އޭޑީކޭގައި އެޗްޑީޔޫގެ ހިދުމަތް ފަށަން ބޭއްވި ރަސްމިއްޔާތުގައި އެމްޑީ އަފްއާލް ވާހަކަދައްކަވަނީ --މިހާރު ފޮޓޯ:މުހައްމަދު ޝަރުހާން
29 ޖޫން 2016 - 13:56
2 comments
އޭޑީކޭ ހޮސްޕިޓަލްގައި ހައި ޑިޕެންޑެންސީ ޔުނިޓް (އެޗްޑީއޫ)ގެ ހިދުމަތް ރަސްމީކޮށް މިއަދު ފަށައިފި އެވެ. މިއީ ރާއްޖޭގެ ސިއްހީ ދާއިރާގައި އަލަށް ތައާރަފްކުރި ހިދުމަތެކެވެ.
އެޗްޑީޔޫ އަކީ އައިސީޔޫގައި ފަރުވާދޭން ޖެހޭ ވަރަށް ވުރެ ހާލު ރަނގަޅު އެކަމަކު ވޯޑުގައި ބާއްވައިގެން ފަރުވާދޭން ޖެހޭ ވަރަށް ވުރެ ހާލު ދެރަ މީހުންނަށް ޚާއްސަ ބައެކެވެ.
އޭޑީކޭ ހޮސްޕިޓަލްގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވީ އެޗުޑީޔޫގައި ފަރުވާ ދޭން ޖެހޭ ބަލި މީހުން ކަނޑައަޅާނީ އެމީހަކު ބަލާ ޑޮކްޓަރުންގެ ޓީމުން ކަމަށެވެ.
އޭޑީކޭގެ އާ ޔުނިޓުގައި 12 އެނދު ހުރެ އެވެ. އޭގެ ތެރެއިން ދެ އެނދު ހާއްސަކޮށްފައިވަނީ، އަފްއާލް ވިދާޅުވި ގޮތުގައި، ހާއްސަ އޮޕަރޭޝަނެއް ކުރާ ނުވަތަ އިންފެކްޝަނެއް ޖެހުމުގެ ފުރުސަތު ބޮޑު ބަލިމީހުންނަށެވެ.
"މިއިން ކޮންމެ އެނދެއްގައި ބަހައްޓާފައިވާ މޮނިޓަރިން ޑިވައިސް އަކީ ޕޭޝަންޓާ އެކު އެއް ތަނުން އަނެއް ތަނަށް ވަރަށް ފަސޭހައިން ގެންދެވޭ ގޮތަށް ހުންނަ މޮނިޓާތަކެއް،" އަފްއާލް ވިދާޅުވި އެވެ.
"މި މޮނިޓާތައް އެނދުން ނަގައިގެން ގެންދިޔަ ކަމުގައި ވިއަސް ސެންޓްރަލް ނާސިން ސްޓޭޝަނަށް އޭގެ މައުލޫމާތު ލިބޭނެ. އެއީ ނާސިން ސްޓޭޝަނާ ވަޔަލެސްކޮށް ގުޅިފައި ހުންނާނެތީ."
އޭނާ ވިދާޅުވި ގޮތުގައި އެޗްޑީޔޫގައި ފަރުވާ ދޭ އަގު، އައިސީޔޫގައި ނަގާ އަގަށް ވުރެ ކުޑަވާނެ އެވެ. އަދި އާސަންދަ އިން ވެސް ކަވަރޭޖް ލިބޭނެ ކަމަށް އަފްއާލް ވިދާޅުވި އެވެ.
އެޗްޑީޔޫގެ ހިދުމަތް ފައްޓަވައިދެއްވުމަށް ފަހު ކުރީގެ ނަރުސް އަދި ފަހުން ޖެންޑާ މިނިސްޓަރުކަން ކުރެއްވި އަނީސާ އަހުމަދު ވިދާޅުވީ އާ ހިދުމަތްތަކާ އެކު އޭޑީކޭ ހޮސްޕިޓަލް ތަރައްގީކުރަމުން އަންނަނީ ދުރު ވިސްނުމެއްގައި ކަމަށެވެ. އަދި އެޗްޑީޔޫ އަކީ ރާއްޖެ އަށް ވަރަށް މުހިއްމު ހިދުމަތެއްކަން ވެސް އޭނާ ފާހަގަކުރެއްވި އެވެ.
އޭޑީކޭ އަށް އަންނަ އަހަރު 30 އަހަރު ފުރޭ މުނާސަބަތާ ގުޅުވައިގެން މިހާރު ގެންދަނީ ކޮންމެ މަހަކު ވެސް އާ ހިދުމަތެއް ތައާރަފްކުރަމުންނެވެ.
އަނީސާ ވިދާޅުވި ގޮތުގައި އޭޑީކޭ އިން ހިދުމަތް ދެމުން އަންނަނީ ވިޔަފާރިއެއް ފުޅާކުރުމަށް ވުރެ ބޮޑަށް ރައްޔިތުންނަށް ހިދުމަތެއް ދޭށެވެ. އަދި ސިއްހީ ދާއިރާގެ ކުރިއެރުމަށް އޭޑީކޭ އިން ކޮށްދެމުން އަންނަ ހިދުމަތްތަކަށް އޭނާ ޝުކުރު ވެސް އަދާކުރެއްވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަނިސަގެއަނގ
29 June 2016
ވިޔަފާރިއަކަށްވުރެ ޚިދުމަތަކަށް ބަލައިގެންނޭ. އަނީސާ އަޅެ ހަމަ ކޯޗެއްގެ މައްޗަށް ބަލާފަ ތިބުނީ. ޑރ އަށް ދައްކަން 300ރފ ނަގާ. އައިޖީއެމްއެޗުން 25ރފ، ތީހަމަ ބޮޑު ވިޔަފާރީގެ ފައިދާ ގަނޑަކަށް ކުރާ ކަމެއް. މީހަކު ކޮންމެއެއްޗެކޭ ކިޔަސް އަހަރެމެނަކަށް އޮޅުވައެއް ނުލެވޭނެ.
ގިވްއިން
29 June 2016
އޭޑީކޭ އިން ރާއްޖޭގެ ސިއްޚީ ދާއިރާ ތަރައްގީ ކޮށްދެއްވުމަށް ޓަކައި ކޮށްދެއްވަމުން ގެންދަވާ ކަންކަން އެއީ ބަލައިގަންނަން ޖެހޭނެ ކަމެކެވެ. އޭޑީކޭ އިން އަގުބޮޑު ކަމުގެ ވާހަކަ އަކީ އާންމު ވާހަކަ އަކަށް ވެފައި ވާތީވެ އޭޑީކޭގެ އަގުތައް ތިރިކުރެވޭނެ ގޮތަކީ ކޮބައިތޯ ބަލާ އޭޑީކޭ އަށް ހުޅުމާލޭން ބޮޑު ބިމެއް ދީގެން އެބިމުގައި އޭޑީކޭގެ މުވައްޒަފުންގެ ކޮންޑަމީނިއަމް ހަދައިގެން ނަމަވެސް އޭޑީކޭ ގެ ޚިދްމަތުގެ އަގު ހެޔޮ ވޭތޯ ސަރުކާރުން މަސައްކަތް ކުރެއްވުމަކީ އެއީ ހެލްތް މިނިސްޓްރީގެ މޭންޑޭޓް ތެރޭގައި ހިމެނޭނެ ކަމެއް ކަމަށް އަޅުގަނޑުމެން ދެކެނީ. އޭޑީކޭ އިން ރާއްޖޭގައި ސިއްޚީ ޚިދްމަތް ދޭތާ 30 އަހަރު ވެފައިވާ އިރު އެ ޚިދްމަތް އަޕަރސްޓްރީމް އަށް ގެންދެވޭނެ ގޮތް އޭޑީކޭ އާއި ގުޅިގެން ހެލްތް މިނިސްޓްރީން ނުކުރަނީ އެއީ ކީއްވެގެންތޯއެވެ. އޭޑީކޭ އަކީ އެެއީ ހެލްތް މިނިސްޓްރީގެ އެނެމީ އެއް ނޫނެވެ. އެހެން ދެކިގެން ނުވާނެއެވެ. ނާޝިދު އެމްޑީޕީގެ އެމްޕީ އަކަށް ވީނަމަވެސް އޭޑީކޭ އަކީ އެއީ ރައްޔިތުންނަށް ޚިދްމަތް ދޭ ތަނަކަށް ވާއިރު ނާޝިދު އާއި ގުޅިގެން އޭޑީކޭ އަށް ދެވިދާނެ އިންސެންޓިވްސް ތަކާއި މެދު ހެލްތް މިނިސްޓަރު ޖެހޭނެ މަޝްވަރާ ކުރެވެން. އޭޑީކޭ އަކީ އެއީ ރާއްޖެ އަށް ބޭނުންވާ ބަޔެކެވެ. އޭޑީކޭ އިން ރާއްޖޭގެ ސިއްޚީ ދާއިރާ ތަރައްގީ ކުރުމަށް ޓަކައި ކުރައްވާ މަސައްކަތް ކުރިއަށް ގެންދަންވީ މަޑު ޖެހުމެއް ނެތި،. ރައްޔިތުންނަށް ހެޔޮ އަގުގައި ރަނގަޅު ޚިދްމަތް ތަކެއް ދެވޭތޯ ބައްލަވަންވީ އެވެ. ޕީޕީއެމް އެމްޑީއޭ އަދި ޖޭޕީ ކޯލިޝަން އިން ރާއްޖެ ލިޓިލް ސިންގަޕޯރގެ ސައލެންޓް ޑްރީމް ކާމިޔާބު ކުރާއިރު އޭޑީކޭ އަކީ މުހިއްމު ސްޓޭކް ހޯލްޑަރ އެވެ. އޭޑީކޭ.. ވަޓް ޔޫ ޑޫ އިޒް ގިވިންގް އަ ހެޕީ އެން ޖޯއިފުލް ގިވިންގް ޓު އޯލް އޮފް އަސް.. ގިވް އިން ޓު މީ.. ގިވް އިން ޓު މީ..