ފުލުހުން ގޭންގޭ ނުކިޔާ އެހެން ވާހަކައެއް ދައްކާ!

އއ. އުކުޅަހުގައި ފުލުހުންގެ އެންމެ އިސް ބޭފުޅުން ނުކުމެ ވަޑައިގެން ގޭންގުތަކޭ، ގޭންގުތަކުގެ ހަރަކާތްތައް މިހާ ވަރަށް ފުޅާ ވެއްޖެއޭ ކިޔައިގެން މި ދައްކަވަނީ، އެ ބޭފުޅުންގެ ހިތުން އާންމުން ވަރަށް ކަންބޮޑުވާނެ ވާހަކަ އެކެވެ. ނޫނެވެ. ވަރަށް ސާފުކޮށް މި ދަންނަވަނީ އެވެ؛ އަޅުގަނޑެއް، އަޅުގަނޑުމެންގެ އެކަކު ވެސް އެކަމާ ކަންބޮޑެއް ނުވެ އެވެ.

އެކަމާ ކަންބޮޑުވެގެން އުޅެނީ ކާކު ހެއްޔެވެ؟ ދެ ލޯ ބޮޑުކޮށް ހަ ފަރާތަށް ބަލާލީމަ ފެންނަ މަންޒަރަކީ، ފުލުހުން، ސިފައިން، ރައްޔިތުންގެ މަޖިލީހުގެ މެމްބަރުން، އަދި ސަރުކާރު ވެސް އަދި އަޅުގަނޑުމެން ވެސް އެކަމާ ފަރުވާލެއް ނެތް ތަނެވެ. ހީވަނީ، ކުށުގެ މާހައުލަކީ ވެސް އޮންނަން ޖެހޭ އެއްޗެއް ހެންނެވެ. ގޭންގުތައް ވެސް އޮންނަން ޖެހޭ ކަހަލަ އެވެ. ހިވަނީ، ގައުމަކަށް ވަނީ ކޮންޓްރެކްޓަށް މީހުން މަރާ މީހުން ވެސް ތިބެން ޖެހެއޭ ބުނާހެންނެވެ.

މިހެން ދަންނަވަން ޖެހޭ ސަބަބުތައް ވަރަށް ބައިވަރެވެ.

މާލޭގެ ކަންކަންމަތީގައި ގުރޫޕުތައް ހަދައިގެން އެކްޓިވޭޓްވެ، ދުނިޔޭގެ ފެންވަރުގެ މާފިޔާ ހަރަކާތްތައް ހިންގާ ވަރުގެ ގޭންގުތަކަކަށް އެ ކުދިކުދި ގުރޫޕުތައް ބަދަލުވީ މިއަދަކު ނޫނެވެ. މީގެ ތިރީހަކަށް އަހަރު ކުރިން ފެށިގެން އެކަން ހިނގަމުން އައިކަން އެންމެންނަށް ވެސް އެނގެ އެވެ. އެ ސެލްތައް ވަކި ކުށުގެ ވެށީގައި ހިއްޕަން ފެށީ ބަލަބަލަ ތިއްބަ އެވެ. ފުލުހުންނާއި ސިފައިންނާއި ދައުލަތުގެ އެންމެންގެ ވެސް ކުރިމަތީގަ އެވެ. އާންމުންނަށް ވެސް އެ މަންޒަރު ފެނެ އެވެ. އަހަރެއްގެ މައްޗަށް ބަރިބަރި އަށް އެތައް ކުށެއްކޮށް، އެތައް ބައެއްގެ ގަޔަށް ވަޅި ހަރައި މަރާލާއިރު، އެއީ ގޭންގުތަކުން ނުކުމެ ހިންގާފައިވާ ޖަރީމާތަކެއް ކަން އެއީ ސިއްރުވެފައި އޮތް ކަމެއް ނޫނެވެ.

އެކަމަކު ގޭންގުތައް ހުއްޓުވުމުގެ ބަދަލުގައި ވޭތުވެދިޔަ ތިރީހަކަށް އަހަރު ފެނުނީ، މުޅި ދައުލަތް ގުޅިގެން އެ ގޭންގުތައް ދިރުވައި އާލާކުރިތަނެވެ. އެ މީހުންގެ މައްޗަށް ކުށެއް ސާބިތުކުރަން މަސައްކަތް ކުރުމުގެ ބަދަލުގައި ޖުޑީޝަރީ ބައެއް މީހުންގެ ފަރާތުން ފެނުނީ އެ މީހުންގެ އަތުން ރިޝްވަތު ނަގައި، ވި ކަންކަން ނުވާ ކަންކަމަށް ހެދި ތަނެވެ. ބައެއް ލޯޔަރުން މަސައްކަތް ކުރީ ފުނިފުންޏަށް ފައިސާ ނަގައިގެން، ލޭ ހޭކިފައި ހުރި ހެކި މީހާ ލައްވާ ވެސް އެއީ ނުފެންނަ މަންޒަރެއް ކަން ދައްކުވާށެވެ. ބައެއް ގާޒީން ބެލީ ވަޒީފާ އާއި އާއިލާ ސަލާމަތް ކުރެވޭތޯ އެވެ. މަޖިލީހުގެ ބައެއް މެމްބަރުން ބެލީ އެ މީހުން ލައްވާ، ވާދަވެރިންނަށް ބިރުދެއްކުވޭތޯ އެވެ. ބައެއް މަހުޖަނުން ބެލީ އޭނާގެ އަތުން ދަރަނި ނަގާފައިވާ ފައިސާ، ގޭންގު މެދުވެރިކޮށް ހޯދޭތޯ އެވެ. ސަރުކާރު ބެލީ މުޒާހަރާތަކުގައި ހަމަނުޖެހުން އުފެއްދޭތޯ އެވެ. ބައެއް ސިޔާސީ ލީޑަރުން ބެލީ އެ މީހުންގެ ހިމާޔަތް ލިބޭނެ ގޮތެކެވެ. ނޫސްވެރިން ދުށީ އެ އެންމެން އަޅާ ނުލާ ކަމެއްގައި ނޫސްވެރިން އެކަނި ސުއިސައިޑް ވުމުގެ ބޭނުމެއް ނެތް ކަމެއްގެ ގޮތުގަ އެވެ.

މި ހުރިހާ ކަމެއްގެ ތެރޭގައި، އެތައް މިލިއަން، އެތައް ސަތޭކަ މިލިއަން ރުފިޔާއެއް އެނބުރިއްޖެ އެވެ. ނަތީޖާ އަކީ ގޭންގުތައް ވިޔަފާރިއަކަށް ބަދަލުވެ، އެ ނޫން ގަދަ ބަޔަކު ނެތް ވަރަށް ބާރު ލިބުމެވެ. އާޚިރު ނަތީޖާ އަކީ، ފުލުހުންނަށް ވެސް އެ މީހުންގެ ގައިގައި އަތްނުލެވޭ ހިސާބަށް ދިއުމެވެ. ގޭންގު ހެދުމަކީ ގާނޫނުން މަނާ ކޮށްފައި އޮތް ކަމެއް ނަމަވެސް އެ ކުށެއް ފުލުހުންނަކަށް ދުވަހަކު ވެސް ނުހުއްޓުވުނެވެ. ހުއްޓުވަން ބޭނުންވާ ފުލުސް މީހާ ގޭންގު މީހާގެ އަތުގައި ހިފާތަނުން ފުލުސް މީހާ ގޯސްވާ ހިސާބަށް ގޮސްފައި ވެސް އެބަހުއްޓެވެ. ގޭންގުތައް ހުއްޓުވޭނީ ގާނޫނު ހަދައިގެންނޭ ފުލުހުން ބުނެގެން މަޖިލީސް ރޭގަނޑު ހޭލައި ތިބެގެން ސަންސެޓް ގާނޫނެއް ހެދިތާ 12 އަހަރުވީ އިރު ވެސް ނުކުތް ނަތީޖާއެއް ނެތެވެ.

ގޭންގު ލީޑަރު ގޮސް، ރައީސުންނާއި ނައިބު ރައީސްގެ ފަހަތްޕުޅުގައި ހުންނަތަން އާންމުންނަށް ގަސްތުގައި ވެސް ދައްކައިފި އެވެ. އެއަށް ވުރެ ބޮޑަށް، ގައުމުގެ ބޮޑެތި މަގާމްތަކާއި ޖުޑިޝަރީގެ ބޮޑެތި މަގާމްތަކަށް ގޭންގުތަކުން މީހުން އައްޔަން ކުރާ ހިސާބަށް މި ގައުމުގެ ކަންކަން ހިނގައްޖެ އެވެ. ހައިރާންވާނެ ކަމެއް ނެތެވެ. މިއީ ދިވެހިރާއްޖެ އެވެ. ކޮންމެ ކަމެއް ވެސް ހިނގައިފާނެ އެވެ.

އަޅުގަނޑަށް ނުވިސްނޭ ކަމަކީ މި އެވެ؛ ގޭންގުތަކުގެ ނިވަލުގައި ފިލައި ތިބެނީ ކޮންކޮން ސިޔާސީ ބައެއް ކަމާއި ގޭންގުތަކާ ގުޅިގެން މަސްތުވާތަކެތި ވިއްކަނީ ކޮންކޮން ސިޔާސީ ބައެއް ކަމާއި އެކަމުގެ ފަހަތުގައި ތިބީ ކޮންކޮން ބައެއް ކަން ފުލުހުންނަށް އެނގޭ އިރު، އެ މީހުން ހައްޔަރު ނުކުރެވެނީ ކީއްވެތޯ އެވެ؟ އަޅުގަނޑުގެ ސުވާލަކީ، ގޭންގެއް އޮތްކަން ހަމަ ރަނގަޅަށް އެނގޭއިރު އެ ގޭންގެއް އޮންނަތާ 20-30 އަހަރު ވާއިރު ވެސް އެ މީހުން ވުޖޫދުން ދުއްވާލެވޭ ވަރަށް ވުރެ މި ގައުމު ހަމަ ބަލިކަށީ ހެއްޔޭ އެވެ؟

އަޅުގަނޑުމެން މި އުޅެނީ މާލޭގެ ގޭންގުތަކާއި އެ ގޭންގުތަކުގައި އުޅޭ މީހުންގެ އަދަދާއި އެ މީހުން ކުރާ ކަންކަމާއި އެ މީހުންނަށް ފަންޑުކޮށްދޭ މީހުންގެ އަދަދު ނޭނގިގެންނެއް ނޫނެވެ. އެ ގޭންގުތައް ހުއްޓުވުމުގެ ނިޔަތް ނެތިގެންނެވެ. ހަމަ އެއްވެސް ސަރުކާރަކަށް އެ ހިތްވަރު ނުލިބިގެންނެވެ. ރައްޔިތުންގެ މަޖިލީހުގެ މެމްބަރުން އެ ގޭންގުތައް ބޭނުން ކުރާތީ އެކަން ހުއްޓުވަން ކެރޭނެ ޕޮލިސް ކޮމިޝަނަރަކު ނައިސްގެންނެވެ. އަޅުގަނޑުމެން މި ކަންބޮޑުވަނީ މަސްތުވާތަކެތި ވިއްކައިގެން އެ ގޭންގުތަކުން ރެސްޓޯރަންޓުތަކާއި ބޮޑެތި ފިހާރަތައް ހުޅުވާއިރު، އެކަން އެނގިތިބެމެ، ހުއްއްޓުވާނެ ފުލުހުންތަކެއް ނުފެނިގެންނެވެ. ހާސް މި ވަނީ، ގޭންގުގެ ބޮޑެތި މީހުން ފިނި ކޮޓަރީގައި ތިބެގެން، ތަނެއް ދޮރެއް ނޭނގޭ ޅަކުދިން މަގުމައްޗަށް ނެރެ، އެ ކުދިން ލައްވާ ޑްރަގްސް ވިއްކުވައި، އެ ކުދިންނަށް 25 އަހަރުގެ ޖަލު ހުކުމް އަންނަ އިރު، އޭގެ މުގޫ އުފުރާލެވޭނެ ހަމަ އެއްވެސް މަގެއް ނުފެނިގެެންނެވެ.

ގޭންގެއް ބަލަހައްޓާށޭ ކިޔައިފައި ސިފައިންގެ ހަތަރު މީހުންނާއި ފުލުހުންގެ ހަތަރު މީހުން 24 ގަޑިއިރު ގެއެއްގެ ކަންމަތީގައި ފޯރިމަރަން ތިބޭ ތަން ފެނުމުން އަޅުގަނޑަށް އަންނަނީ ހިންޏެވެ. އެއިން އަޅުގަނޑުމެންގެ ހާލަތާއި ގައުމެއް ބަޔަކު ދަށުވެފައި އޮތް ވަރު ވަރަށް ރަނގަޅަށް އެބަ އެނގެ އެވެ. އެއީ ލަދުވެތި މަންޒަަރެކެވެ. ގޮތް ހުސްވެފައިވާ ކަމުގެ ވަރަށް ރީތި މިސާލެކެވެ. އެކަމަކު، ކޮންޓްރޯލެއް ނެތް، އަދި އެހެން ބަޔަކު ގޭންގުތަކަށް މަދަދު ދޭ ކަމަށް ވަންޏާ އެއީ ނުފެނި ނުދާނެ މަންޒަރެއް ކަން ވެސް ގަބޫލު ކުރަން ޖެހެ އެވެ.

ފުލުހުން ނުކުމެ އަނެއްކާ ވެސް އިއްޔެ އަދަދުތަކެއް އިއްވައިފި އެވެ. ގޭންގުތައް އޮތް ހާލަތު ރައްޔިތުންނަށް ކިޔައިދީފި އެވެ. ކުޑަކުދިންގެ އަދަދު ވެސް ބުނެފި އެވެ. އަދަދު ވީ އިތުރެވެ. ޖަރީމާތައް އިތުރުވަނީ އެވެ. ރަށްރަށަށް ވެސް އެ ވައިރަސް ފެތުރެނީ އެވެ. -- ބޮޑު ކާމިޔާބެކެވެ!

މިހެން މި ވާހަކަ ދެއްކީމަ، އަނެއްކާ އަޅުގަނޑު ވެސް އޮންނަންވީ ބިރުން ރަޖާލައިގެންނެވެ.