އެއް ލައްކަ ރުފިޔާ ނެގީ މިސްކިތަށް ދިޔަ ވަގުތު!

ގދ. ގައްދޫގެ މިސްކިތު އިމާމު، މުހައްމަދު ޖަމީލްގެ ގެއަށް ވަދެ ލައްކައަކަށް ވުރެން ގިނަ ރުފިޔާ ވަގަށް ނެގީ އޭނާ ފަތިސް ނަމާދަށް ދިޔަ ވަގުތު ކަމަށް އެ އާއިލާ އިން މިއަދު ބުނެފި އެވެ.

ޖަމީލް، 79،ގެ ދަރިފުޅު އަބްދުﷲ ރަޝީދު ބުނިގޮތުގައި އެ ގެއަށް އިއްޔެ ފަތިހު ވަގަކު ވަނީ ގިފިލި ފަރާތު ދޮރު ހަލާކުކޮށްގެންނެވެ. ވަގު ވަނީ ފަތިސް ނަމާދު ކުރަން ފެށި ވަގުތު ކަމަށާއި އެ ވަގުތު ގޭގައި ހުރީ މަންމަ އަދީލާ އާދަމް، 76 އެކަނި ކަމަށް އޭނާ ބުންޏެވެ. އަދީލާއަކީ ތުރުތުރު އަޅާ ބަލީގެ ސަބަބުން އެނދުމަތިވެފައި އޮންނަ މީހެކެވެ.

"މަންމަ ބުނި އޭރު ބައްޕަ ނަމާދު ކުރާ އަޑު އިވޭ. އެހެންވީމަ ވަގު ކަލޭގެއަށް އެނގޭނެތާ އެވަގުތު ޔަގީނުން ވެސް ބައްޕަ ނާންނާނެ ކަން. އެވަރު ބަލާފައި އެކަން އެކުރީ،" އެ ރަށު އެހެން މިސްކިތެއްގެ އިމާމަކަށް އުޅޭ އަބްދުﷲ ބުންޏެވެ.

އެ ގެއިން ވަގަށް ނެގީ 95،000ރ. އާއި 1،000 ޑޮލަރު (15،420ރ.) އެވެ. އެފައިސާ ހުރީ އެ ދެމަފިރިން ނިދާ ކޮޓަރީގައި ހުރި ފޮއްޓެއްގަ އެވެ.

ދުވަސްވީ ދެ މަފިރިން ދިރިއުޅޭ ގެއިން ވައްކަން ކުރަން ތަކެއްޗަށް ގެއްލުން ދީފައި-- ފޮޓޯ: ފުލުހުން

އަބްދުﷲ ބުނިގޮތުގައި ފައިސާ ނެގީ އޭނާގެ މަންމަ ނިދާ ކޮޓަރީގައި ބަހައްޓާފައި ހުރި ލަކުޑި ފޮއްޓެއް ހަލާކުކޮށްގެންނެވެ. އެ ވައްކަން ކުރީ އެންމެ މީހެއް ކަމަށާއި އެއީ ކާކުކަން އޭނާގެ މަންމައަށް އެނގޭ ކަމަށްވެސް އަބްދުﷲ ބުންޏެވެ. ވައްކަން ކުރީ ގުޑައިނުލެވޭ އެ އަންހެން މީހާގެ ކުރިމަތީގަ އެވެ.

"މަންމަގެ ހެޔަކަށް ގޮތެއް ނުވޭ. އެެންވެ މަންމައަށް ވީގޮތް އެނގޭ. މަންމަ ބުނި އޭނަ އެއް ފަހަރު މަންމައާ ދިމާލަށް ބަލައިލިއޭ. އެހެންވެ މަންމައަށް އެއީ ކާކުކަން،" ކަން ހިނގި ގޮތް ކިޔައިދެމުން އަބްދުﷲ ބުންޏެވެ.

އޭނާ ބުނީ ވައްކަން ކުރި މީހާ އަށް އެ ރަށު މީހުން ކިޔަނީ ކުދިބީ އިސްމާއިލް ކަމަށެވެ. އޭނާ މިއަދު ހައްޔަރުކޮށްގެން ތިނަދޫއަށް ގެންގޮސްފައިވާ ކަމަށާއި ނަމަވެސް އެއްވެސް ފައިސާއެއް އަދި ނުފެންނަ ކަމަށް އަބްދުﷲ ބުންޏެވެ.

އެ މީހާއަކީ އާންމުކޮށް އެކަހަލަ ބޮޑެތި ވައްކަންތައް ކޮށް އުޅޭ މީހެއް ކަމަށްވެސް އަބްދުﷲ ތުހުމަތު ކުރި އެވެ.

އަބްދުﷲ ބުނިގޮތުގައި އެ ވައްކަން ކުރުމުގެ އެއް ރޭ ކުރިން ވެސް އެގޭ ގިފިލި ދޮރަށް ގެއްލުން ދީފައި ހުރިކަން ފާހަގަ ކުރެވިގެން އެކަން ފުލުހުންނަށް ހުށަހެޅި ކަމަށެވެ. އޭގެ އަނެއް ރޭ ވައްކަން ކުރީ އެކަން މާބޮޑު ކަމަކަށް ނުހެދި ވަނިކޮށް ކަމަށް އޭނާ ބުންޏެވެ.

އަބްދުﷲ ގެ ބައްޕަ އަކީ ކުރިން ވަޑާމުގެ މަސައްކަތާއި އިމާމުކަން ވެސް ކުރި މީހެކެވެ. މިހާރުވެސް ވަގުތީ ގޮތުން މިސްކިތެއްގެ އިމާމުކަން ކުރާތީ އާއި ދެމަފިރިންނަށް ލިބޭ އިނާޔަތާއެކު ގިނަ އަދަދެއްގެ ފައިސާ ލިބެ އެވެ.