ހިރިމަރަދޫ ކުދިންނަށް ޖާގަ ލިބޭ ގޮތަށް ހަނިމާދޫ ސްކޫލުގައި އާ އިމާރާތެއް އަޅަން އެފްޑީސީއަށް

ހދ. ހަނިމާދޫ ސްކޫލުގައި އާ އިމާރާތެއް އެޅުމަށް ނިންމައި، އެ މަސައްކަތް ފަހި ދިރިއުޅުން ކޯޕަރޭޝަން (އެފްޑީސީ)އާ ހަވާލުކޮށްފި އެވެ.

ހދ. އަތޮޅަށް މިއަދު ރައީސް ޑރ. މުހައްމަދު މުއިއްޒު ފެއްޓެވި ދަތުރުފުޅުގައި ހަނިމާދޫއަށް ވަޑައިގެން އެރަށު ރައްޔިތުންނާއެކު މިރޭ ބޭއްވި ޖަލްސާގައި ވަނީ ހަނިމާދޫ ސްކޫލުގެ އާ އިމާރާތުގެ އެއްބަސްވުމުގައި ސޮއިކޮށްފަ އެވެ.

އެ އެއްބަސްވުމުގައި އެޑިޔުކޭޝަން މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު ހުސެއިން ސައީދެވެ. އަދި އެފްޑީސީގެ ފަރާތުން ސޮއި ކުރެއްވީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އިބްރާހިމް ރައްޒާނެވެ.

އެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ ހަނިމާދޫ ސްކޫލުގެ އާ އިމާރާތް އަޅަނީ ހިރިމަރަދޫ ކުދިންނަށް ޖާގަ ލިބޭ ގޮތަށް ކަމަށެވެ. އެތަނުގައި އަށް ކްލާސްރޫމާއި ސައިންސް ލެބަކާއެކު ހުރިހާ ފެސިލިޓީއެއް އެ ތަނުގައި ގާއިމް ކުރާނެ ކަމަށް ރައީސް ވިދާޅުވި އެވެ.

ރައީސް ޑރ. މުހައްމަދު މުއިއްޒު ހދ. ހަނިމާދުއަށް ވަޑައިގަތުމުން އެ ރަށުން އެމަނިކުފާނަށް މަރުހަބާ ކިޔުއްވަން ނިކުތް މީހަކާ ސަލާމް ކުރައްވަނީ.-- ފޮޓޯ: ރައީސް އޮފީސް

ހިރިމަރަދޫގެ އާބާދީ ވަރަށް ބޮޑަށް މަދުވުމުގެ ސަބަބުން އެ ރަށު މީހުން އެހެން ރަށަކަށް ބަދަލުކޮށްދިނުމަށް ސަރުކާރުގައި އެދެމުން އަންނަތާ މިހާރު ވަނީ އެތައް އަހަރެއްވެފަ އެވެ. އެ ރަށު މީހުން ހަނިމާދުއަށް ބަދަލު ކުރަން ރައީސް ނިންމަވާފައި ވަނީ މިދިޔަ ފެބްރުއަރީ މަހު އެވެ.

ހިރިމަރަދޫ ރައްޔިތުން ހަނިމާދުއަށް ބަދަލުކުރަން ސަރުކާރުން ނިންމާފައިވާތީ، އެރަށަށް ބަދަލުވާން ބޭނުންވާ ރައްޔިތުންގެ ބޯހިޔާވަހިކަމާއި މުނިސިޕަލް ހިދުމަތްތައް ހަނިމާދޫގައި ދޮޅު އަހަރު ތެރޭގައި ގާއިމްކުރަން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އާ ސަރުކާރުން މިއަދު ވަނީ ހަވާލުކޮށްފަ އެވެ.

ރައީސް ވިދާޅުވެފައިވަނީ ހިރިމަރަދޫގައި ހުރި ކޮންމެ ގޯއްޗަކަށް ހަނިމާދޫއިން ގެއެއް ލިބޭނެ ކަމަށާއި އަދި 18 މަސް ތެރޭގައި އެތަނުގެ ތަޅުދަނޑި ހަވާލުކުރާނެ ކަމަށެވެ. ނަމަވެސް އެރަށަށް ބަދަލުވާން މަޖުބޫރު ކުރުމެއް ނެތް ކަމަށް އެމަނިކުފާނު ވިދާޅުވި އެވެ.