މާލޭގެ އެންމެ ކާރުބާރު ބޮޑު، މަޖީދީ މަގާއި ޗާންދަނީ މަގު ގުޅުނު ކަންމަތީގައި އެކަނިމާ އެކަނި މިއަދު އުޅުނު ދެ އަހަރުގެ އަންހެން ކުއްޖެއްގެ ބެލެނިވެރިޔާ ހޯދައި އެ ކުއްޖާ ހަވާލުކޮށްފި އެވެ.
ފުލުހުން ބުނީ ވެހިކަލްތަކާއި މީހުން ތޮއްޖެހިފައި އޮންނަ ޖަންކްޝަންގައި ކުޑަ ކުއްޖަކު އެކަނި އުޅެނިކޮށް ފެނުނީ މާލެތެރެ ޕެޓްރޯލްކުރި އެސްއޯ ފުލުހުންތަކަކަށް ކަމަށެވެ. އެ ކުއްޖާއާ ހަވާލުވެ ފުލުހުން ވަނީ ބެލެނިވެރިޔާ ހޯދައިފަ އެވެ.
އާއްމުކޮށް އުރައިގެން އުޅޭ އުމުރުގެ އެ ކުއްޖާ ބެލެނިވެރިންނާ ވަކިވީ ކިހިނެއް ކަމެއް ފުލުހުން ނުބުނެ އެވެ. އެކަމަކު، އެ ސަރަހައްދުން ވެހިކަލްތައް ދުއްވާ ސްޕީޑާއި ތޮއްޖެހިފައި އޮންނަ މިންވަރަށް ބަލާއިރު ވަގުތުކޮޅަކަށް ނަމަވެސް އެ ކުއްޖާ ހުށަހެޅުނީ ނުރައްކަލެއްގެ ތެރެއަށެވެ.
Miadhu, Chaandhanee magaai Majeedhee Magu gulhunu kanmathee beleniveriyaku nethi ulhunu 2 aharuge kuda anhen kujjegge beleniveriyaa, evaguthu e sarahadhdhu patrol kuramun dhiya #SOfuluhun ge eheetherikamaaeku hoadhai kujjaa beleniveriyaa aa havaalukohfaivey
— Maldives Police (@PoliceMv) December 5, 2019
މި ހާދިސާ ހިނގުމުން ފުލުހުން ވަނީ ކުޑަކުދިން ގޮވައިގެން ބޭރަށް ނުކުމެ އުޅުމުގައި އެ ކުދިންގެ ރައްކާތެރިކަަމަށް ހާއްސަ ސަމާލުކަމެއް ދޭން އެދިފަ އެވެ. މަގުތަކުގައި ހިނގާއިރު ކުދިންގެ އަތުގައި ހިފައިގެން މަގުގެ އެއްފަރާތުން ހިނގަން ފުލުހުން އިލްތިމާސްކުރެ އެވެ.
