ޒަމްޒަމް ގުރޫޕުގެ ބަޔަކު މައްކާގައި: ވިސާ ނުޖެހިގެން މިދިޔަ ހުކުރުދުވަހު ނުފުރުނު ޒަމްޒަމް ގުރޫޕުގެ މީހުންގެ ތެރެއިން 199 މީހަކު މިއަދު ވަނީ ފުރާފައި.---ފޮޓޯ: ޒަމްޒަމް ގުރޫޕް
04 ޑިސެމްބަރ 2016 - 15:47
5 comments
ޒަމްޒަމް ހައްޖު އެންޑް އުމްރާ ޓްރެވެލްގެ ހަވާލުގައި ދެ ހަރަމްގެ އުމްރާ އަށް ދާ މީހުންގެ ވިސާގެ ކަންކަން ހަމަޖެހި، އޭގެ ތެރެއިން 199 މީހަކު މިއަދު ފުރައިފި އެވެ.
ޒަމްޒަމް ގުރޫޕުގެ 246 މީހަކު މިދިޔަ ހުކުރުދުވަހު ހެނދުނު އުމްރާ އަށް ފުރަން ހަމަޖެހިފައިވީ ނަމަވެސް، އެމީހުންގެ ވިސާގެ ކަންކަން ނުނިމޭކަން އެ ގުރޫޕުން އެންގީ އެ ރޭގެ ފަތިހުގަ އެވެ. އެހެންވެ ވިސާގެ މައްސަލާގައި އެއްވެސް މީހަކަށް އެ ދުވަހު ފުރޭ ގޮތެއް ނުވި އެވެ.
ޒަމްޒަމް ގުރޫޕުގެ ވެރިޔާ އަބްދުލް އަޒީޒް ހުސެއިން (އަޒީބެ) މިއަދު ވިދާޅުވީ އެންމެންގެ ވިސާ މިހާރު ހަމަޖެހިފައިވާ ކަމަށެވެ. ވިސާ ޖެހުމުގެ ކަންކަން ޒަމްޒަމް ގުރޫޕުން ހަވާލުކުރީ އައިލެންޑް އޭވިއޭޝަނާ އެވެ. އެކަމަކު، ވިސާ ޖެހުމުގައި ކުރިމަތިވި މައްސަލަތަކާ ގުޅޭ ގޮތުން ޒަމްޒަމް ގުރޫޕުން އަޒީބެ ވާހަކަ ދައްކަވާކަށް ބޭނުމެއް ނުވި އެވެ. އައިލެންޑް އޭވިއޭޝަނުން ވެސް ވަކި އެއްޗެއް މިހާތަނަށް ނުބުނެ އެވެ.
އަޒީބެ ވިދާޅުުވީ 199 މީހަކު މިއަދު އުމްރާ އަށް ފުރީ އައިލެންޑް އޭވިއޭޝަންގެ ޗާޓަރު މަތިންދާބޯޓެއްގައި ކަމަށެވެ. އަދި ބާކީ 47 މީހަކު މާދަމާ ފުރަނީ ގަތަރު އެއާވޭޒްގެ ޝެޑިއުލް ފްލައިޓެއްގައި ކަމަށް އޭނާ ވިދާޅުވި އެވެ.
"މި މީހުންނަށް މި ފުރެނީ ސަރުކާރުގެ އެއްބާރުލުމާއި އައިލެންޑް އޭވިއޭޝަންގެ ވަރަށް ބޮޑު އެހީތެރިކަމެއް ލިބިގެން،" އަޒީބެ ވިދާޅުވި އެވެ.
ވިސާގެ މައްސަލާގައި ހުކުރުދުވަހު ނުފުރުނު މީހުން އުމްރާ އަށް ގެންދިއުމަށްޓަކައި އޮތީ ސައޫދީ އެއާލައިންސްގެ ބޯޓެއް ވެސް ޗާޓަރުކޮށްފަ އެވެ. އެ ބޯޓު ޗާޓަރުކުރީ ޒަމްޒަމް ގުރޫޕާއި އެހެން ގުރޫޕެއް ގުޅިގެންނެވެ. އެކަމަކު ޒަމްޒަމް ގުރޫޕުގެ މީހުންނަށް ފުރޭ ގޮތް ނުވުމުން، އަނެއް ގުރޫޕުގެ މީހުންނާ އެކު ބޯޓު ވަނީ ހުކުރުދުވަހު ހެނދުނު ފުރައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަލީ
05 December 2016
މިއައް ކިޔަނީ، ގައުމު ފެލާލުން. މުޅި އުމުރު ދުވަހު އެއްކުރި ލާރިކޮޅު، އެއެއްޗެކޭ، މިއެއްޗެކޭ ކިޔައިގެން ފެލާލާނެ ގޮތެއް ހޯދައިގެން، މިވެރިން މިއުޅުނީ.
އިއްބެ
05 December 2016
މިފަދައިން ކަންތައްތައް ނުވާނޭ ގޮތެއްގެމަތީން ސަރުކާރުން ކަންތައްތައް އިންތިޒާމް ކުރަންވެއްޖެ! ވަކި ވަރަކަށް ވުރެ ގިނައިން ޢުމްރާއަށް މީހުން ނުގެންދެވޭނެ ގޮތެއް ހަމަޖައްސަން ޖެހޭ!
ރަދީފް އެންޑް ރަފައިދާ
04 December 2016
އަޒީބެ ވަރެއް ނެތް.
ދނ
04 December 2016
ގިނަވާނީ ރާއްޖެތެރޭމީހުންނެވެ. އެމީހުންގެ މާލޭގައިތިބުމާއި ކެއުމުގެ ކަންތައްތައް ހަމަޖެއްސިގޮތަކާއިމެދުވެސް އަޒީބެއާއި އައިލެންޑްއޭވިއޭޝަނުން އެއްޗެކޭނުބުނޭތޯއެވެ؟
ބުލް
04 December 2016
ތީ އައިލެންޑްއޭވިއޭޝަން ކައިރީ އަހަން ޖެހޭ ސުވާލެއް. ސަބަބަކީ ހުރިހާ ޖަމާއަތް ތަކުންވެސް ވިސާ ސީދާ އެންބަސީން ނުނެގޭ! 3 ވަނަ ފަރާތެއް މެދުވެރި ވެގެން މި ނެގެނީ. މީގަ އިހުމާލު ވަނީ އައިލެންޑްއޭވިއޭޝަން ކަމަށް ވާތީ ތިސުވާލު އެބޭފުޅުން ކައަރީ އެހުން ބުއްދި ވެރި. އަޒީބެ ބޮޑު ހަރަދެއް ކުރައްވައިގެން މިކަން ކޮއްދިނީތީ ސުކުރުވެރި ވާން ޖެހޭ! މަދު ބަޔަކު މިވަރު ކޮއްދޭނީ.