ޖެނިފާ ލޮޕޭޒްގެ "ހަސްލަޒް" މެލޭޝިއާގައި މަނާކޮށްފި

އަހުމަދު އަދްޝަން، މިހާރު

23 ސެޕްޓެމްބަރ 2019 - 15:01

އާންމު މިންގަނޑަށް ނުފެތޭ ބޭއަދަބީ މަންޒަރުތައް ގިނަކަމުން އެ ފިލްމަކީ ދައްކަން ހެޔޮވާރުގެ ފިލްމެއް ނޫން ކަމަށް ނިންމައި، އެމެރިކާގެ މަޝްހޫރު އަންހެން ލަވަކިޔުންތެރިޔާ ޖެނިފާ ލޮޕޭޒްގެ އެންމެ ފަހުގެ ފިލްމު "ހަސްލަޒް" މެލޭޝިއާގައި ދެއްކުން މަނާކޮށްފި އެވެ.

އެސްޓީއެކްސްގެ މި ފިލްމު އެ ގަމުގައި މަނާކުރިކަން މެލޭޝިއާގައި ފިލްމު ޑިސްޓްރިބިއުޝަނާ ހަވާލުވި ސްކްއާ ބޮކްސް ޕިކްޗާޒް އިން ވަނީ އެ ވާހަކަ އިންސްޓަގްރާމްގައި ވެސް ހިއްސާކޮށްފަ އެވެ. އެތަނުން ބުނީ ފިލްމަށް އެތައް ބަޔަކު އިންތިޒާރު ކުރަމުން ދިޔަ ނަމަވެސް "ހަސްލާޒް" މެލޭޝިއާގައި ދެއްކޭ ގޮތް ނުވުމުން މާފަށް އެދޭ ކަމަށެވެ.

މެލޭޝިއާގެ ފިލްމު ސެންސަޝިޕް ބޯޑުން އެ ފިލްމު ސިފަކޮށްފައި ވަނީ ސިނަމާތަކުގައި ދައްކަން ހެޔޮ ނުވާނެ ފިލްމެއްގެ ގޮތުގަ އެވެ. ނިވާކަން ކުޑަ މަންޒަރުތަކާއި މަސްތުވާތަކެތި ބޭނުންކުރުން ފަދަ މަންޒަރުތައް ފިލްމުގައި ވަރަށް ގިނަ ކަމަށް ބުންޏެވެ.

View this post on Instagram

OFFICIAL ANNOUNCEMENT We regret to inform you that Hustlers movie release has been cancelled as it has been banned in Malaysia. We deeply apologize for the inconveniences caused to our beloved followers, fans of the movie, medias and partners. A special shout-out to @presenceparis @reebokmalaysia @benefitmalaysia @flyproject.co @thenictionary @acutabovegroup @restylemy @tgvpictures and other medias involved. We certainly appreciate all the love and support from our fans and movie lovers for this title; yet it’s our loss that we are unable to carry on. Our sincere apologies that we have let you down. Nevertheless, we hope to bring you more exciting movies in the near future with your continuous support. Thank you 🙏🏻

A post shared by Square Box Pictures (@squareboxpicturesmy) on Sep 19, 2019 at 8:36am PDT

ބޯޑްގެ ޗެއާމަން މުހައްމަދު ޒަމްބޭރީ އަބްދުލް އަޒީޒް އޭއެފްޕީ އަށް ވިދާޅުވި ގޮތުގައި ފިލްމު ސެންސަރުކޮށްގެން ދައްކާ ނަމަ އޭގައި ކަނޑާލަން ޖެހޭ ކިތަންމެ މަންޒަރެއް ހުރުމުން ބަލާނެ އެއްޗެއް ފިލްމުގައި ނޯންނާނެ އެވެ.

"އެހެންވެ ފިލްމު މަނާކުރީ،" އޭނާ ވިދާޅުވި އެވެ.

މެލޭޝިއާގެ މި ނިންމުމާ ގުޅިގެން އެސްޓީއެކްސް އިން މިހާތަނަށް އެއްވެސް އެއްޗެއް ނުބުނެ އެވެ.

މީގެ ކުރިން ވެސް މެލޭޝިއާ އަކީ ބައެއް ފިލްމުތައް މަނާކޮށްފައިވާ ގައުމެކެވެ. އޭގެ ތެރޭގައި 2013 ގެ "ދަ ވުލްފް އޮފް ވޮލްސްޓްރީޓް" އާއި 2015 ގެ "ފިފްޓީ ޝޭޑްސް އޮފް ގްރޭ" އަދި 2009 ގެ "ބްރޫނޯ" ހިމެނެ އެވެ. ދާދި ފަހުން އިނގިރޭސި މިއުޒިކް ލެޖެންޑް އެލްޓަން ޖޯންގެ ބައޮގްރަފިކަލް ޑްރާމާ "ރޮކެޓްމޭން" ވެސް މެލޭޝިއާގައި ދެއްކީ އެތައް މަންޒަރެއް ކަނޑައިލުމަށް ފަހު އެވެ.

މި މަހުގެ 13 ގައި ރިލީޒްކުރި "ހަސްލާޒް" އަކީ 2015 ވަނަ އަހަރު ނިއު ޔޯކް ޓައިމްސްގައި "ދަ ހަސްލާޒް އެޓް ސްކޯސް" ގެ ނަމުގައި ޖެހި އާޓިކަލެއްގެ މައްޗަށް ބިނާކޮށް ލޮރީން ސްކަފާރިއާ ޑައިރެކްޓްކުރި ކްރައިމް ޑްރާމާއެކެވެ.

މި އަހަރުގެ ޓޮރޮންޓޯ އިންޓަނޭޝަނަލް ފިލްމު ފެސްޓިވަލް (ޓީއައިއެފްއެފް) ގައި ވެސް ޕްރިމިއާކުރި ފިލްމުގެ މައިގަނޑު ކާސްޓުންނަކީ ލޮޕޭޒް، ކޮންސްޓެންސް ވޫ، ޖޫލިއާ ސްޓައިލްސް، ކެކީ ޕަލްމާ، ލިލީ ރެއިންހާޓް، ލިޒޯ އަދި ރެޕާ ކާޑީ ބީ އެވެ.