މީޒާ

އާދިއްތަ ދުވަހާ ގުޅޭ

ދެން ވީ ހީ ވެސް ނުކުރާ ގޮތެކެވެ. ގަޑި ނުޖެހޭތީ ޓިއުޝަން ކިލާހުގެ އޮފީސް ބައިގައި އަހަރެން އިށީނދެލައިގެން ވިސްނަން އިންދައި އަޒީޒު ވަނެވެ. އޭނައަކީ ދިވެހި މުދައްރިސެކެވެ. ލާނެތް ސަމާސާކުރާ އަހަރެންގެ އެކުވެރިއެކެވެ. އަހަންނަށް އޭނަ ފެނުނު އިރު ވެސް އޭނަގެ މޫނުމަތިން ލާނެތް ހިނިތުންވުމެއް ފާޅުވެފައި ހުއްޓެވެ. އޭނަ ދައްކާ ވާހަކައިގައި ރޭނދާއަޅައިގެން މެނުވީ ވޮށް އަލިވާ ހިސާބަކު އެ ވާހަކައެއް ނުދެއްކޭނެއެވެ.

"ނޫނޭ ކަލޭތީ ނުބައި ..." މަޑުމަޑުން އަޒީޒު ބުންޏެވެ.

އަޒީޒު އެ ކަހަލަ އެއްޗެހި ބުނާ އިރު ތަންކޮޅެއް މަޑުން ބުނާކަން އެއީ ނަސީބެކޭ އަހަރެން ހިތަށްއެރިއެވެ.

"މަ ކީއްކުރީ؟" އަހަރެން އެހީމެވެ.

"ކީއްހޭ ކުރީ؟ ކަމެއް ނުކުރާ ނަމަ ކަލެޔާ ދިމާއަށް މީޒާ އެހާ ... ކޮށެއް ނުބަލާނެ،" ޔަގީންކަމާ އެކުގައި އަޒީޒު ބުންޏެވެ. "އަހަންނަށް މުޖައްރިބު ކަލޭމެން ދެ މީހުން ކޮންމެވެސް މެޓާގަނޑެއް އެބަ ހިލާ!"

އަހަރެން ހިތަށްއެރިއެވެ. ކަން ނުވެ ނަންވެ ނިމުނީއެވެ. އެންމެން އަހަރެންގެ ބޮލުގައި އެ ތުހުމަތު އަޅުވަނީ ކީއްވެގެން ހެއްޔެވެ؟ މީޒާ އެ ނަޒަރުން އަހަންނާ ދިމާއަށް ބަލަނީ ކީއްވެ ހެއްޔެވެ؟ އަހަރެންނަކީ މީޒާގެ މުދައްރިސެވެ. މީހެއްގެ ފިރިއެކެވެ. ދެވަނަ ދަރިފުޅަށް އަނބިމީހާ ބަނޑުބޮޑެވެ. ކިލާހުގެ ހުރިހައި ދަރިވަރުންނަށް އެ ކަން އެނގޭނެއެވެ. މީޒާއަކީ ރީތި ކުއްޖެއް ކަމަށް އަހަރެން އެއްބަހެވެ. މޭގެ ތެރެއިން ހިތް ލުހެލައިގެން ގޮސް މީޒާގެ ފައިތިލަ މަތީގައި ބާއްވަން ބޭނުން ނުވާނެ ފިރިހެނެއް ނުހުންނާނެއެވެ. އެ ފަދަ ކުއްޖަކު އޭނައަށް ވުރެ އެތައް އަހަރެއް ދޮށީ މީހެއް ދެކެ ލޯބިވާން ޖެހޭ ސަބަބެއް ނެތެވެ. އަމުދުން އަހަރެން އެއްވެސް އިޝާރާތެއް ނުކުރަނީހެވެ. އެކަމަކު ވިދިވިދިގެން ދެ މީހުން އެ ކަން ފާހަގަކުރުމުން، އެ ކަމާ މެދު ވިސްނާލަން އަހަރެންނަށް މަޖުބޫރުވިއެވެ.

ކިލާހުގައި އަހަރެން ދެން ވެސް މަސައްކަތްކުރީ، އެހެން ދަރިވަރުންނަށް ބަލާ ނަޒަރުން މީޒާއަށް ބަލާށެވެ. އެކަމަކު އެއީ، އިންސާނީ ތަބީއަތަށް ބަލާ އިރު ފަސޭހަކަމަކަށް ނުވާ އިރު އަހަރެންނަކަށް ވެސް އެ ކަން ފަސޭހައެއް ނުވިއެވެ. އެންމެ ފަހުން އަހަރެން މީޒާއަށް ބެލުން ހުއްޓައިލީމެވެ. ލޮލުގެ ހިމަކޮޅުން ވިޔަސް މީޒާއަކަށް ނުބަލަމެވެ. އެ ދެވުނީ ކިހާ ބޮޑު ސިގުނަލެއް ކަމެއް އަހަރެންނަކަށް އޭރަކު ނުވިސްނެއެވެ.

އެއް ރޭ އަހަރެން ނިދަން އުޅެނިކޮށް އަހަރެންނަށް މެސެޖެއް އައެވެ. އެ މެސެޖު ލިޔެފައި އޮތީ އަރަބި ބަހުންނެވެ. މެސެޖު ފޮނުވީ މީޒާއެވެ. މެސެޖުގެ ތިރީގައި އޭނަގެ ނަން ޖަހައިފައި އޮތެވެ.

"ލޯބިވަނީ ކާކު ދެކެ؟" މެސެޖުގައި އޮތެވެ.

ވަރަށް އެހެން ކަހަލަ މެސެޖެކެވެ. ހާއްސަކޮށް ދަރިވަރަކު މުދައްރިސަށް އެ ފަދަ މެސެޖެއް ފޮނުވުމުގެ ބޭނުމަކީ ކޮބައި ހެއްޔެވެ؟ އަހަރެން ވިސްނީމެވެ. އަނެއްކާ ވެސް އެ މެސެޖު ކިޔައިލީމެވެ.

"ލޯބިވަނީ ކާކު ދެކެ؟" ހިތާހިތުން އަހަރެން ބުނެލީމެވެ.

އެއީ ގޯސް މެސެޖެއް ނޫނޭ ބުނާ މީހަކަށް އެ ކަން ވެސް ސާބިތުކޮށްދެވޭނެއެވެ. ހުތުރު އެއްޗެއް ބުނީކީ ނޫނެވެ. ލޯބި ހުށައެޅީކީ ނޫނެވެ. ބޭނުން ނަމަ އެއްވެސް ޖަވާބެއް ނުދީ ވެސް އަހަރެންނަށް ހުރެވުނީހެވެ. އެހެނަސް އަހަރެން ހިތަށްއެރިއެވެ. ޖަވާބެއް ނުދޭންވީ ކީއްވެގެން ހެއްޔެވެ؟ ކައިރީގައި ލުބާނާ އިނުމުން އަހަރެން ފޯނު ހިފައިގެން ބޭރަށް ނުކުތީމެވެ. މީޒާއަށް ގުޅީމެވެ.

"އައްސަލާމް އަލައިކުމް!" މީޒާ ވަރަށް އަވަހަށް ފޯނު ނަގައިފައި ބުންޏެވެ.

އަހަރެން ސަލާން ބަލައިގަތީމެވެ. އެކަމަކު، ކޮންމެހެން ވާހަކަ ދިގުކުރާކަށް އަހަރެން ނުވިސްނަމެވެ.

"އަންހެނުން ދެކެ ވެސް ލޯބިވޭ!" މަޑުމަޑުން އަހަރެން ބުނީމެވެ. "ދަރިފުޅާ، މަންމަޔާ، ބައްޕަ ދެކެ ވެސް ލޯބިވޭ! އާއިލާގެ އެންމެން ދެކެ ވެސް ލޯބިވޭ!"

އަހަރެންނަކީ ވަރަށް ސީރިޔަސް މުދައްރިސެއް ނަމަ މީޒާއަށް އަހަރެން ގުޅާނީ ނަސޭހަތްދޭށެވެ. ކިލާހުގައި ޖައްސާ ވައްތަރުތައް ހުއްޓައިލުމަށެވެ. އަހަރެން މަސައްކަތްކަތްކުރީހީ މުދައްރިސާއި ދަރިވަރާ ދެމެދުގައި އޮންނަ ގުޅުން މީޒާއަށް ވިސްނައިދޭށެވެ. އޭގެ ބަދަލުގައި މީޒާއަށް ގުޅައިފައި "ލޯބީގެ" ވާހަކަދެއްކުން އެއީ، އަހަރެން ދިން ނުސީދާ މެސެޖެކެވެ. ހިތް ސާފުކޮށް ބާއްވައިގެން ލިބުނު ރީތި ނަމެއް ނެތުމުން އަހަރެންގެ ހިތަށް އިބިލީސް ވެރިވީއެވެ. އަހަރެން އެ ގޮތަށް ކަންތައް ކުރުމުން މީޒާ މިސްރާބުހިފީ ދެވަނަ ލަނޑުދަނޑިއަށް ވާސިލުވާށެވެ. އެ ކަން ވެސް އަހަންނަށް އެނގުނެވެ.

"ދެން ކާކު ދެކެ ލޯބިވަނީ؟" މީޒާ ސުވާލުކުރިއެވެ.

މީޒާ ބުނުވަން އުޅެނީ ކީކޭކަން އަހަރެންނަށް ވިސްނުނެވެ. ވީމާ، އޭނަ އަޑުއަހަން ބޭނުންވި ޖަވާބު އަހަރެން ދިނީމެވެ.

"އެހެން މީހަކު ދެކެ ލޯބިވަންޏާ މި ވަގުތު ބުނެވޭނީ، އެ މީހަކީ މި ވަގުތު ފޯނުން ވާހަކަދައްކާ ކުއްޖާއޭ!" އަހަރެން އެއްވެސް ޖެހިލުމެއް ނެތި ބުނީމެވެ.

މީޒާ ހޭން ފެށިއެވެ. ވިހި އަހަރުގެ އަންހެންކުއްޖަކު، އޭނައަށް ވުރެ ވިހި އަހަރު ދޮށީ މީހެއް ދެކެ ލޯބިވާންވީ ކީއްވެގެން ހެއްޔެވެ؟ އަހަރެންގެ ހިތް އެ ސުވާލުގެ ޖަވާބު ބޭނުންވިއެވެ. އަހަންނަކީ މަހުޖަނެއް ނޫނެވެ. މާލޭގައި ގެދޮރެއް ނެތެވެ. ހުސްހަށިބަޔެއް ނޫނެވެ. އަންހެންކުދިން އަންތަރީސްވާ ކަހަލަ ރީތި ސިފައެއް ނެތެވެ. އެހެނަސް، ދަނޑިވަޅަކީ އަހަރެންގެ ހަޔާތަށް ހުސްކަމެއް ވެރިވެފައިވާ ދަނޑިވަޅެކެވެ. އަނބިމީހާޔާ ގުޅުން ރަނގަޅެއް ނޫނެވެ. އަނބިފިރިކަމުގެ ގުޅުން އޮތީ ނަމަކަށެވެ. މީޒާ ދޫކޮށްލި ތީރު އެހާ ފަސޭހައިން ހިތަށް ހެރުނީ އެހެންވެއެވެ. ނޫން ނަމަ އަހަރެންނަކީ، މުދައްރިސާއި ދަރިވަރާ ދެމެދުގައި އޮންނަ ރަތް ރޮނގު ނޭނގޭހާ ގަމާރު މީހެއް ނޫނެވެ. މީޒާއަށް ގުޅި އިރު ވެސް ރަތް ރޮނގު އޮތީ ދިމާއަށް ފެންނާށެވެ. ފައިން އެ ރޮނގު ފުހެލީ އަހަރެންނެވެ. މީޒާގެ އެހީއާ އެކުގައެވެ.

"ކީއްވެ ތި ހެނީ؟" އަހަރެން އެހީމެވެ. އަދި ބުނީމެވެ. "އަޅެ ބުނެބަލަ! ކީއްވެ ކްލާހުގަ އަހަންނާ ދިމާއަށް ވައްތަރުޖައްސަނީ؟"

"ވައްތަރުޖެއްސީއޭ!" ވަރަށް ކަންބޮޑުވެފައި މީޒާ ބުންޏެވެ. "ނޫން! އަހަރެން ކީއްކުރަން މުދައްރިސާ ދިމާއަށް ވައްތަރުޖައްސަންވީ؟ ހިތަށް ވެސް ނާރާ!"

އެއީ އަހަރެން އުންމީދުކުރި ޖަވާބެއް ނޫނެވެ.

"އެކަމަކު އެހެން މީހަކު ވެސް ބުނި މީޒާ ބަލާ ގޮތުން ހީވަނީ އަހަރުމެން ދެ މީހުން ދޭތެރޭ ގުޅުމެއް އޮތްހެންނޭ!" އަހަރެން ބުނީމެވެ. "ފިހާރައިން ވައިފާ ދިމާވެގެން އޭނަގެ މޫނަށް މީޒާ ބެލި ގޮތުން ވައިފަށް ވެސް ޝައްކުވި."

އަނެއްކާ ވެސް މީޒާ ހޭން ފެށިއެވެ. އެތައް އިރަކު ހީނފައި ވާހަަކަދައްކަން ފެށިއެވެ.

"ދެން އެހެން ނުވާނެ!" މީޒާ ބުންޏެވެ. "އަހަންނަކަށް ނޭނގެ އެ ކަހަލަ ގޮތަކަށް އަހަންނަށް ބެލޭ ކަމެއް. އަނެއްކާ އަހަންނާ ހެދި ވައިފާ މައްސަލަ ޖެހުނީތަ؟ އަހަރެން މެސެޖު ނުފޮނުވަންވީތަ؟ ނޫނީ އޯކޭތަ ދޭތެރެއަކުން ގުޅާލިޔަސް؟"

އަހަރެން ބޭނުން ނަމަ އެ ހިސާބުން ވެސް ދޮރޯށި ތަޅުލެވުނީހެވެ. އެކަމަކު ކީއްކުރަން ހެއްޔެވެ؟

"އަހަރެން ބޭނުން މި ގުޅުން ކުރިޔަށް ގެންދަން." އަހަރެން ބުނީމެވެ.

އަހަރެން ރަސްމީކޮށް މީޒާއާ ތަޅުދަނޑި ހަވާލުކުރީމެވެ. ގޭގެ ނަންބޯޑު ވެސް ދަރިވަރުން ލޯބިވެރިޔާއަށް ބަދަލުކޮށްލީމެވެ.

"އެކަމަކު ވައިފެއް އެބަ ހުއްޓެއްނު!" މީޒާ ޖެހިލުމެއް ނެތި ބުންޏެވެ.

މީޒާ ތަޅުދަނޑިއަކު ނުހިފިއެވެ. އޭނަ ފެންމަތިކުރީ ޝަރުތެކެވެ. ނުސީދާކޮށެވެ.

"ތެދަށް ބުނަން،" އަހަރެން ތަފުސީލު ކިޔައިދޭން ފެށީމެވެ. "އަހަރުމެންގެ ގުޅުން އެހާ ރަނގަޅެއް ނޫން. އާނ ދެމަފިރިން. އެކަމަކު އޭނަ ލޯބިވަނީ އެހެން މީހެއް ދެކެ. އަހަންނަކަށް ރެސްޕެކްޓެއް ނުކުރޭ! ދަރިފުޅު ކުރިމަތީގަ ޒުވާބު ވެސް ކުރަނީ. ހަޑި އެއްޗެހި ވެސް ކިޔަނީ. ބަނޑުބޮޑުވީމަ ވަރިކުރަން ނުކެރިފަ އަހަރެން މި ހުންނަނީ. އެކަމަކު ވަރަށް އަވަހަށް ވަރިކުރަން ވެސް ޖެހިދާނެ. މިހާރު މި ވާ ގޮތުން."

މީޒާގެ ސޫރަޔާއި، އަޑުގެ ޖާދޫގައި އަހަރެން ހައްޔަރުވިއެވެ. ބޭޒާރު ވިޔަސް، ކޮންމެ މީހަކު ކޮންމެ އެއްޗެކޭ ކިޔަސް އަހަރެން ބޭނުންވީ އެ ގުޅުން ކުރިޔަށް ގެންދާށެވެ. ފުރަތަމަ ފަހަރު މީޒާ ގުޅި ނަމަވެސް ދެވަނަ ފަހަރު ގުޅީ އަހަރެންނެވެ. އަހަރެން އެ ގުޅުމަށް ލޯބި ކިޔަސް، މީޒާގެ ދުލަކުން އެ ގުޅުމަކަށް ނަމެއް ނުދެއެވެ. ލޯބިވާ ވާހަކައެއް ވެސް ދުލަކުން ނުބުނެއެވެ. އެހެން ހުރިހާ ގޮތަކުން ލޯބިވާކަން އެންގިއެވެ.

ޖަޒުބާތުގެ ހުންގާނު އޮންނަނީ މީޒާގެ އަތުގައެވެ. ކިލާހުގައި ފިލާވަޅުދޭ އިރު މީޒާ އިންނަނީ ލާނެތް ހިންޏެއް އައިސްފައެވެ. ލާނެތް ކުދިކުދި އިޝާރާތްތައް ވެސް ކުރެއެވެ. ހަމަ އެކަނި އަހަރެންނަށް ފެންނަ ގޮތަށެވެ. ކިލާހާއި މީހުންނަށް ފެންނަ އެހެން ހުރިހައި ތާކު ވެސް އަހަރެންނާއި މީޒާއަކީ މުދައްރިސާއި ދަރިވަރެވެ. ފޯނުން ވާހަކަދައްކާ އިރު އަހަރެން ހުންނަނީ މީޒާގެ ހިތުގައި އޮތް އެއްޗެއް ކަށަވަރު ނުވެފައެވެ. ގިނަ ފަހަރަށް މީޒާ ބުނަނީ ދެ މާނަ ލައިފައެވެ.

"ލޯބިވާކަމަށް މީޒާ އެއްބަސް ނުވާން ތި އުޅެނީ ކީއްވެ؟" އަހަރެން އެންމެ ގިނައިން އަހާ ސުވާލަކީ އެއީއެވެ. "ކީއްވެ ބިރުން ތި އުޅެނީ؟ އެކަމަކު ލޯބިނުވާ ނަމަ މީޒާ ތި ގޮތަށް އަހަންނަކަށް ނުގުޅާނެ. އަހަރުމެން ދެ މީހުންނަށް ވެސް އެ ކަން އެނގޭ."

މީޒާ އެކި ފަހަރު ދެނީ އެކި ޖަވާބެވެ. ހީވަނީ އަހަރެން ތަޅުވަން އޭނަ ބޭނުންވާހެންނެވެ.

"ޓީޗަރު ދެކެ ސްޓޫޑެންޓު ލޯބިވާނެއްނު! އަހަރެންނަކީ ސްޓޫޑެންޓެއް. ތީ ޓީޗަރެއް،" މީޒާގެ ވާހަކަ ހުންނަނީ އަހަރެންގެ ހިތަަށް އުނދަގޫވާ ކަހަލަ ގޮތަކަށެވެ. "ދެ ފްރެންޑްސް ގޮތަށް ވެސް އަހަރުމެންނަށް އުޅެވިދާނެ. ނުލާހިކު ފަސޭހައިން އެބަ ދިމާވޭ! ވާހަކަދެއްކޭ! ޔޫގެ ވައިފެއް އެބަ ހުރި."

"ޔޫ" ބޭނުންކުރުމުން މީޒާ ބޭނުންވަނީ ކޮން ކަހަލަ ގުޅުމެއްކަމެއް އަހަންނަކަށް ނުވިސްނުނެވެ. އޭނަ ބޭނުންވަނީ ގާތް އެކުވެރިއެއް ހެއްޔެވެ؟

"ކީއްވެ އަހަންނަށް ޔޫ ކިޔަން ނިންމީ؟" އަހަރެން ސުވާލުކުރީމެވެ.

"ދެން ކީކޭ ކިޔަންވީ؟" މީޒާ ވެސް ކުރީ ސުވާލެކެވެ.

ނުނިމޭ