"ހެޔޮނުވާނެ، ގޭގައި މަޑުކޮށްލަބަލަ!"

ގެއިން ބޭރަށް ނުނިކުމެ، ދުވަސްކޮޅަކު މަޑުކޮށްލަން އެދި ޑޮކްޓަރުންނާއި ސަރުކާރުގެ ވެރިން އާންމުންގެ ކިބައިން އާދޭސްކުރާތާ ދުވަސްތަކެއް ވެއްޖެ އެވެ. ކޮރޯނާވައިރަސްގެ ބިރު ރާއްޖެއަށް ވެސް އޮތުމުން، އެކަމުން ރައްކާތެރިވާން އެޅެން އޮތް އެންމެ ބޮޑު އެއް ފިޔަވަޅަކީ ވެސް މީހުން ތަންތަނަށް ނުކުމެ، އެއްވެ ނޫޅުމެވެ.

އެކަމަކު ކޮރޯނާވައިރަސްގެ އެމަޖެންސީ ޓާސްކްފޯސްގެ ބޭފުޅުން ހިތްހަމަޖެހިވަޑައިގަންނަވާ ފަދަ "ބަސްއެހުމެއް" މާލޭ ސަރަހައްދުން އަދިއެއް ނުފެނެ އެވެ. ކޮންމެވެސް ވަރަކަށް މަގުމަތިން ވެސް މީހުން މަދުވެއްޖެ އެވެ. އެކަމަކު އެ ބޭފުޅުން އެންމެ ބޭނުންވާ މަންޒަރު ފެންނަ ވަރެއް ނުވެ އެވެ.

މިހާރު އާންމުންގެ ކިބައިން އާދޭސްކުރަމުން އަންނަނީ ހަމައެކަނި ރަސްމީ ފަރާތްތަކުން އެކަންޏެއް ނޫނެވެ. ސޯޝަލް މީޑިއާގައި މަޝްހޫރު "ކާއްޓޭ ދަ ވިންޗޯ" ފަދަ ޝަހުއްސިއްޔަތުތައް ވެސް "ޕިސްޕިސް" ޖަހަމުން، އެއްޗެހި ވެސް ކިޔަމުން، އެ ބުނަނީ "ހެޔޮނުވާނެއޭ، ގޭގައި ނިކަން މަޑުކޮށްލަދީ ބަލާށޭ" އެވެ.

ކާއްޓޭ ދަ ވިންޗޯ، މި މަހު 20 ގައި ނެރުނު މިނިޓެއްހާ ދިގު ވީޑިއޯގައި، މީގެ ކުރިން ދިވެހިން އެއްބައިވެގެން ކުރި މަސައްކަތްތަކުގެ ކާމިޔާބު ވެސް ވަޒަންކުރި އެވެ. އޭނާ ބުނި ގޮތުގައި ކުރިން ދިމާވި "ކާރިސާތަކުން އެންމެން އެއްބަސް ކިޔައިގެން، އެކައްޗެއް ކިޔައިގެން އަރައިގަނެވުނެ"ވެ.

"މިކަމުން ވެސް އަރައިގަންނަން، ހެޔޮނުވާނެ، ގޭގައި މަޑުކޮށްބަލަ،" ތަކުރާރުކޮށް އޭނާ އެދުނެވެ.

"ކިރިޔާއޭ ހަތަރު ލައްކަ ހަމަ މި ވަނީ. ދެން ބޭނުމެއް ނޫނޭ މަދުވާކަށް،" ކޮރޯނާވައިރަސް ފެތުރި ރާއްޖެއިން ވެސް ބަޔަކު މަރުވުމުގެ ފުރުސަތު އޮތުމުން އެކަމަށް އިޝާރަތްކުރަމުން، އޭނާގެ ވާހަކަ ކުރިއަށް ގެންދިޔަ އެވެ.

ކާއްޓޭ ދަ ވިންޗޯ ތަންކޮޅެއް ހަރު އަޑުން އަހަރެމެންނާ ދިމާއަށް އެއްޗެހިކީ ވަގުތެއްގައި ވަރަށް ރަނގަޅު ވާހަކައެއް ވެސް ގޮވާލަ އެވެ. އެއީ ބައެއް މީހުންގެ މިޒާޖެވެ.

"އެއް ބަޔަކު އެބަ އުޅޭ މީނާ ބޭރަށް ދާތީ އޭނާ ފަހަތުން ބޭރަށް ދާން، އޭނާ ކޮން ތާކަށްތޯ ދަނީ [ބަލަން]." ކާއްޓޭ ބުންޏެވެ.

ދެން "އެބަ އުޅޭ ބޭރަށް ނުކުމެ އުޅެނީ ކޮން ބައެއްތޯ ބަލަން ނުކުންނަ މީހުން ވެސް. ހެޔޮނުވާނެ! މަޑުކޮށްލަދީބަލަ ގޭގައި!"

ކޮރޯނާވައިރަސް ފެތުރުނަ ނުދޭން ރަސްމީ ފަރާތްތަކުން ކުރާ މަސައްކަތުގެ އެންމެ މުހިންމު އެއް ބަޔަކީ ތަންތަނަށް އެއްވެ ނޫޅުމާއި ގިނަ މީހުން ބައްދަލުވެ އުޅެން ހުޅުވިފައި ހުންނަ ފުރުސަތުތައް މަދުކުރުމެވެ. މި ހަފުތާގައި ސަރުކާރުގެ އޮފީސްތައް ބަންދުކުރީ ވެސް، އަދި ސްކޫލްތައް ބަންދުކުރުން ކުރިއަށް ގެންދަން ނިންމާފައި ވަނީ ވެސް އެ ނިޔަތުގަ އެވެ. އޭގެ އިތުރުން އިއްޔެ އިން ފެށިގެން މާލޭ ސަރަހައްދުގެ ހޮޓާ/ރެސްޓޯރެންޓް/ކެފޭ ފަދަ ތަންތަނުން ކެއިންބުއިމުގެ ހިދުމަތް ދިނުން ވަނީ ހުއްޓާލައިފަ އެވެ. ހަމައެކަނި ކުރެވޭނެ ކަމަކީ ޓޭކްއަވޭ އާއި ޓެލިވަރީގެ ކަންކަމެވެ.

ކާއްޓޭ ދަ ވަންޗޯ ބުނާ ގޮތުގައި ކޮރޯނާވައިރަސް ލޮލަށް ފެންނަ ނަމަ، ބޭރަށް ނުކުމެ އުޅެން އުޒުރެއްގެ ގޮތުގައި ދެއްކިދާނެ އެވެ.

"ލޮލަކަށް ތަނަކަށް ފެންނަ ނަަމަ ރަނގަޅޭ އޭތި މިތާކު ނެތޭ، އެތާކު ނެތޭ ކިޔާފައި [ބޭރަށް] ދާން،" އޭނާ ބުނެލި އެވެ.

"ވިސްނީމަ ވިސްނޭނީ. ދިވެހިންނަކީ އަބަދުވެސް ނަމޫނާ ދައްކާ ބައެއް. ކަމެއް ކުރަން ދިމާކޮށްފިއްޔާ އެކަމެއް ކުރާ ބައެއް،" އެއްޗެހި ގޮވާ ނިންމުމަށް ފަހު، އޭނާގެ ނަސޭހަތް ކުރިއަށް ގެންދިޔަ އެވެ.

"ހިނގާ ބަލަ މިކަން ކުރަން. ކާކު އަންނާނީ މިކަން ކުރަން؟ އަހަރެމެން ކުރިއްޔާ ވާނީ. ދެން އަންނަ ޖީލަކަށް ވެސް ބައްޕަމެން، މަންމަމެން ގޭގައި ތިބިއްޔޭ ކިޔޭނީ ގޭގައި މަޑުކުރިއްޔާތާ. މި ޖީލުން ބޮޑު ބައެއް ދިޔައިމާ [މަރުވީމަ] ކާކު ޒިންމާވާނީ؟"