ޔަމަން ގައުމީ ޓީމަށް ކުޅުނު މިޑްފީލްޑަރެއް އީގަލްސް އަށް

ޔަމަނުގެ ގައުމީ ޓީމަށް ކުޅެފައިވާ މިޑްފީލްޑަރު އޮސާމާ އަންބާރު ކްލަބް އީގަލްސްއާ ގުޅިއްޖެ އެވެ.

އުމުރުން 25 އަހަރުގެ މިޑްފީލްޑަރު އީގަލްސްގެ ޕްރެކްޓިހުގައި ބައިވެރިވަމުން އަންނައިރު، އެ ޓީމުން ހޯމަ ދުވަހު ހަވީރު ކްލަބް ވެލެންސިއާއާ ދެކޮޅަށް ކުޅޭ މެޗުގައި އޭނާ ފެނުމުގެ ފުރުސަތު އެބައޮތެވެ.

އޮސާމާ ވަނީ ޔަމަން ގައުމީ ޓީމަށް ހަ މެޗު ކުޅެދީފަ އެވެ. މީގެ ހަަތަރު ވަރަކަށް އަހަރު ކުރިން ޔަމަން ޓީމަށް ކުޅުނު އޮސާމާ ވަނީ 2016 ވަނަ އަހަރު އޭޝިއަން ކަޕް ކޮލިފައިންގައި ރާއްޖެއާ ދެކޮޅަށް ޔަަމަނުގައި ކުޅުނު ލެގުގެ ސްކޮޑުގައި ހިމެނިފަ އެވެ. އޭނާ ޔަމަނަށް ކުޅެދިން މެޗުތަކުގެ ތެރޭގައި އުތުރު ކޮރެއާ އާއި ޕާކިސްތާން އަދި އުޒްބެކިސްތާނަށް ކުޅުނު މެޗުތައް ހިމެނެ އެވެ. ކްލަބް ލެވަލްގައި އޭނާ ކުޅެފައިވަނީ ޔަމަން ޓީމުތަކަށެވެ.

ސީޒަނުގެ ފުރަތަމަ މެޗު ކަމަށްވާ ޗެރިޓީ ޝީލްޑް މެޗުގައި އީގަލްސް އިން މުޅިން ކުޅުނު ދިވެހި ކުޅުންތެރިންނާ އެކު އެވެ. އެ މެޗުގައި ފަހަތުން އަރައި މާޒިޔާ އަތުން 3-2 އިން މޮޅުވި ނަމަވެސް ދިވެހި ޕްރިމިއާ ލީގުގެ ފުރަތަމަ ދެ މެޗުން އެ ޓީމު ވަނީ ސުޕަ ޔުނައިޓެޑް ސްޕޯޓްސް (ސަސް) އާއި ޓީސީ ސްޕޯޓްސް ކްލަބް އަތުންވީ ބައްޔެވެ. އެ ދެ މެޗުގައި ވެސް ކުޅުނީ މުޅިން ދިވެހި ކުޅުންތެރިންނާ އެކު އެވެ.

އީގަލްސް އިން މި ސީޒަނުގައި ގެނައި ފުރަތަމަ ބިދޭސީ ކުޅުންތެރިޔާ ކަމަށްވާ އެ ޓީމުގެ ގޯލުކީޕަރު މޮންޓެނެގްރޯގެ މިލާން ޔެލޮވަކް އެވެ. އެންމެ ފަހުން އީގަލްސް ކުޅުނު މެޗުގައި ދަ ގްރާންޑޭއާ 1-1 އިން އެއްވަރުވިއިރު، އެ މެޗުގައި އީގަލްސް ކޮޅަށް ގޯލު ވަނީ ކީޕަރު މިލާނަށް ހެދުނު ގޯހަކުންނެވެ. މިލާން އެ މެޗު ކުޅުނީ އީގަލްސްއާ އެކު އެންމެ ޕްރެކްޓިހެއް ކުރުމަށް ފަހު އެވެ. އީގަލްސްގެ ކޯޗު މުހައްމަދު ޝިޔާޒް (މޯހަން) ބުނީ މިލާން ކައިރިން އެ ގޯލު ވަނީ ޕްރެކްޓިސް މަދުވުމުން ކަމަށްވެދާނެ ކަމަށެވެ.

މި ސީޒަނުގައި އީގަލްސްގެ ސްކޮޑުގައި ދެން ޖަހާފައިވަނީ ބުރްކީނާ ފާސޯގެ ޑިފެންޑަރު އިސްމާއިލް ޔަނޯގޯ އާއި މިސްރުގެ ފޯވާޑެކެވެ.

އީގަލްސް އިން މި ފަހަރުގެ ސީޒަނުގައި ސްކޮޑު ވަރުގަދަ ކުރަނީ އެ ކްލަބްގެ ތާރީހުގައި ފުރަތަމަ ފަހަރަށް އޭއެފްސީ ކަޕްގައި ކުޅެން ޖެހޭތީ އެވެ. އެ ގޮތުން އީގަލްސް ވާދަކުރާނީ ކޮލިފައިންގެ ޕްރިލިމިނަރީ ރައުންޑުގަ އެވެ. އީގަލްސްގެ އަމާޒަކީ ގްރޫޕް ސްޓޭޖުގެ ޖާގައެއް ހޯދުމެވެ.

މި ފަަހަރުގެ ސީޒަނަށް ޓީސީ ޓީމުގައި ޖެހި ސެއިން ވިންސެންޓްގެ ފޯވާޑް ކެސިއަސް މެލްކަމް ސްޓެވާޓް ވެސް ވަނީ އެ ޓީމުގެ ޕްރެކްޓިސްތަކުގައި ބައިވެރިވާން ފަށައިފަ އެވެ. މިދިޔަ ސީޒަނުގެ ފަހު ކޮޅުގައި ޓީސީން މެލްކަމް ގެނައީ އޭއެފްސީ ކަޕަށް ޓީމު ވަރުގަދަ ކުރުމުގެ ގޮތުންނެވެ. އެކަމަކު ކޮވިޑް-19އާ ހެދި އޭއެފްސީ ކަޕް މެދުކަނޑާލުމުން މެލްކަމް އެނބުރި ގައުމަށް ދިޔައީ މި ސީޒަނަށް ޓީސީއާ ގުޅެން އެއްބަސްވުމަށް ފަހު ކަމަށް ވަނީ އެނގިފަ އެވެ. ޓީސީ އަށް ދެން ކުޅޭ ބިދޭސީ ކުޅުންތެރިއަކީ އަޒަރުބައިޖާންގެ ޔޫތު ޓީމުތަކަށް ކުޅެފައިވާ ގޯލްކީޕަރު އާޒާދު މަމަދޯފް އެވެ.