އައިޝްވާރިޔާ ވަނީ ގުރުބާނީއެއް، ޝުކުރުވެރިވަން: އަބީޝެކް

ވަރިވާން އުޅޭ ކަމަށް ބުނާ އަޑުތައް ގަަދަވެފައި ވަނިކޮށް ބޮލީވުޑްގެ އެކްޓަރު އަބީޝެކް ބައްޗަން މީޑިއާއަކަށް ދިން އިންޓަވިއުއެއްގައި އޭނާގެ އަންހެނުން، އެކްޓްރެސް އައިޝްވާރިޔާ ރާއީ ބައްޗަން އަށް ޝުކުރު އަދާކޮށްފި އެވެ.

އަބީޝެކް "ދަ ހިންދޫ" އަށް އިއްޔެ ދިން އިންޓަވިއުއެއްގައި ބުނީ އެ ދެމަފިރިންގެ ދަރިފުޅު އަރަދުޔާ ބައްޗަން ބަލައިބޮޑުކުރުމަށް އައިޝްވާރިޔާ ވަރަށް ބޮޑު ގުރުބާނީއެއް ވެފައިވާ ކަމަށާއި އޭނާ އެކަމަށް ވަރަށް ބޮޑަށް ޝުކުރުވެރިވާ ކަމަށެވެ.

އޭނާ އެ އިޝާރާތްކުރީ އެ ދެމަފިރިންނަށް ކުއްޖަކު ލިބުނު ފަހުން އައިޝްވާރިޔާ ފިލްމީ މަސައްކަތްތަކާ ދުރުވެ، ދަރިފުޅަށް ވަގުތު ހުސްކުރުން ކަމަށް ނޫސްތަކުން ރިޕޯޓުކޮށްފައިވެ އެވެ.

އަބިޝެކް ބުނީ ދަރިފުޅު ލިބުނު ފަހުން އޭނާއަށް ފިލްމީ މަސައްކަތްތަކުގައި އުޅެވުނީ އައިޝްވާރިޔާ ވީ ބޮޑު ގުރުބާނީގެ ސަބަބުން ކަމަށެވެ.

"އަހަރެންގެ ގޭގައި ވެސް، އަހަންނަށް ގޮސް ފިލްމުތަކުގައި މަސައްކަތްކުރެވެނީ ވަރަށް ނަސީބު ރަނގަޅުވީމަ. އެކަމަކު، އަހަންނަށް އެނގޭ އައިޝްވަރިޔާ ހުންނަނީ އާރަދުޔާއާ އެކު ގޭގައިކަން، އަދި އެކަމަށްޓަކައި އޭނާއަށް ވަރަށް ބޮޑަށް ޝުކުރު އަދާކުރަން،" އަބިޝެކް ބުންޏެވެ.

"އެކަމަކު އަހަންނަށް ހީނުވޭ ކުދިން ދެކޭނީ އެހެން ކަމަކަށް. ކުދިން ތިބާއަށް ބަލަނީ ތިންވަނަ މީހާގެ ގޮތުގައެއް ނޫން. އެމީހުން ބަލަނީ ތިއީ ފުރަތަމަ މީހާގެ ގޮތުގައި - ތިބާއަކީ މައިންބަފައިން، ބައްޕަ ނުވަތަ މަންމަ ކަމަށް [އެހެންވީމާ އަބަދުވެސް ކައިރީގައި ހުންނަން ޖެހޭނެ ކަމަށް]."

އަބީޝެކް ބުނީ އޭނާ ކުޑައިރު ވެސް މައިންބަފައިން ކައިރީގައި ނެތް ކަމުގެ އިހުސާސް ނުކުރެވޭ ކަމަށެވެ. އޭނާގެ ބައްޕަ އަމީތާބް ބައްޗަން ފިލްމު ކުޅުމުގައި އެންމެ ބިޒީވި ދުވަސްވަރު، ހުރިހާ ކަމެއް ބެލެހެއްޓީ މަންމަ ޖަޔާ ބައްޗަން ކަމަށާއި އޭނާ އުފަންވި ފަހުން ޖަޔާ ފިލްމީ ދާއިރާއަށް ދުރަށް ގޮސް، އޭނާއަށް ވަގުތު ހުސްކުރި ކަމަށް ވެސް އަބިޝެކް ބުންޏެވެ.

އެކަމަކު، ކޮންމެ ދުވަހަކު ވެސް މަސައްކަތް ނިންމާފައި ބައްޕައަށް ގެއަށް ގޮސް، އޭނާއާ އެކު ވަގުތު ހޭދަކުރާތީ، މައިންބަފައިން ކައިރީގައި ނެތް ކަމުގެ އިހުސާސް ދުވަހަކު ވެސް ނުކުރެވޭ ކަމަށް އޭނާ ބުންޏެވެ.

އައިޝްވާރިޔާ އާއި އަބީޝެކް ވަރިވާން އުޅޭ ކަމުގެ އަޑުތައް މި އަހަރު އިތުރަށް ގަދަވީ، މިދިޔަ ޖުލައި މަހު ބޭއްވި އިންޑިއާގެ މަހުޖަނު މުކޭޝް އަމްބާނީގެ ދަރިފުޅު އާނަންތު އަމްބާނީގެ ކައިވެނީގެ ހަފުލާއަށް ބައްޗަން އާއިލާއާ ވަކިން އައިޝްވާރިޔާ އާއި އޭނާގެ ދަރިފުޅު ދިއުމުންނެވެ. އޭގެ ކުރިން ވެސް އެ ކަހަލަ އަޑުތައް އޮތީ ފެތުރިފަ އެވެ.

އޭގެ ފަހުން ބައެއް ނޫސްތަކުން ރިޕޯޓުކުރި ގޮތުގައި، އެ ދެ ތަރިން ވަރިވާން އުޅުނީ އަބީޝެކް އެހެން އަންހެނަކާ އެކު ލޯބީގެ ގުޅުމެއް ބޭއްވިކަން އައިޝްވާރިޔާއަށް ފަޅާއެރުމުންނެވެ. އެ ދެތަރިން ވެސް މި ވާހަކަ ދޮގު ނުކުރެ އެވެ.

އަބީޝެކް އާއި އައިޝްވާރިޔާ ކައިވެނި ކުރީ އެޕްރީލް 20، 2007 ގަ އެވެ. އެމީހުންގެ ހުންނަ ހަމައެކަނި ދަރިފުޅު އަރަދުޔާ ލިބުނީ ނޮވެމްބަރު 16، 2011 ގަ އެވެ.