ވާހަކަ- އަންޖަލް

(އާދިއްތަ ދުވަހާ ގުޅޭ)

ސަމްރަތު މަރުވީ އަޖައިބު ގޮތަކަށެވެ. އެ ވާހަކަ ނޫސްތަކުގައި ޖެހިއެވެ. މީސްމީޑިޔާގައި ވެސް، ހަކުރުލައިގެން އެކި ގޮތްގޮތަށް އެ ވާހަކަ ދެއްކެވުނެވެ. ސަމްރަތު މަރުވެފައި އޮއްވައި ފެނުނީ ތަނުގެ މަސައްކަތު މީހަކަށެވެ. ފަތިހުގެ ވަގުތުގައެވެ. އެ މީހާ ކިޔައިދިނީ ކަން ހިނގާފައިވާ ގޮތަށެވެ. ސަމްރަތު އޮތީ ރަށުގެ ދިޔަރެހުގައެވެ. ތެމިފައި ގިނަ އިރު އޮތުމުގެ ސަބަބުން ފޯވެ، ދުޅަވެފައެވެ. ތޯތޯވާހަކަ އާއި އޯލަވާހަކަތައް ފެށެނީ އެ ހިސާބުންނެވެ. ސަމްރަތަކީ ބުއްދިހަމަނުޖެހޭ މީހެކެވެ. އޭނަ ބަހައްޓާފައި ހުރީ ބައެއްގެ ބެލުމުގެ ދަށުގައެވެ. އެކަކަށް ވެސް ނޭނގި އޭނަ މޫދާ ހަމައަށް ދިޔައީ ކިހިނެއް ހެއްޔެވެ؟ ކޮން އިރަކު ހެއްޔެވެ؟

ތަހުގީގުން އެނގުނު ގޮތުގައި ސަމްރަތު މަރުވެފައިވަނީ، އިރު އެރުމުގެ މާ ކުރީންނެވެ. އޭނަގެ ފުއްޕާމެޔަކު ފެނެއް ނެތެވެ. ސަމްރަތު މަރުވީ ގެނބިގެނެއް ނޫނެވެ. ފުރޫޒު ފެށެނީ އެ ހިސާބުންނެވެ. ކުރީން ސަމްރަތު ގެއްލިފައި ފެނުނުކަން އެނގޭ މީހުން ބުނާ ގޮތުގައި، ސަމްރަތާ އަވަލެވީ ފެނުގެ ކިޔާނެކެވެ. އޭނަގެ ވާސައަށް ގެންދަން އޭނަ ބޭނުންވީއެވެ. މީހަކަށް ނުފެނި މޫދާ ހިސާބަށް ސަމްރަތަށް ދެވުނީ އެހެންވެއެވެ. ވާނުވާ ނޭނގޭ ހާލަތުގައި ހުރި ސަމްރަތު ގަދަ ހެދީއެވެ. އެ ހިސާބުން ސަމްރަތު މަރާލައިފައި، އެ ބަޔަކު ދިޔައީއެވެ.

ދަތުރުވެހީގެ ދޮރުކަނީގައި ހުރި އަނބުކޯޅިއަކުން ފެށުނު، ނިޒާރުގެ ހިޔާލު ނިމުނީ އެ ހިސާބަށެވެ. ދެން ބަލައިލި އިރު، ފެންނަ ހިސާބުގައި އަންޖަލް ހުއްޓެވެ. އޭނަ ލޯމަތިން ނުގެއްލުން އެއީ ނިޒާރުގެ ހިތަށް ލިބުނު ފިނިކަމެކެވެ. ނިޒާރަށް ހަމަ ނޭނގެނީއެވެ. ހިޔާލަށް ގެއްލިފައި ކިހައި އިރަކު ނިޒާރަށް އޮވެވުނު ހެއްޔެވެ؟ އެ ވަގުތުކޮޅު ތެރޭގައި ކިހައި ކަމެއް ހިނގި ހެއްޔެވެ؟ ދޮރުކަނީގައި އަނބުކޯޅި އެލުވީ ކާކު ހެއްޔެވެ؟ ކީއްވެ ހެއްޔެވެ؟ އެ ސުވާލުތަކުގެ ޖަވާބު ހޯދަން ނިޒާރު އުޅުނު ނަމަ އެ ރޭވުމުގެ އެންމެ ފުނާ ހަމައަށް ނިޒާރަށް ފީނުނީހެވެ. ހަގީގަތުގައި، އަންޖަލް ކޮރާކުޅެން ހުއްޓައި އަތީލާ ގޮވިއެވެ. އަންނަން ބުންޏެވެ. އަތީލާ ބައްޕަ ޖަދުވާންގެ ހަގީގީ މުހުތާދު ކިޔައިދިނީ އެ ފަހަރުއެވެ.

"އަހަރެން ގެއްލޭ އިރަށް ކާފަ އަންނާނެ ހޯދަން." އަންޖަލް ހިތުން ވާހަކަ ދެއްކިއެވެ.

"ކާފަ އެ އޮތީ އެހެން ހިޔާލަކަށް ގެއްލުވައިލާފަ،" އަތީލާ ބުނި އަޑުއިވުނެވެ. "ދައްތަ އައި އިރަކުން ކާފައަށް ވާނުވާ އެނގޭނީ. އާދެބަލަ! ވާހަކައެއް ބުނަން ވެގެންނޭ!"

އަންޖަލް ގޮސް ނިޒާރު ގާތަށް ހުއްޓުނެވެ. އަތީލާ ބުނީ ތެދެކެވެ. ކާފަ އޮތީ އެހެން ހިޔާލެއްގައެވެ. އަންޖަލްއަކަށް ނުވެސް ބަލައެވެ.

"އަތީލާ ފެނިބަލަ!" އަންޖަލް ހިތާހިތުން ބުންޏެވެ. "އޭރުންނެއްނު އަހަންނަށް ދާން އެނގޭނީ."

"ތި ދިމާލުން ވަލުތެރެއަށް ވަދޭ!" އަތީލާ އެދުނެވެ.

އަންޖަލް މަޑުމަޑުން ވަލުތެރެއަށް ވަނެވެ. އެހެން ކުދިން ތިބީ ކޮރާކުޅޭށެވެ. ކުޅިވަރުގެ ފޯރިގަދަކަމުން އެ ކުދީން އަންޖަލްއަކަށް ސަމާލުކަމެއް ނުދެއެވެ. ވަލުތެރެއަށް އަންޖަލް ވަނުމުން، ބިންމަތީގައި ދުވެފައި އޮތް އަލި ރޮނގެއް ފެނުނެވެ. އަންޖަލް ހިނގާ ވަރަކަށް ރޮނގު ކުރުވެއެވެ. އިރުކޮޅަކުން މުޅި މަންޒަރު ބަދަލުވިއެވެ. އަންޖަލްގެ ކުރިމަތީގައި ހުރީ، އޭގެ ކުރި ވިލާތަކުގައި ޖެހިފައިވާ ދޮރެކެވެ. ދޮރުގެ އާސާރީ ކުރެހުންގަނޑު ރިހިވެފައި، އޮފުގަދައެވެ. އެ ދަޅައިގައި ދިރުމެއްވާ ކަހަލައެވެ. ވާހަކައެއް ކިޔައިދޭ ކަހަލައެވެ. އެތެރެއިން އެކި ކުލަކުލައިގެ، އެކި އުސްމިނުގެ ގަސްތައް ފެންނަން ހުއްޓެވެ. ފަތަށް ވުރެ މާ ގިނަ ގަސްތަކާއި ފަތުގެ ކުރި ބިމުގައި ޖެހިފައިވާ ގަސްތަކެވެ. އެހެނަސް، ކުޑަމިނުން ފަތެއް ހިރި ވެސް ނުލައެވެ. މީހަކަށް އަދަބު އަދާކޮށްގެން ތިބި ކަހަލައެވެ. އަންޖަލް ހިތަށްއެރިއެވެ. އަހަންނަކަށް އެ ދޮރެއް ނުހުޅުވޭނެއެވެ.

"އެ ކަމަށް ބަޔަކު ތިބޭނެ." އަތީލާގެ އަޑުއިވުނެވެ.

އެއްވެސް ކުރަކި އަޑެއް ނެތި ދޮރު ހުޅުވުނެވެ. އަންޖަލް އެތެރެއަށް ފިޔަވަޅު އެޅިއެވެ. ވައިރޯޅިއެއް ނެތް ނަމަވެސް، ގަސްތައް މަޑުމަޑުން ހަރަކާތް ކޮށްލިއެވެ. ތަނަށް ދިރުން ވެރިވިއެވެ. ފަތްތައް ލެނބިލިއެވެ. އަދަބުވެރި ސަލާމަކުން ސަލާންކޮށްލި ކަހަލައެވެ. ހީވަނީ އެ މާހައުލަށް އަންޖަލް އެނގޭ ހެންނެވެ. އަންޖަލް ހިތަށް އެރިއެވެ. ދިރުން ލައްވާފައިވާ އެ ގަސްތަކުގައި ހިތެއް އޮންނަނީ ހެއްޔެވެ؟ އެ ހިތުގައި ލޯބި އުފެދުނީ ހެއްޔެވެ؟ އެއީ ކީއްވެގެން ހެއްޔެވެ؟

"ދައްތަ ދެކެ ކާކު ލޯބި ނުވާނީ؟" ފަހަތުން އަތީލާގެ އަޑުއިވުނެވެ.

އަންޖަލް ބަލައިލި އިރު، އަންޖަލް ލައިގެން ހުރި ކަހަލަ ހެދުމެއްގައި އަތީލާ ހުއްޓެވެ. އެހެނަސް، ކުރިޔާ ތަފާތެވެ. އަތީލާގެ ގައިގައި ރަންކުލައިގެ ވިދުމެއް ހުއްޓެވެ. ހީވަނީ ވަރަށް ފުށް ކުދި ވެލިފޮތިތަކެއް ތަތްކޮށްފައިވާ ފަށަލައެއް ލެވިފައިވާހެންނެވެ. ނައްދު ވަސް ވެސް ދުވިހެން އަންޖަލްއަށް ހީވިއެވެ.

"ކޮން ވަހެއް އެ ދުވަނީ؟" އަންޖަލް ޔަގީން ކޮށްލިއެވެ.

"ކީކޭތަ ދައްތަމެން ކިޔަނީ؟" އަތީލާ ވިސްނައިލިއެވެ. "އެއީ ބޮކަރުދުންދަނޑި. ބޮކަރާ، މާވަހަރާ، ގޮމަކަސްތޫރި އެއްކޮށްްގެން ހަދާފަ ހުންނަ އެއްޗެއް."

އަންޖަލްއަށް ވެސް ހީވީ އެހެންނެވެ.

"އަތީލާ ކީއްވެ ބައެއް ފަހަރު ފެނިފަ، އަނެއްބައި ފަހަރު ނުފެންނަނީ؟" އަންޖަލް ސުވާލު ކުރިއެވެ. "ކީއްވެ އެކި ފަހަރު އެކި ގޮތަށް ތި ހުންނަނީ؟"

"އެއްކަލަ ދައްތަގެ ސުވާލުފޮށި ހުޅުވައިލީ،" ހީނގެންފައި އަތީލާ ބުންޏެވެ. "ދެން ދައްތަގެ ސުވާލުތަކަށް ޖަވާބު ދޭން ހުއްޓާ ދައްތަ ދާން ޖެހިފަ އޮންނާނީ. ހުރޭ ކުރުކޮށް ކިޔައިދޭނަން. އިންސާނުން ކުޑައިރު އުސް ތަންތަނުން ފުންމޭތަ؟ އަލިފާނާ ކުޅެން އެނގޭ؟ ތޫނު އެއްޗެހި ގެންގުޅެން އެނގޭ؟ ވަކި ވަރަކަށް ބޮޑުވީމަ ދަސްކުރަން ދޯ ޖެހެނީ؟ އެހެންނޫނީ އެހެން މީހެއްގެ އެހީ ހޯދަން ޖެހޭނީ. ސިފަ ބަދަލުކުރުމަކީ އަހަންނަށް ވަރަށް ފަސޭހަ ކަމެއް. އުނދަގޫވަނީ އިންސާނެއްގެ ސިފަޔަށް ބަދަލުވާން. ބައެއް ފަހަރު ބައްޕަގެ އެހީ ހޯދަން ވެސް އަހަންނަށް ޖެހޭ."

އެ ހިސާބުން އަތީލާގެ ވާހަކަ ބަދަލު ކޮށްލިއެވެ.

"ހާދަ ގިނަ ވާހަކައެއް ދައްތައަށް ކިޔައިދޭން އެބަ ޖެހެއޭ!" އެހެން ބުނެފައި، އަތީލާ ބޭނުންވާ ދިމާއަށް މަޑުމަޑުން މިސްރާބު ޖެހިއެވެ.

"އަހަރުމެންގެ މި ދުނިޔެއާ، ދައްތަމެންގެ ދުނިޔެ ވަރަށް ތަފާތުވާނެ. ބަލައިލީމަ ވެސް އެ ކަން އެނގެއެއްނު. ބައެއް ފަހަރު މި ތަނުގެ ގަޑިއެއްގެ އިރަކީ ދައްތަމެންގެ މިނެޓެއް. ހަނދުވަރުދޭން ފެށީމަ ވަގުތު ހިނގާލެއް އަވަސް ވާނެ. އަވިދޭން ފެށީމަ ވަގުތު ލަސްވާނެ. އަހަރުމެން މި ތަނުގެ އެތެރެއަށް ވަންނަ ވަރަކަށް، ދައްތަގެ ހިތުގެ ވިންދު ލަސްވާނެ. ބައެއް އިންސާނުންގެ އިސްތަށިތަކަށް ރިހިކުލަ ވެސް އަރާނެ."

އަތީލާ ނިކަން ބާރަށް އައިސް އަންޖަލްގެ ކުރިމައްޗަށް އެރިއެވެ.

"އަހަރެން މި ބުނާ އެއްޗެއް ދައްތަ ނިކަން ރަނގަޅަށް އަޑުއަހައްޗޭ!" އަތީލާ ބުންޏެވެ. "ކުރީ ފަހަރު ދައްތަ އެހީމެއްނު މި ތާ އެކަކު ވެސް ނޫޅެނީހޭ؟ އަހަރެން ބުނީމެއްނު ދެން ފަހަރަކުން ދައްކާނަމޭ! ދައްތަގެ ކުރިމަތިން އަހަރެން އެއްކައިރިވާ އިރަށް މި ތަނުގެ އަހުލުވެރިން ދައްތައަށް ފެންނަން ފަށާނެ. ބިރު ނުގަންނާތި! އެކަކު ވެސް ދައްތައަކަށް ކަމެއް ނުކުރާނެ."

އަތީލާ މަޑުމަޑުން އެއްފަރާތަކަށް ޖެހިލިއެވެ. ހީވީ ފަރުދާއެއް ކަހައިލިހެންނެވެ. އަންޖަލްގެ ދެލޯ ތަންމިނަށް ހުޅުވުނެވެ. ދުވަހަކު ވެސް ނުފެންނަ ކަހަލަ ބިޔަ، ބޮޑެތި ސޫރަތައް ހުއްޓިގެން ތިއްބެވެ. ދަޅުފަޅާފައިވާ އެއްޗިއްސާއި ނަގޫ ހުރި އެއްޗިއްސެވެ. ކެހެރި ފަޅާފައިވާ އެއްޗިއްސާއި ހުޅުނބު ފަޅާފައިވާ އެއްޗިއްސާއި ޒަމާން ވެފައިވާ ގަސްގަހުގެ ތޮށި ކަހަލަ އެއްޗަކުން އުފެދިފައިވާ އެއްޗިއްސެވެ. ހަތަރެސްފައިޖެހި އެއްޗިއްސާއި ދެފައި މައްޗަށް ތެދުވެތިބި އެއްޗިއްސެވެ. ދެ އަތަށް ވުރެ އަތް ގިނަ އެއްޗިއްސާއި ދެފަޔަށް ވުރެ ފައި ގިނަ އެއްޗިއްސާއި ބޮޑެތި ފިޔަގަނޑު ހުންނަ އެއްޗިއްސެވެ. ބައެއް އެއްޗެހި ދުރުން އުދުހޭ ތަން ވެސް ފެނެއެވެ. އަންޖަލް ހައިރާންވި ނަމަވެސް ބިރެއް ނުގަތެވެ. އެ ވަގުތު ވަރަށް ކައިރިން އެއްޗެއް ހޭރިގަތް އަޑު އަންޖަލްއަށް އިވުނެވެ. އެ ފަހަރު، ސިހިގެން ގޮސް އަންޖަލްއަށް ހަޅޭއްލަވައިގަނެވުނެވެ. ހަޅޭއްލަވައިގަންނަ އިރަށް މުޅި މާހައުލު ބަދަލުވެގެންދިޔައެވެ. ހޭރިގަތް ބިޔަ ދޫނީގެ ފިޔަގަނޑުގެ ވައިން އަންޖަލް ނުވެއްޓި ސަލާމަތްވީ އަތީލާ ހިފޭއްޓީތީއެވެ. އަތީލާ ފެށީ ހޭނށެވެ.

"އެ ވީ ކިހިނެއް؟" އަންޖަލް އެހިއެވެ.

"އެއީ މަގޭ ލާނެތް ކޮއްކޮގަނޑު،" އަތީލާ ބުންޏެވެ. "ވަރަށް ވާނެ ސިއްސާ ހިތް."

އަންޖަލް އެ ދޫންޏަށް ބަލައިލިއެވެ. ވަކި ދިގު ދެފައި ފަހަތަށް ދަމައިލަމުން އަންޖަލްއާ ދިމާއަށް ދޫނި ބަލައިލިއެވެ. ދެލޯ ރަތްކޮށްލާފައި އަނގަ ހުޅުވައިލިއެވެ. ހީވަނީ ބިރު ގަންނަވަން އުޅޭ ހެންނެވެ.

"ނުގަނޭ ބިރެއް!" އަންޖަލް ގޮވައިލިއެވެ.

އަންޖަލްގެ އަޑާ އެކު، އަނެއްކާ ވެސް މުޅި މާހައުލު އެހެން ގޮތަކަށް ބަދަލުވިއެވެ. ނޫ އުޑަށް ފެހިކުލަ ވެރިވިއެވެ. ބައެއް ގަސް ވެލަށް، އަނެއްބައި ގަސް ރުއް ކަހަލަ އެއްޗަކަށް ބަދަލުވިއެވެ. އަތީލާ ބުނި ގޮތުގައި، ބާރަށް ވާހަކަ ދެއްކުމުން އެހެން ގޮތަކަށް، ލަވަ ކިޔުމުން އެހެން ގޮތަކަށް، ހަޅޭއްލެވުމުން އެހެން ގޮތަކަށް މާހައުލު ބަދަލުވާނެއެވެ. ބުނެވޭ އެއްޗަކުން، ބިމު އަޑީގައި އުޅޭ ދިރޭ އެއްޗެހި ބިމުން މައްޗަށް ވެސް އަރައިފާނެއެވެ.

"އެހެންވިއްޔާ އަހަރެން ދެން ހައްޕު." ސަމާސާ ރާގަކަށް އަންޖަލް ބުންޏެވެ.

"ވާހަކަ ނުދައްކާތާ މާ ގިނަ އިރު ވެއްޖެއްޔާ ވާނެ ގޮތް އެނގޭތަ؟" އަތީލާ އެހިއެވެ. "ދެން ދުވަހަކު ވެސް ވާހަކަ ނުދެއްކިދާނެ."

އަންޖަލްއަށް ލިބުނީ ޝޮކެކެވެ.

"އަދިވެސް ވަރަށް ވަރަށް ގިނަ ވާހަކަ ކިޔައިދޭން އެބަ ހުރި." ވާހަކަ ދައްކަމުން އަތީލާ ވަނީ ހޮހަޅައެއް ކަހަލަ ތަނަކަށެވެ.

އެއީ އަނގަ ކުޑަ، އެތެރެ ތަނަވަސް، ނޫކުލައިގެ ތަނެކެވެ. މުޅި ތަން ހުޅުދާން ކޮށްފައިހުރީ ވިލުނޫކުލައިގެ ކުރިކީލަ މަންދީލައިންނެވެ. ކޮންމެ ބިއްލޫރި ގަހެއް ބިޔަވެފައި، އަލިގަދައެވެ. ތަނުގައި އަޅާފައި އޮތީ ކަނޑުނޫ ކުލައިގެ ދޫލައެއް ކަހަލަ އެއްޗެކެވެ. އެކަމަކު ދޫލައިގެ ކެހެރިތައް މަޑުމަޑުން ހިރެއެވެ. ފާރު ހުރީ، އުޑުނޫކުލައިގެ ނުވިދާ ޖަވާހިރެއް ކަމުގައިވާ ލާޖުވަރުދުންނެވެ.

"މީ ހާދަ ރީތި ތަނެކޭ!" އަންޖަލްއަށް ބުނެވުނެވެ.

"މީ ބައްޕަގެ ކޮޓަރި،" ތަންކޮޅެއް ނުތަނަވަސްވެފައި އަތީލާ ބުންޏެވެ. "އެހެރީ ބައްޕަ. އަހަރެން ދެން މި ދަނީ."

އަތީލާ އެހެން ބުނެފައި ގެއްލުމާއި ކުއްލިއަކަށް ޖަދުވާން ފެނުން އެއީ އެކުއެކީގައި ހިނގި ދެ ކަންތަކެވެ. އެ ފަހަރު ޖަދުވާން ހުރީ އަންޖަލް ނުދަންނަ މީހެއްގެ ސިފައިގައެވެ. އަންޖަލް ހިތަށް އެރިއެވެ. އަތީލާ ދިޔައީ ކީއްވެގެން ހެއްޔެވެ؟

"އަހަރެން ބުނިން މި ވާހަކަތައް އަޑުއަހަން އަތީލާ ނުހުންނައްޗޭ!" އޯގާވެރި އަޑަކުން ޖަދުވާން ބުންޏެވެ.

"އަންޖަލްގެ މަންމަ މަރުވީ ކިހިނެއްކަން އެނގޭތަ؟" (ނުނިމޭ)