ކާން ނުލިބެނީތޯ އެހުމުން ވާނީ ކަޕޫރް ރައްދު ދީފީ

މިދިޔަ އަހަރުގެ އެންމެ ކާމިޔާބު ފިލްމު ކަމަށްވާ "ވޯ" ގެ ބަތަލާ ވާނީ ކަޕޫރް އިންސްޓަގްރާމްގައި އާންމުކުރި ފޮޓޯއެއްގައި ވަރަށް ހިކިކޮކޮށް ފެންނާތީ، ރަނގަޅަށް ކާން ނުލިބެނީތޯ އަހައި މީހަކު ކުރި ކޮމެންޓަކަށް ރައްދު ދީފި އެވެ.

"ބެކް ޓް ދަ ގްރައިންޑް" ކެޕްޝަނަކަށް ޖަހާފައި 31 އަހަރުގެ ބަތަލާ ޕޯސްޓްކުރި ފޮޓޯ އަށް އަމާޒުވި ފާޑުކިޔުންތަކާ ގުޅިގެން ރައްދު ދެމުން ބުނީ "އަހަރެން ހުރި ސިފައާ ދޭތެރޭ ހިތްހަމަޖެހޭ'" ކަމަށާއި "ކަލޭ އުފާކުރަން ވަކިކަމެއް ކުރަން ނުޖެހޭ" ކަމަށެވެ.

"މީސްމީހުންނާ ޖައްސާލައިގެން ނޫޅެ އުފެއްދުންތެރި ކޮންމެވެސް ކަމެއް ކުރިއްޔާ ވާނީ ކީއް؟ ހަރުކަށިކަމާއި ނަފުރަތު އުފައްދަން އުޅުމުގެ ބޭނުމެއް ނެތް،" ވާނީ ބުންޏެވެ.

ވާނީ ގެންގުޅެނީ އެންމެ ފަހުގެ އައިފޯނެއް ނޫންކަން ފޮޓޯ އިން އެނގޭތީ ބައެއް މީހުން އެކަމަށް ވެސް ޖޯކް ޖަހައި އައިފޯން 11 ބޭނުންނުކުރަނީ ކީއްވެތޯ ވެސް އަހާފައިވެ އެވެ.

މިހާތަނަށް އެންމެ ހަތަރު ފިލްމެއް ކުޅުނު ބަތަލާ އަކީ ދޭތެރެ ދޭތެރެ އިން ފާޑުކިޔުންތައް އަމާޒުވާ ބަތަލާއެކެވެ. އެގޮތުން ދާދި ފަހުން ހިންދޫ ދީން ރަމްޒުކޮށްދޭ ލަފުޒުތަކެއް ޕްރިންޓްކޮށްފައިވާ ގަޔަށް ބާރު ކުރު ޓޮޕެއް ލައިގެން ނަގާފައިވާ ފޮޓޯއަކާ ގުޅިގެން ވެސް ވަރަށް ގިނަ ބަޔަކު ވާނީ އަށް ފާޑުކިޔާފައިވެ އެވެ.

ޔާޝްރާޖް ފިލްމްސް (ވައިއާރްއެފް) ގެ ފިލްމެއް ނޫނީ ކުޅެން ނުލިބޭ ބަތަލާ މިހާރު އަންނަނީ އެ ސްޓޫޑިއޯ އިން މި އަހަރުގެ ޖުލައި 31 އަށް ތާވަލުކޮށްފައިވާ އެކްޝަން-އެޑްވެންޗާ ފިލްމު "ޝަމްޝޭރާ" ގެ މަސައްކަތްކުރަމުންނެވެ.

ކަރަން މަލްއުތުރާ ޑައިރެކްޓްކުރާ އެ ފިލްމުގެ ބަތަލުންނަކީ ރަންބީރު ކަޕޫރާއި ސަންޖޭ ދަތެވެ.