ކޮރިއޯގްރާފަރު ބޮސްކޯ މާޓިސް ވެސް ޑައިރެކްޝަނަށް

ބޮސްކޯ، އަނިލް ކަޕޫރާ އެކު.

އަހުމަދު އަދްޝަން، މިހާރު

20 އެޕްރީލް 2019 - 07:59

ބޮލީވުޑްގެ ކޮރިއޯގްރާފަރުންގެ ތެރެއިން މިހާރު އެންމެ މަޝްހޫރު ޑައިރެކްޓަރުންނަކީ ފަރާ ހާނާއި ރެމޯ ޑި ސޫޒާ އެވެ. މި ދެ މީހުންގެ ލިސްޓަށް އިތުރު ކޮރިއޮގްފާރަކު ވެސް އަންނަން އުޅޭކަން މިހާރު ވަނީ ކަށަވަރުވެ އެވެ.

އެއީ ބޮލީވުޑްގެ އެތައް ފިލްމެއްގެ އެތައް ލަވައެއްގެ ކޮރިއޯ ހަދާފައިވާ ބޮސްކާ މާޓިސް، 44، އެވެ. އޭނާގެ އަލަތު ޑައިރެކްޝަންގެ ނަމާއި ކާސްޓުން އަދި އިއުލާން ނުކުރި ނަމަވެސް އެއީ ޑާންސް-ހޮރޯ ކޮމެޑީއެކެވެ.

ޒީ ސްޓޫޑިއޯސް އިން ޕްރޮޑިއުސްކޮށް، 3ޑީ ފޯމެޓްގައި ގެނެސްދޭ ފިލްމުގެ ޝޫޓިން މި އަހަރުގެ މެދުތެރޭގައި ފަށަން ވަނީ ހަމަޖެހިފަ އެވެ. ބެލެވޭ ގޮތުން މިއީ އަންނަ އަހަރު ރިލީޒް ކުރާނެ ފިލްމެކެވެ.

We are proud to announce our next film with @BoscoMartis whose directorial debut with us is going to be India's first dance-horror film! pic.twitter.com/vA8wY89avm
— Zee Studios (@ZeeStudios_) April 18, 2019

ބޮސްކޯ ކޮރިއޯގްރާފަރެއްގެ ގޮތުގައި މަޝްހޫރުވެގެން ދިޔައީ ކޮރިއޯގްރާފަރު ސީޒާ ގޮންޒާވެލްސްއާ ގުޅިގެން ކުރި މަސައްކަތުންނެވެ. އެ ދެ މީހުން މަޝްހޫރުވެފައި ވަނީ "ބޮސްކޯ ސީޒާ" ގެ ގޮތުގަ އެވެ. އަދި "ބޮސްކޯ ސީޒާ ޑާންސް ކޮމްޕެނީ" ގެ ނަމުގައި އެތައް ތަނެއްގައި އެކެޑެމީ ވެސް ހިންގާ މި ދެ ފަންނާނުންނަކީ މިހާތަނަށް 75 އަށް ވުރެ ގިނަ ފިލްމެއްގެ 200 އަށް ވުރެ ގިނަ ލަވަތަކުގެ ނެށުންތައް ތައްޔާރުކޮށް ދީފައިވާ ދެ ފަންނާނުންނެވެ.

އެ ދެ މީހުންނަށް 2011 ގައި ފިލްމު "ޒިންދަގީ ނާ މިލޭގީ ދޮބާރާ" ގެ ލަވަ "ސެނޮރީޓާ" ގެ ކޮރިއޯ ހަދައިގެން ނެޝަނަލް އެވޯޑް ވެސް ލިބިފައިވެ އެވެ.

ބޮސްކޯ ޑައިރެކްޝަނަށް ނުކުންނަ އިރު، އޭނާ އާއި ސީޒާ މި ފަހުން ވަކިވަކިން ވެސް މަސައްކަތްތަކެއްކޮށްފައިވެ އެވެ.