ސަލްމާންގެ "ސުލްތާން" މުގުރާލާނެކަމަށް ބެލެވޭ ބައެއް ރެކޯޑްތައް

ސަލްމާން ޚާންގެ ފިލްމެއް ރިލީޒްވާން ތައްޔާރުވާ ނަމަ އެ ފިލްމެއް ބޮކްސް އޮފީހުގައި ބޮޑު ފައިދާއެއް ހޯދައި ބްލޮކްބަސްޓާއަށް ވާނެކަމަށް ގިނަ ބަޔަކު މާކުރިން އުންމީދުކުރަން ފަށަ އެވެ. އަދި ފިލްމު ބޮކްސް އޮފީހުގައި މުގުރާލާނެ ރެކޯޑްތައް ވެސް ލަފާކުރަން ފަށަ އެވެ.

ޚާއްސަކޮށް، އީދު ކަހަލަ މުނާސަބަތުތަކާ ގުޅުވައިގެން ނެރޭ ފިލްމުތައް ބަލަން ގިނަ އަދަދެއްގެ މީހުން ސިނަމާތަކަށް އާއްމުކޮށް ގޮސް އުޅެ އެވެ. ނަތީޖާއެއްގެ ގޮތުން އެތައް ރެކޯޑްތައް މުގުރާލުމުގެ ފުރުސަތު މިފަދަ ފިލްމުތައް ހޯދަ އެވެ.

ސަލްމާންގެ "ސުލްތާން" ވެސް ގިނަ ރެކޯޑްތަކެއް މުގުރާލާނެ ކަމުގެ ޔަގީންކަން ގިނަ ބަޔަކަށް އެބައޮތެވެ.

މިއަހަރުގެ އެންމެ ރަނގަޅު ފެށުމެއް ލިބޭ ފިލްމު

މިދިޔަ އަހަރު ނުކުތް ސަލްމާންގެ "ބަޖްރަންގީ ބައިޖާން" އަށާއި "ޕްރޭމް ރަތަން ދަން ޕާޔޯ" އަކަށް ޝާހްރުކް ޚާންގެ "ހެޕީ ނިއު އިޔާ"ގެ އެއް ދުވަހުގެ ރެކޯޑް މުގުރައެއް ނުލެވުނެވެ. ނަމަވެސް "ސުލްތާން" މި ރެކޯޑް މުގުރާލާނެ ކަމަށް ބެލެވެ އެވެ.

ކުޅިވަރަކަށް ބިނާކުރި ފިލްމަކަށް ލިބޭ އެންމެ ބޮޑު އާމްދަނީ

އެކިއެކި ކުޅިވަރުތަކަށް ބިނާކޮށް ބޮލީވުޑުން އުފައްދާ ފިލްމުތަކަކީ އެހާ ހިނގާ ފިލްމުތަކަކަށް ނުވެ އެވެ. ބޮކްސް އޮފީހުގައި ކިރިޔާ ވެސް ފާހަގަކޮށްލެވޭ ވަރުގެ ކާމިޔާބީއެއް ވެސް ލިބިފައި ވަނީ "ބާގް މިލްކާ ބާގް" ފަދަ މަދު ފިލްމަކަށެވެ. ނަމަވެސް ޖުލައި 6 ގައި މި ނަތީޖާ ވެސް ބަދަލުކޮށްލެވިދާނެ ކަމަށް ބެލެވެ އެވެ. ކުޅިވަރެއްގެ މައްޗަށް ބިނާކޮށް އުފައްދާފައިވާ ފިލްމުތަކުގެ ތެރެއިން އެންމެ ރަނގަޅު އާމްދަނީއެއް ލިބުނު ފިލްމަށް "ސުލްތާން" ވެގެންނެވެ.

ބޮލީވުޑް ތާރީޚު ބަދަލުކޮށްލާ ފިލްމް

ބޮލީވުޑް ތާރީޚުގައި ވެސް ފުރަތަމަ ދުވަހު އެންމެ ބޮޑު އާމްދަނީއެއް ލިބުނު ފިލްމަށް ވުމުގެ ފުރުސަތު ވެސް "ސުލްތާން" އަށް އެބައޮތެވެ. ސަލްމާންގެ ފިލްމަކަށް ވެއްޖެ ނަމަ ފުރަތަމަ ދުވަހު 400 މިލިއަނަށް ވުރެ މަތިން އާއްމުކޮށް ލިބެ އެވެ. އެހެންކަމުން މި އީދުގައި މިއަށްވުރެ މަތީ އަދަދެއް ލިބޭގޮތް ވެއްޖެ ނަމަ މި ރެކޯޑް ވެސް މުގުރާލެވޭނެ އެވެ.

ސަލްމާންގެ 10 ވަނަ 100 ކްރޯޑު ފިލްމު

ސަލްމާންގެ ފިލްމަކަށް ނަމަ 100 ކްރޯޑު (1000 މިލިއަން ރުޕިޒް) ލިބޭނެކަން އެއީ ގާތްގަނޑަކަށް ޔަގީން ކަމެކެވެ. މިއީ 2009 ގައި ރިލީޒްވި "ވޯންޓަޑް"ގެ ފަހުން ސަލްމާން ދަމަހައްޓަމުން އަންނަ ރެކޯޑަކަށް ވާތީ އެވެ. "ސުލްތާން" އަށް ސަލްމާންގެ 10 ވަނަ 100 ކްރޯޑު ފިލްމުގެ ރެކޯޑް ހެދުމުގެ ފުރުސަތު ވަރަށް ބޮޑެވެ.

އަނުޝްކާ ޝަރުމާގެ އެންމެ ކާމިޔާބު ފިލްމު

އަނުޝްކާ ޝަރުމާގެ ކެރިއަރުގައި ވަރަށް ކާމިޔާބު ފިލްމުތަކެއް ރިލީޒްވެފައިވެ އެވެ. އާމިރު ޚާނާ އެކު ކުޅުނު "ޕީކޭ" އަކީ މީގެ ތެރެއިން ވެސް މިހާތަނަށް އެންމެ ބޮޑު ކާމިޔާބެއް ހޯދި ފިލްމެވެ. ބޮކްސް އޮފީހުގައި މި ފިލްމުގެ ރެކޯޑް އަދި މިހާތަނަށް އެއްވެސް ފިލްމަކަށް މުގުރާލެވިފައެއް ނެތެވެ. މިހާރު ލަފާކުރެވޭ ގޮތުން "ސުލްތާން" އަކީ "ޕީކޭ"ގެ ރެކޯޑު މުގުރާލުން އެންމެ ގާތް ފިލްމެވެ. އެހެންކަމަށް ވެއްޖެނަމަ އަނުޝްކާގެ ކެރިއަރުގެ އެންމެ ބޮޑު ބްލޮކްބަސްޓާ އަށް ވެސް "ސުލްތާން" ވާނެ އެވެ. ހަމަ ގައިމުވެސް މި ރިކޯޑު މުގުރާލެވޭނެ ދުވަހަކަށް އަނުޝްކާ އިންތިޒާރު ކުރާނެ އެވެ.