އޭސީސީގެ މެމްބަރުކަމަށް ކުރިމަތިލާން ހުޅުވާލައިފި

އެންޓިކޮރަޕްޝަން ކޮމިޝަނުގެ ރައީސް މަރިޔަމް ޝިއުނާއާއި އެކޮމިޝަނުގެ އެހެން މެމްބަރުން ރައްޔިތުންގެ މަޖިލީހުގެ މިނިވަން މުައައްސަސާތަކުގެ ކޮމިޓީގެ ބައްދަލުވުމުގައި ބައިވެރިވަޑައިގަންނަވަނީ. ފޮޓޯ:ރައްޔިތުންގެ މަޖިލީހުގެ އިދާރާ

އާސިމާ ނިޒާރު، މިހާރު

05 ޑިސެމްބަރ 2021 - 17:24

އެންޓި ކޮރަޕްޝަން ކޮމިޝަން (އޭސީސީ) އިން ހުސްވެފައިވާ މެމްބަރުކަމުގެ މަގާމަށް ކުރިމަތިލާން މިއަދު ހުޅުވާލައިފި އެވެ.

އެ ކޮމިޝަންގެ މެމްބަރުކަމަށް ކުރިމަތިލުމުގެ ފުރުސަތު ހުޅުވައިލީ، ފަސް މެމްބަރުންގެ ތެރެއިން އަޝްރަފް އަލީ މިދިޔަ ހަފުތާގައި އިސްތިއުފާ ދެއްވުމުންނެވެ. އެހެންވެ، ހުސްވެފައިވާ ގޮނޑި އަށް ކުރިމަތިލުމުގެ ފުރުސަތު މި މަހުގެ 16 އާ ހަމައަށް ރައީސް އޮފީހުން ހުޅުވައިލީ އެވެ.

އަޝްރަފު "މިހާރު" އަށް ވިދާޅުވީ އޭސީސީން ވަކިވެވަޑައިގަތީ އަމިއްލަ ސަބަބުތަކަކަށްޓަކަ އެވެ. އެ ތަނާ އެއްވެސް މައްސަލައެއް ނެތް ކަމަށް އޭނާ ވިދާޅުވި އެވެ.

އެކަށީގެންވާ ގޮތެއްގައި މަސައްކަތް ނުކުރައްވާ ކަމުގެ ފާޑުކިޔުންތަކާއެކު، މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ވަނީ އޭސީސީގެ މެމްބަރުންގެ މަސައްކަތާ ގުޅޭ އޮޑިޓަކަށް ފަހު، އެކަށީގެންވާ ގޮތެއްގައި މަސައްކަތް ނުކުރައްވާ މެމްބަރުން މަގާމުން ދުރުކުރުމުގެ މަސައްކަތް ކުރިއަށް ގެންދަން ނިންމައިފަ އެވެ.

މި ވެރިިކަމުގައި އޭސީސީ އަށް އައްޔަންކުރި މެމްބަރުންނަށް މައްސަލަތައް ނުބެލޭ ކަމުގެ ޝަކުވާ ބޮޑުވެފައި އޮތް އިރު، ކުރީގެ ސަރުކާރުގައި އެެންމެ ބޮޑު ކަންބޮޑުވުމަކަށް އޮތީ އޭސީސީ ނުފޫޒެއްގެ ދަށުވެފައި އޮތުމެވެ.