭގެ ޑިސިޕްލިން ދަސްކޮށް ދިނުމަށް ރާއްޖޭގައި އެންމެ ބޮޑަށް މަސައްކަތް ކުރަމުން އަންނަ އެކަކީ ޝާކްސް މާޝަލް އާޓްސް އެކަޑަމީގެ ހެޑް ކޯޗު މޮރޮކޯގެ ކިނާން އަދުނާނެވެ. މާޝަލް އާޓްސްގައި އޭނާ ހާއްސަވެފައި އެ ކުޅިވަރުގެ ވާޝަންއެއް ކަމަށްވާ ޓައެކްވޮންޑޯ އަށެވެ. ދެކުނު ކޮރެއާއިން ތައާރަފު ކުރި ޓައެކްވޮންޑޯގައި ރާއްޖޭގައި މިވަގުތު ހުރި އެންމެ ތަޖުރިބާކާރު ނަމަކީ ކިނާން އެވެ.

ރަސްމީ ހައިސިއްޔަތެއްގައި ޓައެކްވޮންޑޯ ރާއްޖޭގައި ފެށިތާ ވީ އަދި ކުރު މުއްދަތެކެވެ. އެކަމަކު އެ މުއްދަތުގައި ކުރެވުނު މަސައްކަތާ މެދު ހިތްހަމަޖެހިގެން ހުރި ކިނާންގެ މިހާރު ވެސް ހުރި ރަން ވަނަ އަކަށް އޭނާގެ ވަރުގަދަ އެ އަޒުމު ނަގައިގައި ކޮނޑުމައްޗަށް ޖަހައިގެންނެވެ. ރަން މެޑަލް ނޫން އެއްޗެއް އޭނާގެ މިސްރާބަކަށް ނާރަ އެވެ.

މޮރޮކޯގެ ކޯޗު ކިނާން އެންމެ ފުރަތަމަ ރާއްޖެ އައީ މީގެ ދޮޅު އަހަރެއްހާ ދުވަސް ކުރިން، ރާއްޖޭގައި ތަމްރީނު ހާސިލް ކުރަމުންދާ މާޝަލް އާޓްސް ކޯޗުންނާއި ރެފްރީންނަށް އޭނާގެ ތަޖުރިބާ ހިއްސާ ކުރުމަށެވެ. ނަމަވެސް އޭނާ ބޭނުންވީ ރާއްޖޭގައި ޓައެކްވޮންޑޯ ދަސްކުރަން ބޭނުންވާ ކުދިންނަށް ޕްރޮފެޝަނަލް ޓްރޭނިން ފޯރުކޮށްދީ އެ ކުދިން ބައިނަލްއަގުވާމީ މައިދާނަށް ނެރުމަށެވެ.

"ރާއްޖޭގައި އަލަށް ފަށި ކަމެއްވީމަ އަހަރެންގެ ތަޖުރިބާ ދިވެހި ކުދިންގެ ކޯޗަކަށް ވާން ފުރުސަތު ލިބުނީމާ ވަރަށް އުފާވޭ،" ވޯލްޑް ޓައެކްވޮންޑޯ ފެޑެރޭޝަން ގްރޯންޕްރީގެ ޗެމްޕިއަންކަން ކުރި ހޯދި ކިނާން ބުންޏެވެ.

މޮރޮކޯ މާޝަލް އާޓްސް ފެޑެރޭޝަންގެ ސެޓިފައިޑް ޓައެކްވޮންޑޯ ކޯޗިން ލައިސެންސް އޮންނަ ކިނާން ބުނީ އެ ކުޅިވަރުގެ ކޯޗެއްގެ ގޮތުގައި އޭނާ އެންމެ ފުރަތަމަ މަސައްކަތް ފެށީ އޭނާ އަށް ތަމްރީން ދިން ހެޑް ކޯޗުގެ އެސިސްޓެންޓެއްގެ ގޮތުގައި ކަމަށެވެ.

"ކޯޗަށް އެހީވާން އުޅުމުގެ ތެރޭގައި އަހަރެންނަށް އިހުސާސް ކުރެވުނު އަހަރެންނަށް ވެސް ޓައެކްވޮންޑޯ ދަސްކޮށްދެވޭނެއޭ އެހެން ގައުމުތަކުގައި ވެސް،" 2017 ގައި ޓައެކްވޮންޑޯ ކޯޗެއްގެ ގޮތުގައި މަސައްކަތް ފެށީ ކިނާން ބުންޏެވެ.

ރާއްޖޭގައި އަލަށް ފަށައިގަތް އިރު ތަފާތު ކުޅިވަރަކަށް ވުމުން އުނދަގޫތަކަކާ އޭނާ ކުރިމަތިލާން ޖެހުނެވެ. މި ކުޅިވަރަކީ ތަޅާފޮޅަން މަގުފަހިކޮށްދޭ ކަމެއް ކަމަށް ބައެއް ބެލެނިވެރިންނަށް އޮތީ ވިސްނިފަ އެވެ. ބެލެނިވެރިންގެ އެ ވިސްނުން ބަދަލު ކުރަން އޭނާ އަށް ވެސް އެންމެ ފުރަތަމަ މަސައްކަތް ކުރަން ޖެހުނެވެ.

"ބުނާނެ ކީއްވެހޭ ތިމަންނަގެ ދަރިފުޅަށް ތަޅަން ދަސްކޮށް ދޭން ގެންދަންވީ. މިއީ އުނދަގޫވި ކަމެއް. އަހަރެން މިކަން ވިސްނައިދިނިން. ޓައިކްވަންޑޫ އަކީ މާޝަލް އާޓްސްގެ ޑިސިޕްލިން އެއް ކަމަށް. އެކަމަށް ހައްލެއް ހޯދައި، މިހާރު ބައެއް ކްލާސްތަކުގައި އެބަތިބި ތަމްރީނު ހަދާ ދަރިންނާއި ބެލެނިވެރިން އެކުގައި،" ކިނާން ބުންޏެވެ.

ނަމަވެސް ރަނގަޅު މައުލޫމާތު ފޯރުކޮށްދީގެން ހޭލުންތެރިކަން އިތުރުކޮށް، ވަކިވަކިން ވެސް ބެލެނިވެރިންނާ ވާހަކަ ދައްކައިގެން ބެލެނިވެރިން ގެންގުޅުނު ނުރަނގަޅު ވިސްނުން ބަދަލު ކުރެވުނު ކަމުގެ ހިތްހަމަޖެހުން މިހާރު އޭނާ ފާޅު ކުރެ އެވެ.

"މިއީ ޕްރޮފެޝަނަލް ކުޅިވަރެއްކަން ބެލެނިވެރިންނަށް ވިސްނައިދެވިއްޖެ،" އޭނާ ބުންޏެވެ.

"ނަތީޖާއެއްގެ ގޮތުން ރާއްޖޭގެ މާޝަލް އާޓްސް ލެވެލް މިހާރު ވަރަށް ކުރިއަރައިފި، އަލަށް ފެށި ކުޅިވަރަކާ ބަލާފައި. ހާއްސަކޮށް ކިކް ބޮކްސިން އާއި ޓައެކްވޮންޑޯގައި އެންމެ މަތީ ލެވެލްގެ އެތުލީޓުން އެބަތިބި."

މަޑުމަޑުން ފުޅާވަމުން އަންނަ މި ކުޅިވަރު މިހާރު ވަނީ މާލެއިން ބޭރުގައި ވެސް ކުރިއަށްގެންދާން ފަށައިފަ އެވެ. ޝާކްސް އެކަޑަމީގެ ފަރާތުން މިހާރު އައްޑޫގައި ވެސް ކްލާސްތަކެއް ވަނީ ފަށައިފަ އެވެ. މާލޭގައި ބައެއް ސްކޫލުތަކުގައި ވެސް މިހާރު މާޝަލް އާޓްސް ކްލާސްތައް ކުރިއަށް ގެންދެ އެވެ.

ޓައެކްވޮންޑޯ އަކީ ކުޅިވަރެއްގެ އިތުރުން ވެސް އެމީހާއަށް އެތައް ފައިދާއެއް ލިއްބައިދޭ ހުނަރެކެވެ. މިކަން ސާބިތު ކޮށްދޭން ކިނާން ދިނީ ރާއްޖޭގައި އޭނާ ތަމްރީނު ކުރި ދަރިވަރެއްގެ މިސާލެވެ.

"ރާއްޖޭގެ ޓައެކްވޮންޑޯ އިންޓަނޭޝަނަލް ބްލެކް ބެލްޓް ހާސިލް ކުރި ދަރިވަރެއް އުޅޭނެ އަހަރެން ތަމްރީނު ކޮށްދިން. އޭނާ ބޭނުންވީ މިލިޓަރީއަށް ވަންނަން. އެތަނަށް ވަންނަން ފިޓްނަސް ޓެސްޓުތައް ހުންނާނެ، ޕުޝަޕްސް ހެދުން ކަހަލަ، މީހާގެ އެންޑިއުރަންސް ދެނެގަންނަން. އެކަންކަން އޭނާ އަށް ވަރަށް ފަސޭހަވި. ފިޓްނަސް ޓެސްޓު ފުރިހަމަ ކޮށްލާކަށް އޭނާއަށް އެއްވެސް އުނދަގޫ ކަމަކަށް ނުވި. މިއީ ހުނަރެއް، މީހާ ފިޒިކަލީ އަދި މެންޓަލީ ވެސް ރަނގަޅު ވާނެ. ސެލްފް ޑިފެންސާއި ބުންވަރު ރަނގަޅު ކޮށްދީ، މޮޅުވުމާއި ބަލިވުމަކީ ވެސް ގަބޫލު ކުރަންޖެހޭ ކަންތައް ކަން ދަސްކޮށްދޭނެ،" އާއްމު ކިނާން ބުންޏެވެ.

ރާއްޖޭގައި މި ކުޅިވަރު ކުރިއަރާފައިވާ މިންވަރާ އަޅާބަލާއިރު ނިސްބަތުން ހުނަރުގެ ގޮތުން ރަނގަޅު އެތުލީޓުން އެބަ ތިބި ކަމަށް ކިނާން ގަބޫލު ކުރި އެވެ. ކިނާން ބޭނުންވަނީ އެ އެތުލީޓުންނަށް ރަނގަޅު ތަޖުރިބާ ހޯދައިދީ، ބައިނަލްއަގުވާމީ މައިދާނުގައި ރާއްޖެއަށް މެޑަލް ހޯދައިދެވޭ ފެންވަރަށް އެ އެތުލީޓުން ގެންގޮސްދޭށެވެ.

"ޕްރޮފެޝަނަލް އެތުލީޓުން އެބަތިބި މިހާރު. މަސައްކަތް ކުރަނީ އެމީހުންގެ ފަރާތުން އެންމެ ބެސްޓް ނެރެވޭތޯ. ރާއްޖޭގެ އެތުލީޓުންގެ ފަރާތުން ރަނގަޅު ކުރިއެރުން ފެނޭ. އިރާދަކުރެއްވިއްޔާ މެޑަލް ހޯދޭ ފެންވަރަށް ގެންގޮސްދިނުން އެއީ އަހަރެންގެ އުންމީދެއް،" ރާއްޖެއަށް މި ކުޅިވަރުން ކުރިމަގުގައި ހާސިލް ކޮށްދޭން ބޭނުންވާ ޓާގެޓަކީ ކޮބައިތޯ ސުވާލުކުރުމުން ކިނާން ބުންޏެވެ.

"އިންޓަނޭޝަނަލް ބްލެކް ބެލްޓް ހާސިލް ކޮށްފައި ތިބި ފަސް ކުޅުންތެރިން އެބަތިބި. އޭޝިއަން ގޭމްސް އަށް ވެސް މިކުދިން ފޮނުވަން އަހަރެން ބޭނުންވޭ. އިރާދަ ކުރެއްވިއްޔާ ވޯލްޑް ޗެމްޕިއަންޝިޕަށް ދެވޭ ފެންވަރަށް މިކުދިން ކުރިއަރައިދިޔުން އެއީ ވަރަށް ބޮޑު އުންމީދެއް."

މިދިޔަ އަހަރު ރާއްޖޭގެ ޓައެކްވޮންޑޯ އެސޯސިއޭޝަނުން ވަނީ އޭޝިއާގެ ފެޑެރޭޝަނާއި ދުނިޔޭގެ ފެޑެރޭޝަންގެ މެންބަރު ގައުމަކަށް ވެފަ އެވެ. ރާއްޖެއަކީ ޓައެކްވޮންޑޯ ފެޑެރޭޝަނާ ގުޅުނު 212 ވަނަ ގައުމެވެ.

މިއަހަރުގެ އިންޑިއަން އޯޝަން އައިލެންޑް ގޭމްސްގައި ރާއްޖޭން ފުރަތަމަ ފަހަރަށް ޓައެކްވޮންޑޯ ގައި ވާދަކުރަން ވަނީ ނިންމައިފަ އެވެ. ކިނާން ބުނީ އޭނާގެ ޓާގެޓަކީ ވާދަކުރާ ފުރަތަމަ ފަހަރު ވެސް ރާއްޖޭން ތިން މެޑަލް ހޯދުން ކަމަށާއި، އެ ފެންވަރު ރާއްޖޭގެ އެތުލީޓުންގެ އެބަހުރި ކަމަށެވެ.

"ކުރިއަށް އޮތް އިންޑިއަން އޯޝަން އައިލެންޑް ގޭމްސްގައި ރާއްޖޭން ފުރަތަމަ ފަހަރަށް ޓައެކްވޮންޑޯގައި ބައިވެރި ވާނެ، އަހަރެން އުންމީދު ކުރަނީ މިކުދިން ރާއްޖެއަށް ތިން މެޑަލް ގެނެސްދޭނެ ކަމަށް. އަބަދުވެސް ރަން މެޑަލް އަށް އުންމީދު ކުރެވޭ މި ކުދިންގެ ފަރާތުން. އިރާދަކުރެއްވިއްޔާ ވާނެ. މި ގައުމުގެ ޓައެކްވޮންޑޯ ލެވަލް އެހެން ގައުމުތަކަށް މިހާރު ފަސޭހައެއް ނުވާނެ،" ކިނާން ބުންޏެވެ.

ކުޑަ ދުވަސްކޮޅެއްގެތެރޭގައި ރާއްޖޭގައި ޓައެކްވޮންޑޯ އަށް މިވަނީ ބޮޑު ތަރުހީބެއް ލިބިފަ އެވެ. އަދި ޝައުގުވެރިކަމާއެކު އެކަޑަމީގައި ތަމްރީނު ހަދާ ގިނަ އެތިލީޓުން ތިބުމާ އެކު، މިއީ ރާއްޖޭގެ ގައުމީ ލެވެލްގައި ބަލައިގަނެ، ގިނަ މުބާރާތްތަކެއް ބާއްވާ ކުޅިވަރަކަށް ހެދުމަކީ މޮރޮކޯއަށް އުފަން ކިނާންގެ އުންމީދެކެވެ. އޭނާ ދެކޭގޮތުގައި އެއްބާރުލުން ލިބިގެން އެކުގައި މިހާރަށް ވުރެ ރަނގަޅު މަސައްކަތްތަކެއް ކުރެވިއްޖެ ނަމަ މި ކުޅިވަރުގައި ނުހަނު އުހަށް ރާއްޖެ ޖައްސާލެވޭނެ އެވެ.