"މަނީ ހައިސްޓް" ގެ ކެރެކްޓާއަކުން އާ ސީރީޒެއް ގެނެސްދެނީ

އަހުމަދު އަދްޝަން، މިހާރު

02 ޑިސެމްބަރ 2021 - 06:20

ބެލުންތެރިންގެ ބޮޑު ތަރުހީބެއް ހޯދި ސްޕެއިންގެ ސީރީޒް "މަނީ ހައިސްޓް" ފަސް ވަނަ ސީޒަންގެ ފަހުގެ އެޕިސޯޑްތައް އަންނަ ހުކުރު ދުވަހު ސްޓްރީމް ކުރަން ހަމަޖެހިފައި ވަނިކޮށް، އެ ސީރީޒްގެ މައިގަނޑު ކެރެކްޓާއަކަށް ބިނާކޮށް އާ ސީރީޒެއް ގެނެސްދޭން ނިންމާފައިވާކަން ނެޓްފްލިކްްސް އިން އިއުލާންކޮށްފި އެވެ.

"މަނީ ހައިސްޓް" ގެ ސްޕިން-އޮފެއްގެ ގޮތުގައި 2023 ގައި ގެނެސްދޭން ނިންމާފައި ވަނީ ސީރީޒްގައި ޕެޑްރޯ އެލޮންސޯ ކުޅުނު ކެރެކްޓާ ބާލިން އަށް ބިނާކޮށް ހަދާ އެއްޗެކެވެ. އޭގެ ނަމަކަށް ވެސް ހަމަޖައްސާފައި ވަނީ "ބާލިން" އެވެ. މި ވާހަކަ ޓްވިޓާގައި ހިއްސާކޮށް ނެޓްފްލިކްސް އިން ބުނީ "މަނީ ހައިސްޓް" ނިމުމަކަށް އަޔަސް، މީގެ ވާހަކައަށް އަދިވެސް ނިމުމެއް ނާންނާނެ ކަމަށެވެ.

އެހެންވެ ޔަގީނުން ވެސް 2023 އަކީ އެ ސީރީޒްގެ ފޭނުން ވަރަށް އިންތިޒާރު ކުރާނެ އަހަރަކަށް ވާނެ އެވެ.

This heist might be coming to an end, but the story continues...

Berlin: A New Series, coming in 2023 pic.twitter.com/jMvufEArKq
— Netflix (@netflix) November 30, 2021

"މަނީ ހައިސްޓް" ފަސް ވަނަ ސީޒަނާ އެކު މި ސީރީޒް މި އަހަރު ނިންމާލާއިރު، މީގެ ފަހު ސީޒަން ބެލުންތެރިންނަށް ގެނެސްދެނީ ދެ ވޮލިއުމްއަކަށެވެ. އެގޮތުން ވޮލިއުމް އެކެއްގައި ފަސް އެޕިސޯޑާ އެކު ސްޓްރީމްކުރީ ސެޕްޓެމްބަރު މަހު އެވެ.

ހުކުރު ދުވަހު ސްޓްރީމްކުރާ ދެވަނަ ވޮލިއުމް ގައި ފަސް އެޕިސޯޑް ހިމެނޭނެ އެވެ. މީގެ ހަތަރު އަހަރު ކުރިން ގެނެސްދޭން ފެށި ސީރީޒް ނިންމާލަނީ ޖުމްލަ 41 އެޕިސޯޑާ އެކީގަ އެވެ.

Squid Game's Park Hae-soo will play Berlin in the upcoming Korean version of La Casa de Papel / Money Heist! pic.twitter.com/ntQPPIOaOt
— Netflix (@netflix) November 30, 2021

ދެކުނު ކޮރެއާ އިން މިހާރު ވަނީ "މަނީ ހައިސްޓް" ގެ ރިމޭކެއް ހަދަން ނިންމައި އެކަން ރަސްމީކޮށް އިއުލާންކޮށްފަ އެވެ. ކޮރެއާ ރިމޭކްގައި ޕެޑްރޯ ކުޅުނު ބާލިންގެ ކެރެކްޓާ ކުޅޭނީ ނެޓްފްލިކްސް އިން ދާދި ފަހުން ގެނެސްދީގެން ބޮޑު ތަރުހީބެއް ލިބުނު ކޮރެއާގެ ސީރީޒް "ސްކްއިޑް ގޭމް" ގައި މުހިއްމު ރޯލެއް ކުޅުނު ޕާކް ހައޭ ސޫ އެވެ. ނެޓްފްލިކްސްއިން މީގެ ވާހަކަ ކަށަވަރުކޮށް ދިން ނަމަވެސް، ގެނެސްދޭނެ އިރެއް ހާމައެއް ނުކުރެ އެވެ.