މަސްވެރިންގެ އެތައް ދުވަހެއްގެ ޝަކުވާ، އަދިވެސް ހައްލެއް ނެތް!

މަސްވެރިކަން ތިޔާގިވާ ކޮންމެ ފަހަރަކު ވެސް، މަސް ކިރުވަން އެތައް ދުވަހެއް ވަންދެން މަސްވެރިން ކިއުގައި ތިބެން ޖެހެ އެވެ. އޮޑިތައް ޒަމާނީވެ އެތައް ގުނައެއް ބޮޑުވި އިރު އަދިވެސް މަސް ކިރުމުގެ ކަންކަން އޮތީ މީގެ 50 ވަރަކަށް އަހަރުގެ ކުރީގެ ހާލަތުގަ އެވެ. މިއީ، މިއަދު ފާހަގަކުރާ މަސްވެރިންގެ ދުވަހު ވެސް މަސްވެރިން ކުރަމުންދާ އެންމެ ބޮޑު ޝަކުވާ އެވެ. މިކަން ހައްލުކޮށްދޭން އާދޭސް ކުރާތާ އެތައް އަހަރެއްވެއްޖެ އެވެ.

ގއ.ގެމަނަފުށީގެ ކެޔޮޅު އިސްމާއިލް ޔާމީން ބުނީ މަސްވެރިކަމުގައި ހުރީ ދުވަހަކު ވެސް ހައްލު ލިބިފައި ނުވާ ކަންކަން ކަމަށެވެ. އެ ކަންކަމަށް ހައްލެއް ލިބޭނެ ކަމަށް އޭނާ މާބޮޑު އުންމީދެއް ވެސް ނުކުރެ އެވެ.

"މީ އަބަދުވެސް ހާލު. ކިރިޔާ ވެސް މަސްވެރިކަން ރަނގަޅުވެއްޖެއްޔާ މަސް ނުކިރި ކިއުގައި ތިބެން ޖެހޭނެ. މިދިޔަ ހަފްތާގައި ހަތަރު ވަރަކަށް ދުވަހު ކިއުގައި އޮންނަން ޖެހުނު،" އޭނާ ބުންޏެވެ.

ޔާމީން ބުނީ، މަސްވެރިންނަށް ބޭނުންވާ ވަރަށް މިފްކޯއިން މަސް ކިރުވޭ ކެޕޭސިޓީ އިތުރު ކުރަން ޖެހޭ ކަމަށެވެ.

ހަމަ މި ޝަކުވާ ކުރި އަނެއް މަސްވެރިޔައީ ގދ.ފަރެސްމާތޮޑާގެ އަހުމަދު ޒައީނެވެ. އޭނާ ބުނީ މިދިޔަ ބުދަ ދުވަހު ބޭނި މަސްކޮޅު އަދިވެސް މިއުޅެނީ ނުކިރިގެން ކަމަށެވެ.

"މިހެން ހެދީމަ މަސްވެރިންގެ ހަރަދުތައް ބޮޑުވާނީ. އަނެއްކޮޅުން ޖެހިގެން އަންނަ ދުވަހު މަހަށް ވެސް ނުނިކުމެވޭނެ." އޭނާ ބުންޏެވެ.

މަސްވެރިކަން ރަނގަޅު ދުވަސްވަރެއްގައި އެވްރެޖްކޮށް ދޯންޏަކުން 40 ޓަނުގެ މަސް ބާނަ އެވެ. އަދި އާންމުކޮށް މަސްވެރިކަން ރަނގަޅު ނޫން ދުވަސްވަރު ވެސް 20 ޓަނުގެ މަސް ބާނަ އެވެ. މި ވަގުތު ކުއްޑޫން ކިރެނީ ދުވާލެއްގެ މައްޗަށް 300 ޓަނުގެ މަހެވެ. މިހެންވެ ދެތިން ދޯނިން މަސް ކިރުމުން އޮންނަނީ ކެޕޭސިޓީ ފުލްވެފަ އެވެ.

މަސްވެރިންނަށް ލިބޭ އާމްދަނީ ދަށްވެއްޖެ

ޒައީން ބުނީ މިދިޔަ ދޮޅު އަހަރެއްހާ ދުވަހު މަސް ކިރާ އަގު އެހާ ބޮޑަށް ކުޑަކުރުމުން ލިބޭ އާމްދަނީ ވަރަށް ބޮޑަށް ދަށްވެފައިވާ ކަމަށެވެ. އާމްދަނީ ދަށްވި އިރު ކުރަން ޖެހޭ ހަރަދުތައްވީ ބޮޑު ކަމަށް އޭނާ ބުންޏެވެ.

މަސްވެރިން މިހާރު ތެލަށް ކުރާ ހަރަދު ވެސް ވަނީ ވަރަށް ބޮޑުވެފަ އެވެ. މިހާރު މަސްވެރިން ބޭނުންކުރާ 100 ފޫޓުގެ ބޮޑެތި ދޯނި ފަހަރަށް މަހަކު އެތައް ފީފާއެއްގެ ތެޔޮ ހަރަދުވެ އެވެ. މިވަގުތު ޑީސަލް ލީޓަރެއް އުޅެނީ 12.35ރ. އަށެވެ.

"މިދިޔަ ހަފްތާގައި ވެސް ލިބުނީ ކުރިން ލިބޭ އާމްދަނީއަށް ވުރެ ތިން ލައްކަ ރުފިޔާ މަދުން." އޭނާ ބުންޏެވެ.

މިވަގުތު މިފްކޯއިން ކިރަނީ ކިލޯއެއް 16ރ. އަށެވެ. ބައެއް އަމިއްލަ ކުންފުނިތައް ކަމަށްވާ އެންސިސް ކަހަލަ ކުންފުނިތަކުގައި އަގު ހުރީ 17ރ. އަށެވެ. މީގެ ދޮޅު އަހަރު ކުރިން އަގު ހުރީ ކިލޯއެއް 20ރ. އަށެވެ.

ޒައީން ބުނީ ބޭރުގެ ބާޒާރުގައި މިހާރު މަހުގެ އަގު ރަނގަޅުވަމުން އަންނަ ކަމަށެވެ. އެހެން ނަމަވެސް މިފްކޯއިން އަގަށް ބަދަލު ނުގެންނާތީ ވަރަށް ބޮޑަށް ކަންބޮޑުވާ ކަމަށެވެ.

މަހުގެ އަގާ ގުޅޭ ގޮތުން މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ވިދާޅުވީ، ބޭރުގެ މާކެޓުގައި އަގު އަދިވެސް ކުރީގެ އަގުތަކަށް ބަދަލު ނުވާ ކަމަށެވެ. އަގަށް ބަދަލު އަންނަ ވަރަކުން މަސްވެރިންގެ އަތުން މަސް ގަންނަ އަގަށް ވެސް ބަދަލު ގެންނާނެ ކަމަށް އޭނާ ވިދާޅުވި އެވެ.

ގެމަނަފުށީގެ މަސްވެރިޔާ މުހައްމަދު ޝިނާޒު ބުނީ ކުރިން ލިބޭ އާމްދަނީގެ ދެބައިކުޅަ އެއްބައި ވެސް މިހާރު ނުލިބޭ ކަމަށެވެ. އަދި ކިރާ މަހުން ލިބެންޖެހޭ ފައިސާކޮޅު ލިބެނީ ހަފްތާއެއް ފަހުން ކަމަށް އޭނާ ބުންޏެވެ.

"ކިރުވާ މަސްކޮޅުގެ އަގު މި ލިބެނީ ހަފްތާއަކަށް ވުރެ ގިނަ ދުވަސް ފަހުން. މިއީ މަސްވެރިންނަށް ވަރަށް އުނދަގޫވާ ކަމެއް،" އޭނާ ބުންޏެވެ.

އޮޑިފަހަރާއި މަސްވެރިން ތަރައްގީވެ، މަސްބާނާ ވަރު އިތުރު ކުރި ނަމަވެސް މިފްކޯއަށް އެހިސާބަށް ނުދެވުމުން ބޮޑެތި އުނދަގޫތައް ކުރިމަތިވާ ކަން އެ ކުންފުނީގެ މެނޭޖިން ޑިރެކްޓަރު ވެސް ގަބޫލު ކުރައްވަ އެވެ. އެހެން ނަމަަވެސް މިފްކޯގެ ކެޕޭސިޓީ އިތުރުކޮށް މަސްވެރިން އެބޭނުންވާ ހިސާބަށް އަންނަން އަދި ދުވަސް ނަގާނެ ކަމަށް އޭނާ ވިދާޅުވި އެވެ.