ނައިބު ރައީސް ފައިސަލް ނަސީމް، ހޯމް މިނިސްޓަރު އިމްރާން އަބްދުﷲ އާ ސަލާމް ކުރައްވަނީ. --- ފޮޓޯ: ރައީސް އޮފީސް
14 އެޕްރީލް 2019 - 00:03
15 comments
ދިވެހިންނަށް ލިބިފައިވާ އެންމެ ބޮޑު ހަދިޔާ އަކީ ރާއްޖެ މިނިވަން ގައުމެއްގެ ގޮތުގައި ދެމިއޮތުން ކަމަށް ނައިބު ރައީސް ފައިސަލް ނަސީމް މިރޭ ވިދާޅުވެއްޖެ އެވެ.
މި އަހަރުގެ ޝަހީދުންގެ ދުވަސް ފާހަގަ ކުރުމަށް ދަރުބާރުގޭގައި ބޭއްވި ޖަލްސާ ޝަރަފްވެރިކޮށްދެއްވައި ނައިބު ރައީސް ވިދާޅުވީ ބަވަނަވެފައިވާ ދުނިޔެއެއްގައި، ތަފާތު އެކި އޮއިވަރުތަކެއް ހުރި އިރު، ދިވެހިންގެ މެދުގައި އޮތް ގުޅުން ބަދަހިކޮށް، އެއްބައެއްވަންތަ ބައެއްގެ ގޮތުގައި ތިބެން ޖެހޭ ކަމަށެވެ.
"އަޅުގަނޑުމެންގެ މި އަގުބޮޑު ހަދިޔާ، އަޅުގަނޑުމެންނަށް މި ލިބިފައި އޮތް އިސްލާމީ ހިދާޔަތުގެ އަލިކަން، ތާއަބަދު އޮތުމަކީ އެއީ ދިވެހި ހުރިހާ ލޮބުވެތި ރައްޔިތުން އެންމެ ބޮޑަށް ބޭނުންވާނެ ކަންތައް،" ސަރުކާރުގެ ބައެއް ވަޒީރުން ބައިވެރިވެވަޑައިގެންނެވި ޖަލްސާގައި ފައިސަލް ވިދާޅުވި އެވެ.
ޝަހީދުންގެ ދުވަސް ފާހަގަ ކުރަން ދަރުބާރުގޭގައި މިރޭ ބޭއްވި ޖަލްސާގައި ނައިބު ރައީސް ވާހަކަފުޅު ދައްކަވަނީ. --- ފޮޓޯ: ރައީސް އޮފީސް
އަލި ރަސްގެފާނާއި ބޮޑުތަކުރުފާނު ކުރެއްވި ޖިހާދާއި ނޮވެމްބަރު 3، 1988 ގައި ޝަހީދު ހުސެއިން އާދަމް ކުރެއްވި ޖިހާދުން މިސާލު ނަންގަވައި ނައިބު ރައީސް ވިދާޅުވި ގޮތުގައި އެ ބަތޮލުން ކުރެއްވީ ގައުމީ ހިދުމަތެކެވެ. މިފަދަ ކަންކަން ހިންގުމުގައި ދިވެހިންގެ ތެރެއިން ކޮންމެވެސް ބަޔަކު އެކަމުގެ ތެރެއަށް ވަދެ ގޯސްތަކެއް ހަދާފައިވާ ކަން ހާމަވެފައިވާ ކަމަށް އެމަނިކުފާނު ވިދާޅުވި އެވެ.
ނައިބު ރައީސް ވިދާޅުވީ މާޒީގައި ލިބުނު ފިލާވަޅުތައް ސްކޫލް ކުދިންނަށް ދީ، އެކަންކަން ދަސްކޮށް އެކަމާ ބެހޭ ގޮތުން ލިޔަން ޖެހޭ ކަމަށެވެ. އަދި ދިވެހިންނަށް ލިބިފައިވާ ހިތްހަމަޖެހުމަށް ވަނީ ތާރީޚާއި ތާރީޚުގެ މުއްސަނދިކަން ކަމަށް ވެސް އެމަނިކުފާނު ވިދާޅުވި އެވެ.
ޝަހީދުންގެ ދުވަސް ފާހަގަ ކުރަން ބޭއްވި ޖަލްސާގައި ނައިބު ރައީސް އާއި ވަޒީރުން ބައިވެރިވެވަޑައިގަންނަވަނީ. --- ފޮޓޯ: ރައީސް އޮފީސް
"ގައުމެއް، އެ ގައުމުގެ ގޮތުގައި އަޅުގަނޑުމެންނާ ހަމައަށް ގެނެސްދިން ގޮތް، ގެނެސްދިން ފަރާތްތަކަކީ އެއީ އަޅުގަނޑުމެންނަށް ވަރަށް މުހިއްމު ކަމެއް. އަޅުގަނޑުމެން ކުރިއަށް އޮތް ތަނުގައި ގައުމާއިގެން ކުރިއަށްދާ އިރު، އަޅުގަނޑުމެން ވަރަށް ބޮޑަށް މި ކަންތައްތަކާ ވިސްނައި ފިކުރުކުރަން އެބަ ޖެހޭ،" ހޯމް މިނިސްޓްރީން އިންތިޒާމުކޮށްގެން ބޭއްވި ޖަލްސާގައި ނައިބު ރައީސް ވިދާޅުވި އެވެ.
ރާއްޖޭގައި ޝަހީދުންގެ ދުވަސް ފާހަގަ ކުރަނީ ދިވެހީންގެ ހިތްތަކުގައި އޮތް އިސްލާމީ އަގީދާ އާއި ރާއްޖޭގެ ސިޔާދަތާއި މިނިވަންކަމުގެ ދިފާއުގައި، ކާފަރުންނާ ހަނގުރާމަ ކުރައްވައި ޝަހީދުވެވަޑައިގެންނެވި އަލީ ރަސްގެފާނުގެ ހަނދާނުގަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޕަޕެޓްމާސްޓަރ
15 April 2019
ޝަހީދުންގެ ދުވަހެއް މުހިންމު ނުވިއެއްނު؟ ތި ޖަލްސާގަ ނެތް އެއްވެސް އެމްޑީޕީ މީހެއް. ގައުމުގެ ވަލިއްޔުލް އަމްރެއް އަދި އެމްޑީޕީގެ މިނިސްޓަރުންނެއް. ގައުމުގެ މިކަހަލަ ދުވަސް ދުވަސް މުހިންމު ނުވާ ބަޔަކަށް ގައުމު މުހިއްމު ވޭތަ؟ މިނިވަން ދުވަހަށް ވާނީ އެމީހުންނަށް ވެރިކަން ލިބޭ ދުވަސް. ޝަހީދުންގެ ދުވަހަށް ވާނީ 12 ފެބްރުއަރީ... ގައުމުގެ ހާލަތު.
ނޫވިލު
14 April 2019
ކީކޭބުނާނީ. ތިބުނާ ހުރިހާ ކަމެއް ތިހެން ހުއްޓާ، ގާތުގާ ގެންގުޅޭ ގިނަކުދިން ދިޔައީ ލޮނުޒިޔާރަތްކޮޅަށް ނޫންތޯ؟ ކީތްވީހީ ތިބުނާ ޖަލްސާއަކަށްގޮސް ތިކަމުގާ އުޅެލިނަމަ.
ޅަބޭ
14 April 2019
ތީ ސޭޓު ބަގާވާތްކުރީމަ، ރައީސްކަމައް އަންނަންހުރި މީހާ.
އިބްރާ
14 April 2019
މިނިވަންޖަން ރާއްޖެއިން ގެއްލިގެން ފައިސަލަށް ލިބުނީ ކޮންގެއްލުމެއްތޯ؟ މި ސަރުކާރު ވައްޓާލަން ގާނޫނާޚިލާފަށް ބަޔަކު ނުކުތަސް އެބަޔަކު ޖަލަށް އަޅާލާނެކަން ކަށަވަރު.
ކަނބިލި
14 April 2019
މިފަދަ ގައުމީ ޖަލްސާތަކުން އެމްޑީޕީގެ ލީޑަރޝިޕުން މީހަކު ނުފެންނާނެ. މިއީ ލައްކަ ވާހަކަ
މަންޑޭލާ
14 April 2019
ރާއްޖެ ހަލާކުވުމުގެ ކުރިން ދިވެހިން ނުތެދުވެއްޖެނަމަ މީގެ ގެއްލުން ވަރައްބޮޑަ ކުރާނެ.
ޝޮކްތެރަޕީ
14 April 2019
މިރާއްޖޭގެ މިނިވަންކަން އިންޑިޔައަ މިދިނީ ކީކުރަންބާ. ގަމާރުންނަކަ ނުވިންނުނަސް ހެޔޮވިންނޭ މީހުން އަދިވެސް މިޤައުމުގަ އެބަތިބި.
ނޫވިލު
14 April 2019
ވިސްނަންވީ ތަންކޮޅަކީ ފުރަތަމަ ތިމާގެ ޕާޓީކަން. ދެން ގައުމުގެ މިފަދަ ކަންކަން. ރޭގަ ފެނުނީ މިކަން ނޫންތޯ؟
ޗަކޮއެޭ
14 April 2019
މިނިވަންކަން ބޭނުންނުވާތީ ތިޔަޖަލްސާއަށް ދާންއޮތް މެހެމާނު އަޑީޕާކުގައި ބެރުޖަހަން އުޅުނީ.
އެމްއެމްއައި
14 April 2019
ކޮންކަހަލަ މިނވަންކަމެއްތޯ. އިސްތިއުމާރީން ހިތާ ނުވެދާނެތީ މަޖުބޫރުވެފައިވަނީ އަހަރުމެންގެ ގޮތްފޮތާއި އެވެރިންގެ ޤާނޫނާއި ގަވާއިދުތަކަށް ފަހާފައި ހެދުންލުމަށެވެ. ފައިކުރި ނިވައިވިއްޔާ ބޯކޮޅު ނިވަލެއް ނުވެއެވެ. އަޚްލާޤާއި ސުލޫކަށް ބަލައިފީވިއްޔާ އިސްލާމްދީނު އަސަރު ޖެހުނުތާ ލަކުނުވެސް ނެތް ހިސާބަށް އޮބައިގޮސްފިއެވެ. މިފަދަ މިނިވަންކަމެއްގައި، އިސްލާމްދީން މިބިމުގައި އަލުން އާލާކުރުމަށް މިގައުމުގައި މަސައްކަތްކުރަމުންދާ މަދު މީސްކޮޅު، މިތިބީ ދެދުނިޔޭން ނަޖާނުވެދާނެޔޭ ހީވެ އެބިރުވެރިކަމުގައެވެ.