އިއްޒުއްދީން ސްކޫލުގެ ޕްރިންސިޕަލް ނާދިރާ ހަސަން ވިސްނަވަމުން އައީ އެ ސްކޫލްގެ ކުދިންގެ "ސްކިލް" ގަޑި އޭގެ އެންމެ ރަނަގޅު ގޮތުގައި ބޭނުން ކުރެވޭނެ ގޮތަކާ ދޭތެރޭގަ އެވެ. އޭނާގެ ސިކުނޑި އަށް އައީ ކުދިންގެ އަތުން ފޮތް ފަންސޫރު ދޫކޮށް، ދިރިއުޅުމަށް ނުކުންނައިރު އަމިއްލަ އަށް ކަންކަން ކޮށްލެވޭ ވަރުގެެ ބަޔަކަށް ސްކޫލްގެ ތެރެއިން ހަދައި ދެވިއްޖެ ނަމަ ނަތީޖާ މާ ރަނގަޅު ވާނެ ކަމެވެ.
އެހެންވެ، ނާދިރާ އިސްވެ އިއްޒުއްދީން ސްކޫލްގައި އެ ކަން ކުރެވޭނެ ގޮތް މަގުފަހި ކުރައްވަން ފެއްޓެވި އެވެ. މީގެ ތިން މަހެއްހާ ދުވަސް ކުރިން އެ ސްކޫލުގައި ފެށި އެ މަސައްކަތްތައް ނިންމައި މިހާރު ކުދިން އެ އަންނަނީ ސްކޫލްގެ ތެރޭގައި އަމަލީ މަސައްކަތްތައް ދަސްކުރަމުންނެވެ.
ކުދިން ބޮޑެތިވަމުން އަންނައިރު އާންމު ދިރިއުޅުމުގައި ކޮންމެހެން އެނގެންޖެހޭ ކަންކަން ދަސްކޮށްދިނުމަށް މިދިޔަ އަންގާރަ ދުވަހު އެ ސްކޫލްގައި ވަނީ ހަތަރު ލެބެއް ހުޅުވައިފަ އެވެ. ކެއްކުމާއި ފެހުމާއި އިސްތިރި ކުރަން ދަސްކޮށްދިނުން ފަދަ މަސައްކަތްތައް އިއްޒުއްދީންގެ ކުދިންނަށް ދަސްކޮށްދޭނެ އެވެ. ދުވަހުގެ ވަކި ގަޑިތަކެއް އެ ކުދިން ހާއްސަ ކުރާނީ އެ ކަންކަން ދަސްކުރުމުގަ އެވެ.
އެއީ ފަންނުވެރި މަސައްކަތައް ދަސްކޮށްދިނުމަށް އާޓް އެންޑް ކްރާފްޓްސް ލެބަކާއި ގޭތެރޭގެ މަސައްކަތްތައް ދަސްކޮށްދިނުމަށް ހޯމް ސައިންސް ލެބަކާއި އާޓް އެންޑް ކްރާފްޓްސްގެ ކަންކަން ދަސްކޮށްދޭ ލެބެއްގެ އިތުރުން އިންޑޯ ގޭމްސްތަކަށް ހާއްސަ ގޭމްސް ލެބެކެވެ.
ގްރޭޑް 1 އިން 8 އާ ހަމައަށް ކިޔަވައިދޭ އިއްޒުއްދީން ސްކޫލް ގައި 500 އަށް ވުރެ ގިނަ ކުދިން އުޅެ އެވެ.
އެ ސްކޫލްގެ ސެޝަން އިންޗާޖް، އައިޝަތު ވަހީދާ "މިހާރު" އަށް ވިދާޅުވީ އެ ލެބްތަކަކީ ސްކޫލުގައި ކުރިއަށް ގެންދާ ލައިފް ސްކިލް ގަޑި އެންމެ އެދެވޭ ގޮތުގައި، ކުދިންނަށް އެއްޗެއް ދަސްވާނެ ގޮތަކަމަށް ކުރިއަށް ގެންދިއުމަށް ހެދި ތަންތަން ކަމަށެވެ.
"މި ސްކޫލްގައި މެންދުރު 12:30 އިން 2 އަށް އޮންނާނީ ލައިފް ސްކިލް ގަޑި. އެ ގަޑީގަައި ކުޅިވަރެއް ކުޅެން ބެލިޔަސް ދާން ޖެހެނީ މިތާ ކައިރީގެ ދަނޑަކަށް. އެއީ ވެސް ވަރަށް ވަގުތު. ކުދިން ލައްވައި ކުރުވާނެ މާ ބައިވަރު ކަންކަމެއް ނުހުރޭ. އެހެންވެ ޕްރިންސިޕަލްގެ ވިސްނުމެއް މިއީ، ލެބްތައް ތައްޔާރުކުރުމަކީ،" އޭނާ ވިދާޅުވި އެވެ.
އެ ލެބްތައް ހެދީ، ކުދިންނަށް ކަންކަން ދަސްކޮށްދެވޭ ވަރަށް ޓީޗަރުން ވެސް ތަމްރީން ކުރުމަށް ފަހު އެވެ.
ސެޝަން އިންޗާޖް ވިދާޅުވިގޮތުގައި، ކުދިންނަށް އެ ލެބްތަކުން ދަސްވި ކަންކަން ބެލުމަށް ޓާމް ނިމުމުގެ ކުރިން ސްކޫލުން އެސެސް ކުރާނެ އެވެ. ބޭނުމަކީ އެ ކުދިންނަށް ސްކޫލްގެ މާހައުލުން ދަސްވި ކަންކަން ބެލެނިވެރިންނަށް ދެއްކުމެވެ.
ހޯމް ސައިންސް ލެބް
ހޯމް ސައިންސް ލެބް ހަދާފައި ވަނީ، ގައުމީ މަންހަޖުގެ އެއް ކީކޮމްޕިޓެންސީ ކަމަށްވާ، ދިރިއުޅުމަށް ތައްޔާރުކުރެވިފައިވާ ދަރިވަރެއް ބިނާކުރުމަށް ގެވެހި މަސައްކަތްތައް ދަސްކޮށްދިނުމަށެވެ.
މި ލެބުން ދަރިވަރުންގެ އުމުރު ފުރާތަކާ ގުޅޭގޮތަށް، އެއްޗެހި އިސްތިރި ކުރުމާއި ފަތްޖެހުމާއި އަންނައުނު ތަރުތީބުކޮށް، ބަހައްޓާނެ ގޮތްތައް ދަސްކޮށްދޭނެ އެވެ. އެނދުތަންމަތި އެޅުމާއި ސާފުތާހިރުކޮށް، ކޮޓަރިތެރެ އާއި ގޭތެރޭގެ މާހައުލު ބަލަހައްޓާނެ ގޮތްތައް ދަސްކޮށްދޭނެ އެވެ.
އެ ހިސާބުން ނިމުނީކީ ނޫނެވެ. ބަދިގެތެރެ ތަރުތީބު ކުރުމާއި ތަފާތު ވައްތަރުގެ ކާބޯތަކެތި ތައްޔާރު ކުރާނެ ގޮތާއި އެއްޗެހި ކޮށާނެ ގޮތްތަކުގެ އިތުރުން ވެސް ކެއްކުމާ ގުޅޭ ގިނަ ހުނަރުތައް ކުދިންނަށް ދަސްކޮށްދޭނެ ކަމަށް އިއްޒުއްދީން ސްކޫލުން ބުންޏެވެ.
މިއީ، ޒަމާނީ ފެންވަރަށް ހަދާފައިވާ، ގޭތެރޭގެ މާހައުލުގައި ބޭނުންކުރާ ތަފާތު އެކި ކަހަލަ އިލެކްޓްރޯނިކް ވަސީލަތްތައް ހިމެނޭ ގޮތަށް ޑިޒައިން ކޮށްފައިވާ ވަރަށް ހިތްގައިމު ލެބެކެވެ.
ފަހާ ލެބް
މި ލެބަކީ ވެސް އެކި އުމުރުފުރާގެ ކުދިންނަށް، އެ ކުއްޖެއްގެ އުމުރާ ގުޅޭ ގޮތަށް ފެހުމާއި މާޖެހުމާއި ގޮށް ހަރުކުރުމާއި ތިނޯހުގެ އެކި ކަހަލަ މަސައްކަތްތައް ދަސްކޮށްދިނުމަށް ހަދާފައިވާ ތަނެކެވެ.
އެ ލެބުން ދަރިވަރުންނަކީ އުފެއްދުންތެރި، ތަފާތު ގިނަ ހުނަރުތައް އުނގެނި ދަސްވެފައިވާ ބަޔަކަށް ހަދައި ދޭނެ އެވެ.
ގޭމް ލެބް
މާލޭގައި އެއްދަންފަޅި އަށް ކިޔަވައިދޭން ފެށި ފުރަަތަމަ ސްކޫލް އިއްޒުއްދީން ސްކޫލްގައި ތަފާތު އެކި ބޯޑް ގޭމްތަކަށް މޮޅު، ހުނަރުވެރި ކުދިންތަކެއް އުޅެ އެވެ އެކަމަށް ވިސްނައި އެ ސްކޫލްގައި ވަނީ ގޭމްސް ލެބެއް ވެސް ގާއިމުކޮށްފަ އެވެ.
އެ ލެބުން، ކުދިންގެ މި ފަދަ ހުނަތުރައް އިތުރަށް ތަރައްގީ ކޮށްދީ، ވިސްނުމާއި ތޫނުފިލިކަން އިތުރުކޮށްދީ، ދިމާވާ މައްސަލަތައް ހައްލުކުރުމުގެ ހުނަރު އިތުރަށް ލިއްބައި ދޭނެ އެވެ. ގޭމްސް ލެބްގައި ރާޒުވާ އާއި ކެރަމް ފަދަ ތަފާތު އެކި ކުޅިވަރުތައް ކުޅެވޭނެ ގޮތް ވަނީ ހަދައިދީފަ އެވެ.
އާޓް އެންޑް ކްރާފްޓް ލެބް
އަމަލީ ފަންނާއި ފަރުމާ ކުރުމަށް ކުދިންގެ ހިތުގައިވާ ޝައުގު އިތުރަށް ފުރިހަމަކޮށްދިނުމަށް ހުޅުވި އާޓް އެންޑް ކްރާފްޓް ލެބް ވަނީ ޒަމާނީ ފެންވަރަށް ޑިޖިޓަލައިޒް ކޮށްފަ އެވެ. ތަފާތު އެކި ކަހަލަ ކުރެހުމާއި އަތްތެރި މަސައްކަތްތައް ދަސްކޮށްދޭ އެ ލެބަކީ ކުދިންގެ ހުނަރުވެރިކަމާއި ފަންނުވެރިކަމާއި އުފެއްދުންތެރިކަން އިތުރުކޮށް، ކުރިއަރުވައިދޭނެ ވަރަށް ހިތްގައިމު ލެބެކެވެ.
އިއްޒުއްދީން ސްކޫލްގެ ޕްރިންސިޕަލް ނާދިރާ ވިދާޅުވީ، އެ ލެބްތަކުގެ ސަބަބުން ކުއްޖާ އަމިއްލަ ދިރިއުޅުމުގައި އުޅެން ދަސްވާނެ ކަމަށެވެ. އެ ކުދިންނަށް ބޭސިކް ލިޓްރެސީ ދަސްވާނެ އެވެ.
"ކުއްޖާ އަށް އަމިއްލަ އަށް ސަވައިވްވާން އެނގޭނެ. ރޮށި ފިހަން އެނގެން ވާނެ. ގޮށެއް ނެއްޓުނީމާ އެ ލައްވާލަން އެނގެންވާނެ. މިއީ ކުއްޖަކަށް ދަސްކޮށްދެވޭނެ އެންމެ ބޭސިކް ކަންކަން،" އޭނާ ވިދާޅުވި އެވެ.
މިހާރު އެ ސްކޫލުން ވަނީ އެ ލެބްތަކަށް ދިއުމަށް ޓޭބަލްތަކެއް ތައްޔާރުކޮށް އެކި އުމުރުފުރާތަކަށް ބަހާލައިފަ އެވެ. ކޮންމެ ގްރޭޑެއްގެ ކުދިންނަށް ވެސް މަހެއް ނިމުމުގެ ކުރިން ހުރިހާ ކަމެއްގައި ބައިވެރިވެ، އެ ލެބްތަކުގެ ބޭނުން ކުރަން ޖެހެ އެވެ.
ސްކޫލްގައި ކިޔަވަމުން، އާންމު މާހައުލުގެ މަސައްކަތްތައް ސްކޫލްގެ ތެރޭގައި ދަސްކޮށްދިނުމަކީ ރާއްޖޭގައި އަދި އާ ކަމެކެވެ. މަސައްކަތްތެރިކަމުގެ ތަޖުރިބާ ހޯދަން ސްކޫލް ނިންމާ ކުދިންނަށް ކުރިން މަޖުބޫރު ކޮށްފައި އޮތަސް އެ ކަން ވެސް އެހާ ކާމިޔާބެއް ނޫނެވެ. އެކަމަކު، އިއްޒުއްދީން ސްކޫލްގެ ޕްރިންސިޕަލް ނާދިރާ އިސްވެ، މި ފެށީ އެއާ ތަފާތު ކަމެކެވެ. ކުއްޖާ ސްކޫލްގައި ހޭދަކުރާ އެންމެ ޅަ އުމުރުގައި ދިރިއުޅުމުގެ އަސާސީ ކަންކަން ދަސްކޮށްދެވިއްޖެ ނަމަ ފަހުން ފެންނަ ނަތީޖާ ތަފާތު ވާނެ އެެވެ.