ވިދިޔާ ޗުއްޓީ އަށް ރާއްޖެ އަށް

ބޮލީވުޑްގެ މަޝްހޫރު ބަތަލާ ވިދިއާ ބާލަން ޗުއްޓީ އަށް މިއަދު ރާއްޖެ އަތުވެއްޖެ އެވެ.

އޭނާއާ އެކު ވެލާނާ އިންޓަނެޝަނަލް އެއާޕޯޓްގައި ދިވެހި ފޭނުންތަކެއް ނަގާފައިވާ ފޮޓޯތަކެއް ވެސް ސޯޝަލް މީޑިއާގައި ދައުރުވެފައިވެ އެވެ. ނަމަވެސް ދަތުރާ ގުޅޭ އެއްވެސް ފޮޓޯއެއް ވިދިޔާ އަދި ސޯޝަލް މީޑިއާގައި ހިއްސާނުކުރާތީ އޭނާ ޗުއްޓީ ހޭދަކުރަނީ ކޮން ރިސޯޓެއްގައި ކަމެއް ނޭނގެ އެވެ.

"ދަ ޑާޓީ ޕިކްޗާ" ކުޅެގެން ނެޝަނަލް އެވޯޑް ވެސް ހޯދާފައިވާ 40 އަހަރުގެ ބަތަލާ ރާއްޖެ އައީ ފިރިމީހާ އަދި ޕްރޮޑިއުސަރު ސިދާތު ރޯއި ކަޕޫރާ އެކީގައި ކަމަށް އެނގިފައިވެ އެވެ. އޭނާ އަކީ "އާޝިގީ 2" ފަދަ ފިލްމުތައް ކުޅުނު އަދިތިޔާ ރޯއި ކަޕޫރްގެ އިތުރުން އެކްޓަރު ކުނާލް ރޯއި ކަޕަޕޫރްގެ ބޭބެ އެވެ.

ވިދިޔާ ރާއްޖެ އައިސްފައި މި ވަނީ ހިއުމަން ކޮމްޕިއުޓަރުގެ ނަމުން މަޝްހޫރުވި އިންޑިއާގެ ކުރީގެ ހިސާބު އިލްމުވެރިޔާ ޝަކުންތަލާ ދޭވީގެ ބައޮގްރަފިކަލް ޑްރާމާގެ ޝޫޓިން މި މަހުގެ ކުރީކޮޅު ނިންމާލައި، ފިލްމު ރިލީޒްކުރާ ތާރީހު ވެސް އިއުލާންކުރުމަށް ފަހު އެވެ. ވިދިޔާ ޝަކުންތަލާގެ ރޯލު ކުޅޭ ފިލްމު ސިނަމާތަކަށް އަންނާނީ އަންނަ އަހަރުގެ މެއިި 8 ގަ އެވެ.

ވިދިޔާ އެންމެ ފަހުން ސްކްރީނުން ފެނިފައި ވަނީ އޮގަސްޓް މަހު ރިލީޒްކުރި "މިޝަން މަންގަލް" އިންނެވެ.

އާ އަހަރަކަށް މަރުހަބާ ކިޔަން ގާތްވަމުން އަންނަ އާ އަހަރާ ދިމާކޮށް ބޮލީވުޑްގެ ވަރަށް ގިނަ ތަރިން ރާއްޖެ އަށް ޒިޔާރަތްކުރާނެ ކަމަށް ބެލެވެ އެވެ.

ބަތަލާ ނުޝްރަތު ބަރޫޗާ ވެސް މިހާރު އަންނަނީ ސަން ޝިޔާމް އިރުފުށި ރިސޯޓްގައި ޗުއްޓީ ހޭދަކުރަމުންނެވެ.