ލަންޑަން (އެޕްރީލް 9) - އިނގިރޭސި ރާނީ ކުއީން އެލިޒަބަތުގެ ފިރިކަލުން ޕްރިންސް ފިލިޕް އުމުރުފުޅުން 99 އަހަރުގައި މިއަދު އަވަހާރަވެއްޖެ ކަމަށް ބަކިންހަމް ޕެލަސް އިން އިއުލާންކޮށްފި އެވެ.
ހޮސްޕިޓަލްގައި އެޑްމިޓްކޮށްގެން ފަރުވާ ދިން ޕްރިންސް ފިލިޕްގެ ހިތްޕުޅުގެ އޮޕަރޭޝަނެއް ވެސް ދާދި ފަހުން ވަނީ ކޮށްފަ އެވެ. ފިލިޕަށް ވަނީ މަހެއްހާ ދުވަހު ހޮސްޕިޓަލްގައި ފަރުވާ ދީފަ އެވެ.
"ލޮބުވެތި ފިރިކަލުން ހިޒް ރޯޔަލް ހަޔަނެސް ދަ ޕްރިންސް ފިލިޕް، ޑިއުކް އޮފް އެޑިންބަރާ އަވަހާރަވިކަން ވަރަށް ފުން ހިތާމައާ އެކު ހަ މެޖެސްޓީ ދަ ކުއީން އިއުލާން ކުރައްވައިފި،" ބަކިންހަމް ޕެލަސް އިން ނެރުނު ބަޔާނުގައި ބުނެފައިވެ އެވެ.
ޕްރިންސަސް އެލިޒަބަތުއާ ފިލިޕް ކައިވެނި ބައްލަވައިގެންނެވީ 1947 ވަނަ އަހަރު އެވެ. އެއީ އެކަމަނާ އަށް ރާނީގެ މަގާމު ލިބިވަޑައިގެންނެވުމުގެ ފަސް އަހަރު ކުރިންނެވެ. ކުއީން އާއި ފިލިޕަށް ވަނީ ހަތަރު ބޭފުޅުން ލިބިވަޑައިގެންފަ އެވެ. ފުރަތަމަ ދަރިކަލުން ޕްރިންސް އޮފް ވޭލްސް، ޕްރިންސް ޗާލްސް އުފަންވެވަޑައިގެންނެވީ 1948 ވަނަ އަހަރު އެވެ.
ޕްރިންސް ފިލިޕް އުފަންވެވަޑައިގެންނެވީ ޖޫން 10، 1921 ވަނަ އަހަރު އެވެ.