ކޮލޮރާޑޯގެ އަލިފާނުގައި ހާހަކަށް ވުރެ ގިނަ ގެ އަޅިއަށް

އެމެރިކާގެ ކޮލޮރާޑޯ ސްޓޭޓްގެ ޖަންގަލީގައި ރޯވި އަލިފާންގަނޑު، މީހުން ދިރިއުޅޭ ސަރަހައްދަށް ފެތުރި، ގާތްގަނޑަކަށް 1،000 ގެ އަނދައި އަޅިއަށް ވެއްޖެ އެވެ.

ކޮލޮރާޑޯގެ ފުލުހުންގެ ވެރިޔާ ޖޯ ޕެލޭ ވިދާޅުވި ގޮތުގައި މީހުން ދިރިއުޅޭ ސަރަހައްދަށް އަލިފާންގަނޑު ފެތުރުނީ، ޖަންގަލީގައި ރޯވެ އަނދަމުން ދަނިކޮށް އާދަޔާ ހިލާފަށް ވައި ގަދަވުމުގެ ސަބަބުންނެވެ. ގެތަކުގައި ރޯވާން ފެށުމާ އެކު، އެ ސަރަހައްދުގައި ދިރިއުޅޭ އެތައް ހާސް ބަޔަކު ވަނީ، ރައްކާތެރި ސަރަހައްދުތަކަށް ބަދަލުވެފަ އެވެ.

ފުލުހުން ބުނާ ގޮތުގައި މި ހާދިސާގައި މިހާތަނަށް ތިން މީހަކު ވަނީ ވީނުވީއެއް ނޭނގި ގެއްލިފަ އެވެ. ބޮޑަށް ލަފާކުރެވެނީ، އަނދައިގެން ދިޔަ ގެތަކާ އެކުގައި އެމީހުން ވެސް އަނދައިގެން ދިޔައީ ކަމަށެވެ. އެހެންކަމުން އެމީހުން ދިރިތިއްބާ އަލުން ފެންނާނެ ކަމުގެ އުންމީދު ވަރަށް ކުޑަ ކަމަށް ވެސް ފުލުހުން ބުނެ އެވެ.

ކޮލޮރާޑޯގެ ފުލުހުން ބުނާ ގޮތުގައި އެ ސަރަހައްދުގައި މީހުން ދިރިއުޅޭ އިމާރާތްތަކުގައި އެންމެ ފުރަތަމަ އަލިފާން ރޯވާން ފެށީ މިދިޔަ ބުރާސްފަތި ދުވަހު ފަތިހު ދަންވަރެވެ. ޖަންގަލީގެ ގަސްތަކުގައި ރޯވެ އަނދަމުން ދިޔައިރު، އެ ސަރަހައްދުގައި ވައިގެ ބާރުމިން ހުރީ ގަޑިއަކު 160 ކިލޯމީޓަރު ބާރުމިނުގައި ކަމަށްވެ އެވެ. ބާރަށް ވައި ޖެހެން ފެށުމާއެކު ދެ ގަޑިއިރުގެ ތެރޭގައި 6،000 އޭކަރުގެ ބޮޑު ސަރަހައްދަކަށް އަލިފާންގަނޑު ފެތުރުނެވެ.

ފުލުހުންގެ ވެރިޔާ ވިދާޅުވި ގޮތުގައި ގެއްލިފައިވާ މީހުން ހޯދުމަކީ ވެސް، މިހާރުގެ މޫސުން ހުރި ގޮތަށް ބަލާއިރު ވަރަށް އުނދަގޫ ކަމެކެވެ. އަނދައި އަޅިއަށް ވެފައި ހުރި އިމާރާތްތަކުގެ ބައިތައް ވަކިވަކިވެގެން ބިންމައްޗަށް ވެއްޓިފައިވާ އިރު، މުޅި ސަރަހައްދަށް މިހާރު އޮތީ އަށް އިންޗި ބޯމިނަށް ސްނޯ ފައިބައިފަ އެވެ.

އެހެންކަމުން، ގަދަ ފިނީގެ ތެރޭގައި ސްނޯތައް ކަހައި ސާފުކޮށްގެން އިމާރާތްތަކުގެ ދަށުން މީހުން ހޯދުމުގެ މަސައްކަތަށް ވަރަށް ގިނަ ވަގުތު ހޭދަވާނެ ކަމަށް ބެލެވެ އެވެ. ތިން މީހަކު ގެއްލިފައިވާ އިރު، އަލިފާނުން ސަލާމަތްވާން އުޅުމުގެ ތެރޭގައި ފިހިފައިވާ ހަތް މީހަކަށް މިހާރު އަންނަނީ ހޮސްޕިޓަލުގައި ފަރުވާ ދެމުންނެވެ.

އަލިފާން ނިއްވާ އިދާރާ އިން ބުނި ގޮތުގައި ޖަންގަލީގައި އަލިފާން ރޯވި ކަމަށް ބެލެވެނީ، މަތިން ދަމާފައި ހުރި ކަރަންޓު ނަރުތައް ބާރު ވައިގެ ސަބަބުން ބުރިވެގެން ވެއްޓި ހިނގި ކަރަންޓު ޝޯޓެއްގެ ސަބަބުންނެވެ. ނަމަވެސް އެ ސަރަހައްދު ބެލުމަށް ފަހު، އެ އިދާރާ އިން ފަހުން ބުނި ގޮތުގައި، އެއްވެސް ސަރަހައްދެއްގައި ކަރަންޓު ނަރެއް ވެއްޓިފައި ނެތުމުން، އަލިފާން ރޯވި ހަގީގީ ސަބަބެއް ބުނަން ދައްޗެވެ.